قالیباف: ئەمریکا بە ئاشکرا پەیامی گفتوگۆ دەنێرێ و بە نهێنی خەریکی داڕشتنی پلانی هێرشی زەوینییە

 

 

ئەمڕۆ یەکشەممە 29ی ئاداری 2026، محەممەد باقر قالیباف، سەرۆکی پەرلەمانی ئێران لە پەیامێکدا هێرشی تووندی کردە سەر ئەمریکا و رایگەیاند، واشنتن لیستێکی 15 خاڵی وەک مەرجی خۆی خستووەتەڕوو، بەڵام ئەمانە تەنیا "خەون و هیوان" و ئەوەی لە رێگەی جەنگەوە بۆی بەدەستنەهات، دەیەوێ لە رێگەی دیپلۆماسییەوە بەدەستی بهێنێت.

 

 

سەرۆکی پەرلەمانی ئێران ئاماژەی بەوە کرد، ئێستا جیهان شایەتی شکانی شکۆی سەربازیی ئەمریکایە و گوتی، "لە فڕۆکەی F-35ـەوە تاوەکو کەشتییە فڕۆکەهەڵگرەکان و بنکە ناوچەییەکان، هەموویان زیانی گەورەیان بەرکەوتووە."

 

قالیباف باسی لەوەش کرد کە بازاڕی وزە لە کۆنترۆڵ دەرچووە و جیهان لەبەردەم هەڵاوسانی نرخی خۆراکدایە، ئەوەش نیشانەی لاوازیی ئیدارەی ترەمپە لە بەرامبەر هاوپەیمانە ئەوروپییەکانی.

 

 

قالیباف ئاماژە بە بانگەشەکانی ئەمریکا بۆ لەنێوبردنی زۆرینەی توانا سەربازییەکانی ئێران و دۆخی تەنگەی هورمز دەکات و دەڵێت، "ئەو دووژمنەی بانگەشەی لەنێوبردنی هێزی ئاسمانی و موشەکیی ئێمەی دەکرد و پلانی رووخانی کۆماری ئیسلامی هەبوو، ئێستا گەورەترین هیوای ئەوەیە تەنگەی هورمز بە روویدا بکرێتەوە."

 

لەبارەی هێزەکانی هاوپەیمانی ئێران لە ناوچەکە، قالیباف گوتی، حیزبوڵڵای لوبنان، موقاوەمەی عێراق و ئەنسارولڵای یەمەن، ئێستا لە هەموو کاتێک بەهێزترن و "سەرسوڕهێنەری نوێ" بۆ دوژمنانیان ئامادە دەکەن.

 

 

سەرۆکی پەرلەمانی ئێران هۆشداریی تووندی دایە ئەمریکا لەبارەی هەر ئەگەرێکی هێرشی زەوینی و رایگەیاند، "هێزەکانمان چاوەڕێی هاتنی سەربازە ئەمریکییەکانن تاوەکو ئاگریان تێبەربدەن و هاوبەشە ناوچەییەکانیان بۆ تا هەتایە تەمبێ بکەن."

 

لە کۆتایی قسەکانیدا، قالیباف باسی لە یەکگرتوویی نێوخۆیی ئێران کرد و گوتی، ئەمریکا و ئیسرائیل بەو جۆرە بیریان دەکردەوە کە کۆمەڵگەی ئێران دوای جەنگ پارچە پارچە دەبێت، بەڵام "گەلی ئێران یەک جەستە و 90 ملیۆن گیانن" و زیاتر لە جاران یەکگرتوون.

 

قالیباف دڵنیایی دا کە وڵاتەکەی تەنیا بە "سەرکەوتن" لەم جەنگە گەورەیە دەچێتە دەرەوە و رێگە نادەن بەبێ چەسپاندنی دەسەڵات و پێگەی ئێران، دووژمنان لە جەنگەکە پاشەکشە بکەن.