رووداو دیجیتاڵ
جێگری پارێزگاری نەینەوا رایدەگەیێنێت، ناوی 625 کەسی دیکە وەک وەجبەیەکی نوێ بۆ وەرگرتنی قەرەبووی زیانەکانی شەڕی داعش گەڕاوەتەوە. ئاماژە بەوەش دەکات، بڕی قەرەبووەکە لەنێوان 5 بۆ 15 ملیۆن دینار دەبێت.
رۆژی پێنجشەممە، 26-02-2026، غەزوان داوودی، جێگری پارێزگاری نەینەوا بە تۆڕی میدیایی رووداوی راگەیاند: "پرۆسەی قەرەبووکردنەوەی زیانلێکەوتووانی داعش لە نەینەوا بەردەوامە و وەجبەیەکی نوێی مامەڵەکان کە 20مین وەجبەیە، گەڕاوەتەوە."
بە گوتەی جێگری پارێزگار، ئەم وەجبە نوێیە تایبەتە بە خانەوادەی شەهیدان، بێسەروشوێنکراوان و برینداران، کە ناوی 625 کەس لەخۆدەگرێت. ئەو ناوانەش لە چوارچێوەی لیژنەی لاوەکیی یەکەم بۆ قەرەبووکردنەوەی زیانلێکەوتووان لە نەینەوا وردبینییان بۆ کراوە.
لەبارەی رێکارەکان، غەزوان داوودی گوتی: "هەر زیانمەندێک مامەڵە پێشکێش بە لیژنەی دیوانی پارێزگا بکات، ناوەکەی رەوانەی بەغدا دەکرێت بە مەبەستی وردبینیی ئەمنی و دڵنیابوونەوە لە ناسنامەی کەسەکە."
لەبارەی بڕی ئەو پارەیەی بۆ زیانلێکەوتووان خەرج دەکرێت، جێگری پارێزگاری نەینەوا روونی کردەوە، بەهۆی کێشەی بودجە و ئەو قەیرانە داراییەی عێراق پێیدا تێپەڕ دەبێت، بڕی قەرەبووەکە لەنێوان 5 ملیۆن بۆ 15 ملیۆن دینار دیاریکراوە، ئەوەش بەپێی قەبارەی ئەو زیانەی بەر هاووڵاتییەکە کەوتووە.
پڕۆسەی قەرەبووکردنەوەی زیانلێکەوتووانی شەڕی داعش لە پارێزگای نەینەوا یەکێکە لە پرسە هەڵپەسێردراوەکان، کە بەهۆی زۆریی مامەڵەکان و وردبینیی ئەمنییەوە کاتێکی زۆری خایاندووە.
رێکخراوی داعش لە حوزەیرانی 2014 شاری مووسڵی کۆنترۆڵ کرد و دواتر یەک لەسەر سێی خاکی عێراقی خستەژێر دەسەڵاتی خۆیەوە. لە ناوەڕاستی ساڵی 2017دا رزگارکردنی مووسڵ و کۆتایی رێکخراوەکە راگەیێندرا، کە بەهۆی شەڕەکەوە زیاتر لە 20 هەزار کەس کوژران، نزیکەی 40 هەزار کەس بریندار بوون و زیاتر لە 100 ملیار دۆلار زیانی ماددی بەر ناوچەکە کەوت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ