رێژەی کوردانی فەیلی لە بەغدا 150 هەزار کەس دەبن
رووداو - بەغدا
کوردە فەیلییەکان لە بەغدا، واست، نەعمانییە و ناوچەکانی دیکەی عێراق خراونەتە ژێر هەڕەشە و گوشارەوە، لە راگەیاندنی رۆژی گشتپرسی کوردستانەوە بە نامەی دەستنووس و مۆبایل هەڕەشەیان لیدەکرێ.
لە نامەکاندا پێیان گوتون دەبێ خاکی عێراق بە جێبێڵن، هەندێ نامەی دەسنووس بە گوللەوە فڕێدراونەتە حەوشەی ماڵەکان و لێیان نووسراوە، مادام کوردستان رێفراندم دەکات دەبێ ئێوەش بڕۆن ئەگەرنا دەکوژرێن.
دیوەخانی شێخ تەحسین فەیلی لە گەڕەکی کیفاح بووەتە بارەگای سەرەکی کۆبوونەوەکانی سەرۆک عەشیرەت و کەسایەتییەکانی کوردانی فەیلی بۆ گفتوگۆکردن لەبارەی گشتپرسی کوردستان و چارەنووسی کوردانی فەیلی.
بەشێکیان پشتگیری لە گشتپرسییەکەی هەرێمی کوردستان دەکەن، بەشەکەی دیکەیان دەڵێن ئێمە دژی نابین و لەگەڵیشی نین.
شێخ تەحسین فەیلی ، سەرۆک عەشیرەتی کوردانی فەیلی بە تۆڕی میدیایی رووداوی راگەیاند " ئێمە هەڕەشەی کۆچی زۆرەملێمان لەسەرە ، وەک چۆن لە رابردووشدا رووبەڕووی ئەو کۆچە زۆرە ملێیە بووینەتەوە ، شێوەی رژێمی پێشوو کەوا ماڵ و سەروەت و سامانمان دزرا، کوردانی فەیلی چاوەڕوانی چرکە ساتێک دەکەن کەوا جارێکی دیکە رووبەڕووی کۆچی زۆرە ملێ ببنەوە و دیسانەوە تەسفی حساباتی کوردانی فەیلی دەستپێبکاتەوە"
لە دیوەخانەکەی شێخ تەحسین وەکو مەرجەعێکی باڵای کوردانی فەیلی سەرۆک عەشیرەتەکان بڕیاریاندا بۆ بەرگرییکردن لە خۆیان پشت بەهیچ حیزب و لایەنێکی سیاسیی عێراقی نەبەستن و هێزێکی چەکدار کە پێکهاتبێت لە کوردانی فەیلی دروست بکەن بۆ رووبەڕووبوونەوەی هەر حاڵەتێکی نەخوازرا و کە بکرێتە سەریان.
حسێن عەلی ئەکبەر، کەسایەتی کوردی فەیلی گوتی "بێگومان بەهۆکاری بڕیاری گشتپرسییەوەیە ئێمە هەڕەشەمان لەسەرە، بۆیە لەسەرمان پێویستە میکانیزمی بەرگرییکردن لە خۆمان بگرینەبەر و لەنێو خۆماندا رێکبکەوین بۆ پێکهێنانی هێزێکی سەربازی خۆی، ئێمە پێشتریش رامانگەیاندووە ئەو هێزەی پێکی دەهێنین بەشێوەیەکی نهێنی دەبێت ژمارەی هێزەکە و فەرماندەکانیان ئاشکرا ناکەین".
بەپێی ئامارە نافەرمییەکان لە ساڵی 2003ـەوە تاوەکو ساڵی 2017 زیاتر لە 350 هەزار کورد بەغدای بەجێهێشتووە و لە ئێستا رێژەی کوردانی فەیلی لە بەغدا 150 هەزار کەس دەبن و لە ناوچەکانی کیفاح، مەدینە سەدر و شەقامی فەڵەستین نیشتەجێن.
داڕشتنەوە؛ راوچی حەسەن
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ