سوودانی: رێگە نادەم ناکۆکییەکان ببنە هۆکارێک بۆ ئەوەی هاووڵاتیی باجی قورس بدات

 

 

نووسینگەری سەرۆکوەزیرانی عێراق لە راگەیێندراوێکدا دەڵێت، محەممەد شیاع سوودانی و عەلی باپیر تاوتوێی دۆسیەکانی نێوان حکومەتی فیدراڵی و حکومەتی هەرێمی کوردستانیان کردووە. 

 

بەگوێرەی راگەیێندراوەکە، لە کۆبوونەوەکە باس لە رێککەوتنەکانی پەیوەست بە شایستە داراییەکان و کاریگەریی پابەندبوون بە جێبەجێکردنیان لەسەر هاووڵاتییانی هەرێم، هەروەها گفتوگۆ سەبارەت بە گۆڕانکارییە هەرێمی و نێودەوڵەتییەکان کراوە.

 

سەرۆکوەزیرانی عێراق ئاماژەی بەوە داوە، "حکومەت لەسەر بنەمای بەرپرسیارێتی خۆی بەرامبەر بە هاووڵاتییانی لە سەرانسەری عێراقدا، هەوڵیداوە چارەسەری دەستووری و یاسایی و یاسادانانی گونجاو بۆ پرسی شایستە داراییەکان و سووککردنی باری سەرشانی هاووڵاتییانی هەرێم بدۆزێتەوە."

 

سوودانی جەختیشیکردەوە، "رێگە نادات ناکۆکییەکان ببنە هۆکارێک بۆ ئەوەی هاووڵاتی باجێکی قورس بدات، چ لە هەرێم بێت یان لە پارێزگاکانی دیکە." ئەمە بەگوێرەی راگەیێندراوەکە.

 

نووسینگەی سەرۆکوەزیرانی عێراق دەڵێت، عەلی باپیر "سوپاس و پێزانینی خۆی بۆ رۆڵی سەرۆکی ئەنجوومەنی وەزیران لە دابینکردنی مافەکانی هاووڵاتییانی هەرێمی کوردستان و پەرۆشیی بۆ بەردەوامیدانی سەقامگیری و خۆشگوزەرانی لە سەرانسەری وڵاتدا دەربڕی."