رووداو دیجیتاڵ
هەر یەکە لە عامر داوود و عادل محەممەد، توانییان دوو کورسیی کۆتای فەیلییەکان لە بەغدا و واست بەدەستبهێنن.
ئەمڕۆ سێشەممە، 19-12-2023، کۆمیسیۆنی سەربەخۆی هەڵبژاردنەکانی عێراق ئەنجامی بەرایی 94.4٪ـی دەنگی لایەنەکانی لە هەڵبژاردنی ئەنجوومەنی پارێزگاکانی عێراق و کەرکووک بڵاوکردەوە.
کۆمیسیۆن رایگەیاند، رێژەی بەشداریی هاووڵاتییان و هاونیشتمانییان 41٪ـە و زیاتر لە شەش ملیۆن کەس دەنگیان داوە.
بەگوێرەی ئەنجامە بەراییەکانی کۆمیسیۆن، عامر داوود ئیبراهیم شەریف، بە بەدەستهێنانی سێ هەزار و 436 دەنگ، کورسیی کۆتای فەیلییەکانی لە بەغدا مسۆگەر کرد.
کوردانی فەلیلی لە بەغدا، زیاتر لە گەڕەکەکانی کیفاح، مەدینە سەدر، جەمیلە، شەقامی فەلەستین و شێخ عومەر نیشتەجێن.
عادل محەممەد کازم فەیلی، دوو هەزار و 183 دەنگی بەدەستهێنا و توانی کورسیی کۆتای فەیلییەکان لە پارێزگای واست بۆ خۆی مسۆگەر بکات.
عادل محەممەد کازم، هەڵگری بڕوانامەی دکتۆرایە لە زمان و ئەدەبی فارسی.