میدیای ئێران: دەنگی پێنج تەقینەوەی بەهێز لەنزیک بنکەی ئەتۆمیی ئیسفەهان بیسترا

 

بەرەبەیانیی ئەمڕۆ یەکشەممە، 22-06-2025، میدیای فەرمیی ئێران پشتڕاستی کردەوە کە دەنگی پێنج تەقینەوەی بەهێز لە نزیک بنکەی ئەتۆمیی ئیسفەهان بیستراون. ئەمە لەکاتێکدایە کە جەنگی نێوان ئێران و ئیسرائیل گەیشتووەتە لووتکە و دەنگی تەقینەوە لە تاران و چەندین شاری دیکەش بیستراون.

 

بەگوێرەی میدیاکانی ئێران، هاوکات لەگەڵ هێرشەکەی ئیسفەهان، هێرش کراوەتە سەر ناوچەکانی ناوەند، رۆژهەڵات و رۆژئاوای تارانی پایتەخت و لە ئەنجامدا سیستمی بەرگریی ئاسمانیی شارەکە کارا کراوە و رووبەڕووی "ژمارەیەک تەنی ئاسمانی" بووەتەوە.

 

هێرشەکە ناوچەی نارمەک و بنکەی هێزی ئاسمانیی سوپایشی لە شارەکە گرتووەتەوە. میدیاکانی نزیک لە سوپای پاسداران باس لەوە دەکەن، تەقینەوەیەکی بەهێز لە نزیک نەخۆشخانەی "ئیمام رەزا" لە شاری تەورێز روویداوە و لە ئەنجامی کاراکرانی سیستمی بەرگریی ئاسمانی، درۆنێک خراوەتە خوارەوە.

 

هاوکات هێرش بۆ سەر بەندەر عەباس، کاشان، شیراز و قوومیش راگەیێندراوە. میدیای ئێران ئاماژەی بەوەش کردووە سیستمی بەرگریی ئاسمانی لە شاری قووم، درۆنێکی ئیسرائیلی خستووەتە خوارەوە.

 

بەگوێرەی زانیارییەکان، لە ئاسمانی شارەکانی سنە و مهاباد لە رۆژهەڵاتی کوردستان، دەنگی فڕۆکەی جەنگی بیستراوە و لەو شارانەش سیستمەکانی بەرگریی ئاسمانی کارا کراون.

 

تاوەکو ئامادەکردنی ئەم هەواڵە، هیچ زانیارییەکی فەرمی لەبارەی زیانە گیانی و مادییەکانی هێرشەکان، بەتایبەتی لە دەوروبەری بنکە ئەتۆمییەکەی ئیسفەهان، بڵاونەکراوەتەوە.

 

ئەم هێرشانە لە دەیەمین رۆژی جەنگی نێوان ئێران و ئیسرائیلدا دێن. لە بەرامبەردا، ئێران لە چوارچێوەی ئۆپەراسیۆنی "بەڵێنی راستگۆیانە 3" بە مووشەک و درۆن هێرشی کردووەتە سەر ئیسرائیل.