حەشدی شەعبی: فەرماندەیەک و چەکدارێکمان لە تەلەعفەر کوژران

رۆژی چوارشەممە، 1ـی نیسانی 2026، دەستەی حەشدی شەعبی بڵاویکردەوە، یاسین محەممەد سادق، فەرماندەی فەوجی کۆماندۆی لیوای 53ـی حەشدی شەعبی، لە کاتی بوردوومانێکی ئاسمانی لە قەزای تەلەعفەر کوژرا.

 

بەپێی راگەیێندراوەکە، بارەگای لیوای 53ـی حەشد لە میحوەری ئۆپەراسیۆنەکانی نەینەوا رووبەڕووی دوو هێرشی ئاسمانی بووەتەوە، یەکەمیان لە کاژێر 17:50ـی ئێوارە و دووەمیشیان لە کاژێر 18:40ـی هەمان ئێوارە ئەنجامدراوە.

 

حەشدی شەعبی ئاماژەی بەوە کردووە، لە ئەنجامی بوردوومانەکاندا جگە لە کوژرانی فەرماندەکە، چەکدارێکی دیکەیان کوژراوە و چوار چەکداری دیکەش بریندار بوون، ئەمەش وەک ئامارێکی سەرەتایی رووداوەکە.

 

سەرچاوەیەکی ئەمنی بە رووداوی گوت : "ئەو بارەگەیەی کراوەتە ئامانج سەر بە حەشدی تورکمانیین و ئەوە یەکەمجارە لە ماوەی جەنگەکە هێرش بکرێتە سەر ئەو پێگەیە."

 

دەستەی حەشدی شەعبی لە راگەیێندراوەکەدا هێرشەکەی بە "دوژمنکارییەکی غەدر لێکراوی زایۆنی - ئەمریکی" ناوبردووە و جەختی کردووەتەوە، ئەم جۆرە هێرشانە رێگرییان لێ ناکات لە بەردەوامبوون لەسەر "رێبازی قوربانیدان لەپێناو خاک و نیشتمان."