هەڵەیەک روویدا! دووبارە هەوڵبدە
رووداو دیجیتاڵ
هاوپەیمانێتییەکەی محەممەد شیاع سوودانى رایگەیاند، وەک گەورەترین فراکسیۆن، بە مافی خۆیانی دەزانن حکومەت پێکبهێنن و کەسێکى "بە توانا و شیاو " بۆ پۆستی سەرۆکوەزیران بەربژێر بکەن، جەختیش دەکاتەوە کە پێویستە پەیوەندییەکی ئەرێنی لەگەڵ ئەمریکا بنیات بنرێت.
رۆژی چوارشەممە 28ی کانوونی دووەمی 2026، هاوپەیمانیی ئاوەدانکردنەوە و گەشەپێدان لە راگەیێندراوێکدا ئاماژەی بەوە داوە، وەک بەشێک لە هاوپەیمانیی چوارچێوەی هاوئاهەنگی و گەورەترین فراکسیۆنی پەرلەمان، خاوەنی بەرکەوتەى دەستوورین بۆ پێکهێنانی حکومەت و بەرپرسیارێتیی ئەوانیشە ئەو کەسە بەربژێر بکەن، کە پێیانوایە بە توانا و شیاوە بۆ رووبەڕووبوونەوەی ئاڵنگارییەکان و چارەسەری قەیرانەکان.
ئەو هاوپەیمانێتییە کە لەلایەن محەممەد شیاع سوودانی، سەرۆکوەزیرانى عێراقەوە سەرۆکایەتی دەکرێت، لە هەڵبژاردنی پەرلەمانی عێراق 46 کورسی بەدەستهێناوە.
هاوپەیمانیی ئاوەدانکردنەوە و گەشەپێدان جەختی کردەوە کە پێکهێنانی حکومەت پرسێکی عێراقیی نیشتمانییە و لە ئیرادەی گەلی عێراقەوە سەرچاوەی گرتووە، ئاماژە بەوەش دەکات کە پێویستە پەیوەندییەکی ئەرێنی و هاوسەنگ بونیات بنرێت لەگەڵ وڵاتانی دۆست و هاوپەیمان بەتایبەت ئەمریکا، لەسەر بنەمای رێزگرتن لە سەروەریی نیشتمانیی یەکدى و رێکارە دەستوورییەکان.
ئەو هەڵوێستەی هاوپەیمانێتییەکەی سوودانی دوای ئەوە هات کە شەوی 17ی کانوونی دووەمی 2026، دۆناڵد ترەمپ، سەرۆکی ئەمریکا دژی گەڕانەوەی نووری مالیکی، بۆ پۆستی سەرۆکوەزیرانی عێراق هۆشداری دا و گوتی"، ئەگەر مالیکی هەڵبژێردرێتەوە، ئەوا ئەمریکا چی دیکە یارمەتیی عێراق نادات."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ