رووداو دیجیتاڵ
وەزیری دەرەوەی ئێران هێرشی ویلایەتە یەکگرتووەکانی ئەمریکای بۆ سەر دامەزراوە ئەتۆمییەکانی وڵاتەکەی سەرکۆنە کرد و رایگەیاند ئەم کارە "پێشێلکارییەکی مەترسیداری یاسا نێودەوڵەتییەکانە و لێکەوتەی هەمیشەیی دەبێت."
عەباس عێراقچی جەختی کردەوە کە "ویلایەتە یەکگرتووەکانی ئەمریکا، وەک ئەندامێکی هەمیشەیی لە ئەنجوومەنی ئاسایشی نەتەوە یەکگرتووەکان، بە هێرشکردنە سەر دامەزراوە ئەتۆمییە ئاشتیخوازەکانی ئێران، پێشێلکارییەکی مەترسیداری پەیماننامەی نەتەوە یەکگرتووەکان، یاسای نێودەوڵەتی و پەیماننامەی بڵاونەکردنەوەی چەکی ئەتۆمیی ئەنجامداوە."
عێراقچی هێرشەکەی بە "رەفتارێکی یەکجار مەترسیدار، یاساشکێن و تاوانکاری وەسف کرد و گوتیشی: "رووداوەکانی ئەم بەیانییە جێگەی تووڕەیی و شەرمەزارییەکی گەورەن و لێکەوتەی هەمیشەیییان دەبێت. پێویستە هەر یەکێک و هەموو ئەندامێکی نەتەوە یەکگرتووەکان هەست بە مەترسیی ئەم رەفتارە بکەن."
عێراقچی ئاماژەی بە مافی وەڵامدانەوەی وڵاتەکەی کرد و رایگەیاند: "بەپێی پەیماننامەی نەتەوە یەکگرتووەکان و ئەو بڕگانەی کە رێگە بە وەڵامدانەوەیەکی رەوا دەدەن لە چوارچێوەی بەرگری لە خۆکردندا، ئێران مافی هەموو بژاردەکان بۆ خۆی دەپارێزێت بۆ بەرگریکردن لە سەروەری، بەرژەوەندی و گەلەکەی."
کاژێر دەوروبەری 02:50 خولەکی بەرەبەیان دۆناڵد ترەمپ رایگەیاند، بە فڕۆکەی جەنگی و مووشەکەوە هێرشیان کردووەتە سەر بنکەی ئەتۆمیی فۆردۆ، نەتەنز و ئیسفەهانی ئێران.
دوای هێرشەکان، ترەمپ رایگەیاند، فۆردۆ کۆتاییهاتووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ