هەڵەیەک روویدا! دووبارە هەوڵبدە
رووداو دیجیتاڵ
فەرماندەی قەرارگەی خاتەمولئەنبیای ئێران هۆشدارییەکی تووند دەداتە ئەمریکا و هاوپەیمانەکانی و رایدەگەیێنێت، هێزە چەکدارەکانی ئێران لە هەموو کاتێک ئامادەترن و هەر هەڵەیەکی ستراتیژیی نوێ، وەڵامێکی "سەخت و فراوان"ی دەبێت.
رۆژی سێشەممە، 19ی ئایاری 2026 ، عەلی عەبدوڵڵاھی، فەرماندەی قەرارگەی خاتەمولئەنبیای ئێران رایگەیاند: "بە ئەمریکا و هاوپەیمانەکانی دەڵێین کە جارێکی دیکە تووشی هەڵەی ستراتیژی و هەڵەی لێکدانەوە نەبن بەرامبەر بە کۆماری ئیسلامیی ئێران."
عەلی عەبدوڵڵاھی گوتی: "هێزە چەکدارەکانی ئێران لەوپەڕی ئامادەییدان و دووژمنان دەبێت بزانن کە ئێران و هێزە چەکدارەکانی لە رابردوو ئامادەتر و بەهێزترن و دەستیان لەسەر پەلەپیتکەیە؛ هەر جۆرە دەستدرێژی و بەزاندنی سنوورێکی وڵاتەکەمان، بە وەڵامێکی خێرا، یەکلاکەرەوە، بەهێز و فراوانی دەبێت."
عەلی عەبدوڵڵاھی، ئامااژەی بە توانای هێزە چەکدارەکانی ئێران کرد و گوتی: "ئێمە بە ئیرادەیەکی خوداییەوە سەلماندوومانە کە هێز و توانای خۆمان لە مەیدانی کردەودا نیشانی دووژمنان دەدەین، هەروەها هۆشداریی دا کە ئەگەر "هەڵەیەکی دیکە" لەلایەن ئەمریکا و هاوپەیمانەکانی بکرێت، ئەوا وەڵامی ئێران زۆر لەوە بەهێزتر دەبێت کە لە کاتی جەنگی (رەمەزان)دا هەیبووە و گوتیشی: "بە هەموو توانامانەوە بەرگری لە مافەکانی گەلی ئێران دەکەین و دەستی هەر دەستدرێژیکارێک دەبڕین."
دۆناڵد ترەمپ، سەرۆکی ئەمریکا رایگەیاند، بڕیاریان دابوو سبەی سێشەممە، هێرشی سەربازی گەورە و فراوان بکەنە سەر ئێران، بەڵام لەسەر داوای سەرکردەکانی قەتەر، سعودیە و ئیمارات هێرشەکەی راگرتووە. لەگەڵ ئەوەشدا هۆشداری دەدات کە ئەگەر نەگەنە رێککەوتن، لە هەر ساتێکدا بێت هێرشە گەورەکە دەستپێدەکەن.
جەنگەکە 28ی شوبات بە هێرشی ئەمریکا و ئیسرائیل بۆ سەر ئێران دەستی پێکرد. لە 8ی نیسانەوە ئاگربەست راگەیێندراوە، بەڵام ئێران گەمارۆی خستووەتە سەر تەنگەی هورمز و ئەمریکاش وەک تۆڵەیەک، بەندەرەکانی ئێرانی ئابلووقە داوە.
تاکو ئێستا چەندنین پەیام لە رێگەی پاکستانەوە لە نێوان ئێران و ئەمریکا ئاڵوگۆڕ کراوە، بەڵام هێشتا گەڕی دووەمی دانوستاندنی دوای جەنگە 40 رۆژێکە لە نێوان ئەو دوو وڵاتە نەکراوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ