رووداو دیجیتاڵ
فەرمانگەی یەکلاییکردنەوەی کاروباری دەرکراوە سیاسییەکان لە ئەمیندارێتیی گشتیی ئەنجوومەنی وەزیرانی عێراق 1555 کەسی لە دەرکراوە سیاسییەکان دامەزراند.
حەیدەر مەجید، گوتەبێژی ئەمیندارێتیی گشتیی ئەنجوومەنی وەزیرانی عێراق، ئەمڕۆ شەممە، 20-12-2025، بە تۆڕی میدیایی رووداوی راگەیاند: "بەردەوامین لە یەکلاییکردنەوەی هەموو ئەو دۆسیانەی لە وەزارەتەکان، دەستە سەربەخۆکان و پارێزگاکانەوە بۆمان دەنێردرێن."
گوتەبێژی ئەمیندارێتیی ئەنجوومەنی وەزیرانی عێراق گوتی: "ئەو دەرکراوە سیاسییانەی بڕیاری دامەزراندن دەیانگرێتەوە، بڕیارەکەیان بۆ فەرمانگەی گەنجینەی پارێزگاکان دەنێردرێ و دواتر بەپێی پێویستی بەسەر فەرمانگەکاندا دابەش دەکرێن."
حەیدەر مەجید راشیگەیاند: "ئەو کەسانەی تەمەنی یاسایی دامەزراندنیان هەیە، دوای دەرچوونی بڕیاری دامەزراندن دەست بە دەوام دەکەن و ئەوانەش کە تەمەنیان تێپەڕیوە، خانەنشین دەکرێن."
بە گوتەی حەیدەر مەجید، هەموو رۆژێکی پێنجشەممە ناوی ئەو دەرکراوە سیاسییانە بڵاودەکرێتەوە کە لە دامودەزگاکانی دەوڵەت دادەمەزرێن.
گوتەبێژی ئەمیندارێتیی ئەنجوومەنی وەزیرانی عێراق گوتی: "پێشتر پێشکێشکردنی مامەڵەی دامەزراندنی دەرکراوە سیاسییەکان راگیرابوو، بەڵام ئەم ساڵ بۆ کەسوکاری نزیکی شەهیدان کرایەوە".
یاسای ژمارە 24ـی ساڵی 2005 و هەموارەکانی تایبەتن بە دەرکراوە سیاسییەکان لە عێراق و ئامانج لێی گێڕانەوەی مافی ئەو فەرمانبەرانەیە کە لە 17-7-1968 تاوەکو 9-4-2003 بە هۆکاری سیاسی لە کارەکانیان دەرکرابوون.
![تۆم باراک [لای چەپ] و عەلی زەیدی.](https://www.rudaw.net/s3/rudaw.net/ContentFiles/958361Image1.jpg?mode=crop&quality=70&rand=1&scale=both&w=362&h=226&version=8777431 "تۆم باراک [لای چەپ] و عەلی زەیدی.")
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ