لە کۆبوونەوەی پەرلەمانی عێراق دەنگ لەسەر 12 مادەی پڕۆژەیاسای بودجە درا و کۆبوونەوەکە بۆ کاژێر 17:00ـی رۆژی شەممە هەڵگیرا. 

 

 

مادەی 14 تایبەتە بە داهاتی نەوت، هەژماری بانکی، دەسەڵاتی خەرجکردن، کێڵگەکانی نەوتی کەرکووک و نەینەوا و پاشەکەوتی مووچەی فەرمانبەران. هەروەها لە بڕگەیەکی دیکەی مادەکەدا باس لە بەڕێوەبردنی دەروازەکان و مامەڵەی حکومەتی عێراق لەگەڵ پارێزگاکانی هەرێمی کوردستان دەکرێت.

 

پەرلەمانتارێکی عێراق لە فراکسیۆنی پارتی دیموکراتی کوردستان دەڵێت، ژمارەیەک لە ئەندامانی لیژنەی دارایی پەرلەمانی عێراق لە بڕگەی حەوتەمی مادەی 14ی پڕۆژەیاسای بودجە کێشەیان دروستکردووە و مەبەستیانە بیانوویەک بۆ بڕینی پشکی هەرێمی کوردستان بدۆزنەوە. 

 

سیپان شێروانی، پەرلەمانتاری عێراق لە فراکسیۆنی پارتی لەبارەی بوونی ناکۆکی سەبارەت بە مادەی 14ی پڕۆژەیاسای بودجە، رۆژی شەممە، 10-6-2023، بە تۆڕی میدیایی رووداوی راگەیاند، کێشەکە لەسەر بڕگەی حەوتەمی مادەی 14 دروستبووە، دوای ئەوەی رۆژی هەینی رێککەوتن لەنێوان فوئاد حوسێن وەک نوێنەری پارتی و هادی عامری وەک نوێنەری چوارچێوەی هاوئاهەنگی بۆ تێپەڕاندنی مادەی 14 کرا.

 

سیپان شێروانی راشیگەیاند، بڕگەی حەوتەمی مادەی 14 بەگوێرەی پێشنیازە نوێیەکە کە فوئاد حوسێن و هادی عامری لەسەری رێککەوتبوون، دەڵێت، "لە ئەگەری بوونی هەر کێشەیەک لەنێوان حکومەتی عێراق و حکومەتی هەرێمی کوردستان لەبارەی پابەندییە دەستوورییەکان، لیژنەیەکی هاوبەش لەنێوان هەولێر و بەغدا بۆ چارەسەرکردنی ئەم کێشەیە پێکدێت و لە ماوەی 30 رۆژدا پێشکێشی سەرۆکوەزیران دەکرێت و ئەویش بە بڕیارێک چارەسەری دەکات". 

 

سیپان شێروانی گوتی، بەشێک لە پەرلەمانتارانی شیعە بەم دەقە رازی نین و پێشنیازیان کردووە لە بڕگەی حەوتەمی مادەی 14دا بنووسرێت، ئەگەر کێشە لەنێوان حکومەتی عێراق و حکومەتی هەرێمی کوردستان روویدا، پشکی هەرێمی کوردستان لە بودجەدا دەبڕدرێت تا ئەو کاتەی کێشەکە چارەسەر دەکرێت. 

 

ئەو پەرلەمانتارەی فراکسیۆنی پارتی بە رووداوی گوت، بەهۆی ناکۆکی لەبارەی دەقی پێشنیازکراوی بڕگەی حەوتەم، دەنگدان لەسەر مادەی 14 دواخرا.

 

پەرلەمانی عێراق مادەی 12ی تایبەت بە پشکی هەرێمی کوردستانی لە بودجەدا پەسندکرد. 

 

گۆڕانکارى لە سێ بڕگەى تایبەت بە پشکى هەرێمى کوردستان دەکرێت کە تایبەتن بە پاشەکەوتى مووچە، مامەڵەى پارێزگاکان لەگەڵ حکومەتی فیدراڵیی عێراق، دەرهێنانى نەوت لە کەرکووک و نەینەوا. 

 

بەگوێرەى زانیارییەکانى تۆڕى میدیایی رووداو، گۆڕانکارى لە سێ بڕگەى تایبەت بە پشکى هەرێمى کوردستان دەکرێت کە پێشتر لەلایەن لیژنەى داراییەوە دەستکاریکراون.

 

بەگوێرەى زانیارییەکانی رووداو، بڕگەى تایبەت بە گەڕاندنەوەى پاشەکەوتى مووچە لادەبرێت.

 

لەبرى مامەڵەى حکومەتى فیدراڵیی عێراق لەگەڵ پارێزگاکانى هەرێمى کوردستانیش، سەرۆکوەزیرانى عێراق ئەو بابەتە لە رێگەى گفتوگۆکردن لەگەڵ حکومەتى هەرێمى کوردستان چارەسەر دەکات، ئەگەر ناڕەزاییەک لەوبارەییەوە هەبوو. 

 

خاڵى سێیەمیش ئەوەیە رێگرى لە دەرهێنانى نەوت لە پارێزگاکانی کەرکووک و نەینەوا ئەو کێڵگە نەوتانە نەگرێتەوە کە ئێستا حکومەتى هەرێمى کوردستان نەوتیان تێدا بەرهەم دەهێنێت. 

 

 

دوای ئەوەی محەممەد حەلبووسی، سەرۆکی پەرلەمانی عێراق دانیشتنی پەرلەمانی بۆ ماوەیەکی کاتی راگرت، جارێکی دیکە دانیشتن بۆ دەنگدان لەسەر پڕۆژەیاسای بودجەی عێراق دەستیپێکردەوە.

 

 

ئەندامێکی لیژنەی دارایی پەرلەمانی عێراق دەڵیت، "بڕگەی پاشەکەوتی مووچە لە پڕۆژەیاسای بودجە لابرا." 

 

رۆژی هەینی 9ـی حوزەیرانی 2023، جەمال کۆچەر، ئەندامی لیژنەی دارایی پەرلەمانی عێراق بە رووداوی گوت، "بە رێککەوتنی پارتی و یەکێتی بڕگەی پاشەکەوتی مووچە لابراوە." 

 

لای خۆشییەوە، سۆران عومەر، ئەندامی پەرلەمانی عێراق لە فراکسیۆنی کۆمەڵی دادگەری هەواڵەکەی پشتڕاستکردەوە. 

 

هەروەها ڤیان سەبری، سەرۆكی فراكسیۆنی پارتی لە پەرلەمانی عێراق گوتی، "بە هەموو جۆرێك لەگەڵ ئەوەین پاشەكەوتی مووچەی فەرمانبەران بدرێتەوە." 

 

 

هەڵکەوت عەزیز، پەیامنێری رووداو دەڵێت، محەممەد حەلبووسی، سەرۆکی پەرلەمانی عێراق بە شێوەیەکی کاتی دانیشتنی پەرلەمانی بۆ دەنگدان لەسەر بودجە راگرت. 

 

 

فوئاد حوسێن، سەرۆکی شاندی دانوستاندکاری پارتی دیموکراتی کوردستان لە پەرلەمانی عێراق بە رووداوی گوت: سەرقاڵی گفتوگۆین لەبارەی پڕۆژەیاسای بودجە و "ئەمشەو وابزانم لێرە دەبین."

 

لە وەڵامی هەڵکەوت عەزیز کە ئایا رێککەوتنی کۆتایی کراوە یان نا، فوئاد حوسێن گوتی، "لە گفتوگۆداین."