هاتووچۆی عێراق گۆڕانکاریکردنی لە شێوە و رەنگی ئۆتۆمبێل قەدەخەکرد

عەقید حەیدەر شاکر، بەڕێوەبەرى راگەیاندنى بەڕێوەبەرایەتیى گشتیی هاتووچۆى عێراق بە تۆڕی میدیایی رووداوی راگەیاند، "هەر دەستکاری و گۆڕانکارییەک لە ئۆتۆمبێل یان لە شێوە یاخود لە شاسی و رەنگەکەی، بەبێ وەرگرتنی رەزامەندی ئەفسەری تۆمارکردنی ئۆتۆمبێلەکان سزای پێبژاردن و یاساییشی بەدواوە دەبێت."

عەقید حەیدەر گوتی، "هەر ئۆتۆمبێلێک پێش ئەو گۆڕانکارییانە، دەبێت ببرێتە بەڕێوەبەرایەتییەکانی تۆمارکردنی ئۆتۆمبێلەکان، دوای ئەوەی دەخرێتە ژێر پشکنینی تەکنیکی بۆ دڵنیابوون لە گونجانی لەگەڵ بنەما تەکنیکییەکان و مەرجەکانی پتەوی و سەلامەتی، ئەوکات رێگە بە گۆڕانکارییەکان دەدرێت."

بەگوێرەی دوایین ئاماری بەڕێوەبەرایەتیی گشتیی هاتووچۆی عێراق، لە بەغدا و پارێزگاکانی دیکەدا زیاتر لە 7 ملیۆن ئۆتۆمبێل تۆمارکراون.