لە شارێکی ئێران هێرش کرایە سەر پۆلیس؛ "5 کەس کوژران"

 

 

رووداوەکە دوای نیوەڕۆی ئەمڕۆ هەینی 22-08-2025، لەسەر رێگەی خاش-ئیرانشاری سەر بە پارێزگای سیستان و بەلووچستان روویدا. پۆلیسی پارێزگاکە لە راگەیێندراوێکدا کوژرانی 5 ئەندامی بەهۆی هێرشە چەکدارییەکەوە راگەیاند.

 

بەگوێرەی راگەیێندراوەکە، ئەو پێنج ئەندامەی پۆلیس لەکاتی چاودێری و پاراستنی ناوچەکەدا لەلایەن گرووپێکی چەکدارەوە تەقەیان لێکراوە و کوژراون.

 

پۆلیسی پارێزگاکە ناوی کوژراوانی بە محەممەد رەزا رەحیمی، محەممەد نەورۆزی، حەسەن تەوەلی، غوڵامڕەزا وەحدانی و هادی رۆیایی راگەیاند.

 

هێرشکارەکان هەڵاتوون و بەڕێوەبەرایەتیی پۆلیسی سیستان و بەلووچستان دەڵێ، گەڕان بەدوایاندا بەردەوامە.

 

ناوە ناوە لەلایەن گرووپی سوننە مەزهەبی جەیشولعەدلەوە کە گرووپێکی چەکداری بەلووچەکانە لە ئێران و پێگەکانی لەنێو پاکستاندان، هێرش دەکرێتە سەر بنکەکانی پۆلیس لە ناوچەکانی سەر بە پارێزگای سیستان و بەلووچستان.

 

ئەو گرووپە 26ـی تەممووز بەرپرسیارێتی خۆیان لە هێرشێک بۆسەر باڵەخانەی دەسەڵاتی دادوەریی پارێزگاکە راگەیاند کە لە ئەنجامدا 9 کەس کوژران و 22 کەسیش بریندار بوون.