سێنتکۆم دەڵێت، "سوپای پاسدارانی ئێران و ئەو گرووپانەی کە لەژێر چەتریدان هەڕەشەن بۆ سەقامگیریی ناوچەکە و ئێمەش هەرچییەک بۆ پاراستنی ئەمریکییەکان پێویست بێت دەیکەین."

 

فەرماندەیی ناوەندیی هێزەکانی ئەمریکا - سێنتکۆم لە تۆڕی کۆمەڵایەتیی ئێکس ڤیدیۆی ساتی بەڕێکەوتنی فڕۆکەی هێزەکانی بڵاوکردەوە کە زنجیرە هێرشێکیان کردە سەر پێگەکانی گرووپە چەکدارەکان لە عێراق.

 

مایکڵ ئێریک کوریلا، فەرماندەی سێنتکۆم رایگەیاند، "سوپای پاسدارانی ئێران و میلیشیاکانی سەر بە ئەوان هەڕەشەیەکی راستەوخۆن بۆ سەر سەقامگیریی عێراق، ناوچەکە و ئەمریکییەکان."

 

سێنتکۆم لەسەر زاری فەرماندەکەی دەڵێت، "بەردەوام دەبین لە هەنگاونان و کردنی هەر شتێکی پێویست بۆ پاراستنی هاووڵاتییانمان و رووبەڕووکردنەوەی ئەوانەی هەڕەشەن بۆ سەر ئاسایشی ئێمە بە بەرپرسیارێتی."

 

 

ئەندامانی کۆنگرێسی ئەمریکا کاردانەوەی جیاوازیان بۆ هێرشەکانی شەوی هەینیی ئەمریکا بۆ نێو عێراق و سووریا هەیە کە وەک تۆڵەسەندنەوەیەک لە بەرامبەر کوژرانی سێ سەرباز ئەنجامیدان.

 

بەشێک لە ئەندامانی کۆنگرێس، لەنێویاندا، جۆنی ئێرنست-ی کۆماری پێشوازیی لە هێرشەکان کرد، بەشێکیشیان دەڵێن، هێرشەکان زۆر درەنگ کەوتن و رێگەیان بە نەیارەکانی ئەمریکادا خۆیان ئامادەبکەن و هەڵبێن. 

 

ئێرنست رۆژی هەینی گوتی: "لە کۆتاییدا، ئێران پێویستە بزانێت باجی خوێنی ئەمریکییەکان چییە."

 

هێرشەکان کەمێک پێش نیوەشەو بەکاتی هەولێر، دەستیان پێکرد. سەرۆک و وەزیری بەرگریی ئەمریکا دەڵێن، لەو هێرشانەدا پێگەکانی سوپای پاسدارانی ئێران و گرووپە چەکدارەکانی نزیک لێی، کراونەتە ئامانج.

 

بۆ خوێندنەوەی تەواوی ئەم بابەتە کلیک بکە

لەدوای گەیشتنەوەی تەرمی سێ سەربازەکەی ئەمریکا، واشنتن هێرشێکی بەرفراوانی بۆ سەر گرووپە چەکدارەکانی سەر بە سوپای پاسداران لە سووریا دەستپێکرد و یەکەم هێرشی بە لێدانی گرووپی فاتمیوون لە دێرەزوور دەستپێکرد.

 

 

گرووپێکی میلیشیایی سەر بە فەیلەقی قودسی سوپای پاسدارانە کە لە شیعەکانی ئەفغانستان پێکهاتوون و لەلایەن ئێرانەوە بۆ بەرگری لە دەسەڵاتی بەشار ئەسەد رەوانەی سووریا کراون.

 

ئەو گرووپە لە 12-05-2013 لەلایەن فەیلەقی قودسەوە لە ناوچەی زەینەبییەی سووریا جێگیرکران. دامەزرێنەری ئەوگرووپە عەلیرەزا تەوەسولییە کە ناسراوە بە ئەبوو حامید، لە 28-02-2015 لە ناوچەی تەل قەرین نزیک سنووری فەلەستین، لەگەڵ رەزا بەخشی، کە جێگری بوو، بە فڕۆکەی بێفڕۆکەوانی ئیسرائیل کرانە ئامانج و کوژران.

 

کۆتاییەکانی ساڵی 2012، عەلیرەزا تەوەسولی، کە هاووڵاتییەکی شیعەی ئەفغانە لەگەڵ هێزێکی 300 کەسی کە لە پەناخوازانی ئەفغان لە ئێران پێکهاتبوو، لەلایەن سوپای پاسدارانەوە رەوانەی سووریا کرا، سەرەتا چەکدارانی فاتمیوون لەگەڵ هێزە عێراقییەکانی سەر بە سوپای پاسداران تێکەڵکرابوون، بەڵام ساڵی 2013 ژمارەی هێزەکانیان زیادیکرد و گرووپی فاتمیوونیان وەک هێزێکی سەربەخۆ بۆ دامەزراندن. ساڵی 2015 لەلایەن سوپای پاسدارانەوە بۆ پاراستنی مەزارگەی زەینەب (نەوەی پێغەمبەری ئیسلام د.خ) و پشتیوانیکردنی هێزەکانی بەشار ئەسەد، لە ناوچەی زەینەبییە جێگیرکران.

 

 

چەکدارانی گرووپی فاتمیوون لەو ئەفغانە پەناخوازە شیعانە پێکهاتوون کە بەهۆی شەڕی نێوخۆی ئەفغانستانەوە چوونەتە ئێران. سەرەتا ژمارەی چەکدارەکانی لە 300 کەس تێنەدەپەڕی، بەڵام بە ماوەیەکی کەم ژمارەی چەکدارەکانی رووی لە هەڵکشان کرد و لە ناوچەکانی درعا، دیمەشق، تەدمیر و حەلەب جێگیرکران.

 

وەزارەتی دەرەوەی ئەفغانستان لە ساڵی 2017 رایگەیاند؛ "تاران هەژاری و بێدەرەتانی پەنابەرە ئەفغانەکانی بۆ بەرەوپێشبردنی ئامانجە تائیفی و پاوانخوازییەکانی خۆی قۆستووەتەوە، ئێمە چەندینجار داوامان لە ئێران کردووە وەکو پەنابەر هەڵسوکەوت لەگەڵ ئەفغانەکان بکات، نەک وەکو ئامرازێکی شەڕکردن، بەڵام هیچ سوودێکی نەبوو".

 

فاتمیوون لە شەڕی ئیدلب رۆڵی بەرچاوی هەبوو لە پاراستنی بەرژەوەندییەکانی بەشار ئەسەد، هاوکات لە ناوچەکانی لازقیە، خانسوور، حەما، دێرەزوور، خان تومان، مەیادین و ئەلبوکەمال شەڕیان کردووە و بەگوێرەی روانگەی سووری بۆ مافەکانی مرۆڤ، لە نێوان ساڵەکانی 2016 بۆ 2017 ئێران ژمارەی ئەو هێزەی لە سووریا گەیاندە 10 هەزار کەس.

 

 

رۆژی پێنجشەممە 24ـی کانوونی دووەمی 2019 وەزارەتی دەرەوەی ئەمەریکا رایگەیاند؛ "میلیشیاکانی گرووپی فاتمیوون لەلایەن ئێرانەوە بۆ پاراستنی رژێمی ئەسەد رەوانەی سووریا کراون، بۆیە خستماننە نێو لیستی تیرۆرەوە".

 

لە راگەیێندراوەکەی وەزارەتی دەرەوەی ئەمریکادا هاتبوو؛ "رژێمی ئێران پەنابەرە ئەفغانەکان وەکو قەڵغانێکی مرۆیی لە شەڕی سووریا بەکاردەهێنێت". هاوکات رێکخراوی چاودێریی مافی مرۆڤی جیهانی لە راپۆرتێکدا بڵاویکردبوویەوە؛ "ئێران منداڵانی 14 ساڵی ئەفغان رەوانەی سووریا دەکات بۆ ئەوەی لەپاڵ هێزەکانی بەشار ئەسەد شەڕ بکەن و ئەو کارەش لە روانگەی یاسا نێودەوڵەتییەکان وەکو تاوانی شەڕ هەژمار دەکرێت".

لۆید ئۆستن، وەزیری بەرگریی ئەمریکا رایگەیاند، بە فەرمانی جۆ بایدن، سەرۆکی وڵاتەکەی مووشەکیان ئاراستەی حەوت دامەزراوە لە سووریا و عێراق کردووە کە زیاتر لە 85 ئامانجیان تێدا بووە.

 

دەشڵێت، جۆ بایدن فەرمانیکردووە هێرشەکان بەردەوامی پێبدەن.

 

"دوای هێرشەکەی رۆژی یەکشەممەی رابردوو بۆ سەر هێزەکانی ئەمریکا و هاوپەیمانیی [نێودەوڵەتی] لە باکووری رۆژهەڵاتی ئوردن کە بووە هۆی کوژرانی سێ سەربازی ئەمریکی، بە فەرمانی سەرۆک بایدن، هێزە سەربازییەکانی ئەمریکا ئەمڕۆ هێرشی ئاسمانییان کردە سەر 7 دامەزراوە، کە زیاتر لە 85 ئامانجیان لە نێو عێراق و سووریا لە خۆگرتبوو و لە لایەن سوپای پاسدارانی ئێران و میلیشیا نزیکەکانییەوە بەکاردەهێنران بۆ هێرشکردنەسەر هێزەکانی ئەمریکا. سەرۆک فەرمانیکردووە کە هەنگاوی زیاتر بنرێت بۆ ئەوەی سوپای پاسداران و میلیشیا نزیکەکانی رووبەڕووی بەرپرسیارێتی بکرێنەوە لە بەرامبەر هێرشەکانیان بۆ سەر هێزەکانی ئەمریکا و هاوپەیمانی. ئەو هەنگاوانە لە کات و شوێنی هەڵبژێردراوی خۆمان ئاشکرا دەکرێن. ئێمە لە رۆژهەڵاتی نێوەڕاست یان هیچ شوێنێکی دیکە ململانێمان ناوێت، بەڵام من و سەرۆک هێرشەکانی سەر هێزەکانی ئەمریکا قبوول ناکەین. هەموو هەنگاوێکی پێویست دەگرینەبەر بۆ ئەوەی بەرگری لە ئەمریکا، هێزەکانمان و بەرژەوەندییەکانمان بکەین."

فەرماندەیی ناوەندیی هێزەکانی ئەمریکا، هێرشەکەی سەر سووریا و عێراق پشتڕاست دەکاتەوە و دەڵێت، "85 شوێن لەلایەن هێزەکانمان لە عێراق و سووریا کراونەتە ئامانج و 125 مووشەک تەقێندراون. هێرشەکان بۆ سەر چەند ناوچە و دامەزراوەیەکی گرنگی گرووپەکانی سەر بە سوپای پاسدارانی ئێرانە."

 

بەرەبەیانی شەممە، 3-2-2024، فەرماندەیی ناوەندیی هێزەکانی ئەمریکا – سێنتکۆم بڵاویکردەوە، "کاژێر 12:00ـی شەو (بەکاتی هەولێر) هێزەکانمان چەند هێرشێکیان لە عێراق و سووریا کردە سەر سوپای پاسدارانی ئێران و گرووپە میلیشیاکان."

 

سێنتکۆم هەروەها دەڵێت، "85 شوێن لە عێراق و سووریا کراونەتە ئامانج و چەند فڕۆکەیەکیش لە ئەمریکاوە فڕیون و 125 مووشەکیان تەقاندووە و هێرشەکان لە رێگەی ژمارەیەک فڕۆکەی بۆمبهاوێژی دوورمەوداوە کراون."

 

لەبارەی ئەو شوێنانەی کراونەتە ئامانج، سێنتکۆم رایگەیاند "ناوەندەکانی فەرمان و کۆنترۆڵی ئۆپەراسیۆنەکان، ناوەندەکانی هەواڵگری، کۆگەکانی رۆکێت، مووشەک و درۆن و دامەزراوەکانی تایبەت بە لۆجیستیی گرووپە میلیشیاکان و ئەوانەی سەر بە سوپای پاسدارانی ئێرانن کە پیلانیان بۆ هێرشەکانی دژی ئەمریکا و هێزەکانی هاوپەیمانان داڕشتبوو."

 

سەرچاوە خۆجێییەکانی سووریا باس لەوە دەکەن کە هێرشکراوەتە سەر 8 ناوچە و 6 کەس کوژراون، سێ لەو کوژراوانە سووریایی نین.

 

بەرپرسێکی ئەمریکی بە میدیای وڵاتەکەی راگەیاند، "ئەم هێرشە ئاسمانییانەی سەرەتا، هەڵمەتێکی درێژمەودان بۆ بەئامانجگرتنی هێزە بەوەکالەتەکانی ئێران لە عێراق و سووریا."