رووداو دیجیتاڵ
وەزارەتی کۆچ و کۆچبەرانى عێراق لیژنەیەک پێکدەهێنێت بۆ دۆزینەوەى پەنابەرانی فەلەستین و تۆمارکردنیان، بەرپرسێکى ئەو وەزارەتەش دەڵێت، زیاتر لە 10 هەزار فەلەستینی لە عێراق هەن.
رۆژی 22ى حویزەرانى 2023 عەلى جیهانگیر، بەڕێوەبەرى لقەکان لە وەزارەتى کۆچ و کۆچبەرانى عێراق بە تۆڕى میدیایی رووداوى راگەیاند، ئەو لیژنەیەى کە لەلایەن وەزارەتەوە پێکهێندراوە، بۆ گەڕان بەدواى ئەو پەنابەرە فەلەستینیانەیە، کە لە عێراقن تاوەکو ناویان تۆماربکەن و بەڵگەنامەى پێویستییان بۆ دەربکرێت و وردەکارییان لەبارەیانەوە هەبێت."
بەگوێرەى راگەیێندراوێکى وەزارەتى کۆچ و کۆچبەرانى عێراق کە رۆژی پێنجشەممە بڵاویکردەوە، لیژنەکە سەردانى ئەو خێزانە فەلەستینیانە دەکات بەمەبەستى پڕکردنەوەى تۆمارێکى تایبەت بەو پەنابەرانە.
عەلى جیهانگیر گوتی؛ تائێستا ژمارەى پەنابەرانی فەلەستین لە عێراق نازانرێت، کە لەدواى ساڵى 1948 چوونەتە عێراق، بەڵام بەگوێرەى ئامارە بەراییەکانیان ژمارەیان زیاتر لە 10 هەزار کەسە.
بەڕێوەبەرى لقەکان لە وەزارەتى کۆچ و کۆچبەرانى عێراق گوتیشى: "زۆرینەى پەنابەرانی فەلەستین لە بەغدا و موسڵن، بەشێکیان لە هەرێمى کوردستانن و تۆمارکردنەکە ئەوانیش دەگرێتەوە".