هەڵبژاردن بە ژمارە: 36 رۆژ بانگەشە، 21 ملیۆن دەنگدەر بۆ 329 کورسی

 

بەرەبەیانی ئەمڕۆ هەینی، 3ی تشرینی یەکەم بانگەشەی هەڵبژاردنی پەرلەمانی عێراق دەستیپێکرد و تاوەکو 8ی تشرینی دووەمی 2025 بەردەوام دەبێت.

 

عیماد جەمیل، سەرۆکی تیمی رۆژنامەڤانی کۆمسیۆنی باڵای سەربەخۆی هەڵبژاردنەکان بە رووداوی گوت: "بانگەشە کاژێر حەوتی بەیانیی رۆژی 8ی تشرینی دووەم کۆتایی دێت کە بەگوێرەی رێکارە یاساییەکان دەبێت 24 کاژێر بەر لە دەنگدانی تایبەت بانگەشە رابگیرێت."

 

دەنگدانی تایبەتی هەڵبژاردنی پەرلەمانی عێراق لە 9ی تشرینی دووەم دەکرێت، دوو رۆژ دواتریش دەنگدانی گشتی دەکرێت.

 

 

31 هاوپەیمانی، 38 پارت، 23 بەربژێری سەربەخۆ، 56 بەربژێری کورسیی کۆتاکان رکابەری دەکەن لە هەڵبژاردنی پەرلەمانی عێراق.

 

ژمارەی ئەو بەربژێرانەی کە رکابەری دەکەن 7768 بەربژێرن، 5520 یان پیاو و 2248یان ژنن.

 

لە پارێزگای هەولێر 108 بەربژێر رکابەری دەکەن، بۆ بەدەستهێنانی 16 کورسی پەرلەمان، چواریان کۆتاى ژن و یەک کورسیش بۆ کۆتایی کریستیانەکانە.

 

لە پارێزگای سلێمانی و هەڵەبجە پێکەوە، 136 بەربژێر هەن، رکابەری بۆ بەدەستهێنانی 18 کورسی دەکەن، کە پێنجیان کۆتای ژنن.

 

لە دهۆکیش 79 بەربژێر رکابەری دەکەن بۆ بەدەستهێنانی 12 کورسی پشکی پارێزگاکە کە سیانیان کۆتایی ژن و یەکێکیان کۆتای کریستیانە.

 

 

بەگوێرەی ئامارێک کە تۆڕی میدیایی رووداو لە کۆمسیۆنی باڵای سەربەخۆی هەڵبژاردنەکانی عێراقەوە دەستی کەوتووە، کۆی ژمارەی ئەو دەنگدەرانەی کە کارتی بایۆمەترییان هەیە و دەتوانن دەنگ بدەن 21 ملیۆن و 404 هەزار و 291 دەنگدەرن.

 

زۆرترین دەنگدەر لەسەر ئاستی عێراق لە بەغدایە، کە چوار ملیۆن و 314 هەزار و 866 دەنگدەرە و 20%ى تێکراى دەنگدەرانە لەو شارەن، کەمترین دەنگدەر لە پارێزگای موسەننایە کە 510 هەزار و 867 دەنگدەرن.

 

دەنگدەرانی سێ پارێزگاکەی هەرێمی کوردستان و هەڵەبجە سێ ملیۆن و 68 هەزار و 411 دەنگدەرن، کە 14.3%ی دەنگدەرانی عێراق دەکەن.

 

 

دهۆک: 778,846

هەولێر: 1,087,880

سلێمانی: 1,201,658

نەینەوا: 2,102,429

کەرکووک: 958,141

دیالە: 1,051,143

ئەنبار: 980,471

بابل: 1,145,458

کەربەلا: 679,556

واسیت: 787,784

سەڵاحەدین: 838,270

نەجەف: 729,070

دیوانیە: 510,867

موسەننا: 1,138,694

زیقار: 615,147

مەیسان: 1,622,855

بەسرە: 1,622,855

 

 

ژمارەی دەنگدەرانی تایبەت کە هێزە ئەمنییەکان دەگرێتەوە یەک ملیۆن و 313 هەزار و 980 دەنگدەرن، کە 6%ى تێکڕاى ئەو  کەسانەن کە دەتوانن دەنگ بدەن.  

 

زۆرترین دەنگدەری تایبەت لە بەغدایە کە 356 هەزار و 641 دەنگدەرن، پارێزگای مەیسان کەمترین دەنگدەری تایبەتی هەیە کە 42 هەزار و 369 دەنگدەرن.

 

دەنگدەرانی تایبەت لە پارێزگاکانی هەرێمی کوردستان 224 هەزار و 333 کەسن، زۆرینەیان لە هەولێرن کە 85 هەزار و 793 دەنگدەرن. تێکڕای ژمارەی دەنگدەرانی تایبەت لە سێ پارێزگاکەی هەرێمی کوردستان دەکاتە 17%ی تێکڕای دەنگدەرانی تایبەت بۆ هەڵبژاردنی پەرلەمانی عێراق.

 

26 هەزار ئاوارەى دەنگدەر 

 

بەگوێرەی ئامارەکەی کۆمسیۆن، 26 هەزار و 538 ئاوارە دەتوانن دەنگ بدەن بۆ هەڵبژاردنی پەرلەمانی عێراق، زۆرینەیان خەڵکی پارێزگای نەینەوان، کە 26 هەزار و 447 دەنگدەرن، و ئەوانی دیکە خەڵکی کەرکووک و سەلاحەددین و ئەنبارن.

 

ئەو ئاوارانەی لە هەرێمی کوردستان دەنگ دەدەن 25 هەزار و 986 یان لە دهۆک، 547 یان لە هەولێر و پێنج دەنگدەریان لە سنووری پارێزگای سلێمانی دەنگ دەدەن.

 

 

بۆ دەنگدانی گشتی 39 هەزار و 285 وێستگە دیاریکراون، کە لە هەشت هەزار و 703 بنکەی دەنگدان.

 

بۆ دەنگدانی تایبەتیش چوار هەزار و 501 وێستگەن لە 809 ناوەندی دەنگداندا.

 

دەنگدانی ئاوارەکان لە 97 وێستگە دەکرێت کە لە 27 ناوەندی دەنگدانی ناوەوە و دەوروبەری کەمپی ئاوارەکانی هەرێمی کوردستان دانراون.