رووداو دیجیتاڵ
فەرماندەیی ئاسایشی ئێزیدخان سەرکۆنەی هێرشەکانی سەر گەڕەکە کوردنشینەکانی حەلەب دەکات و دەڵێت، ئەو لایەنانەی لەپشت هێرشەکەوەن، "هەمان ئەو گرووپانەن ساڵی 2014 جینۆسایدی ئێزدییەکانیان کرد."
فەرماندەیی ئاسایشی ئێزیدخان لە راگەیێندراوێکدا هەڵوێستی خۆی لەبارەی دۆخی گەڕەکەکانی شێخ مەقسوود و ئەشرەفییە لە حەلەب دەربڕی و رایگەیاند، ئەو پێشێلکارییانەی بەرامبەر هاووڵاتییانی مەدەنی لەو ناوچەیە دەکرێن، نیشانەی "پەیڕەوکردنی تووندوتیژی و پەراوێزخستنە."
ئاسایشی ئێزیدخان پەنجەی تۆمەت بۆ ئەو گرووپە چەکدارانە رادەکێشێت کە ئێستا لە حەلەبن و دەڵێت، "ئەوانەی لەپشت ئەم تاوانانەوەن، هەمان ئەو کەسانەن کە تاوانی کۆمەڵکوژییان دژ بە ئێزدییەکان لە ساڵی 2014 کرد."
لە بەشێکی دیکەی راگەیێندراوەکەدا هاتووە، "گۆڕینی شوێن و جوگرافیا نابێتە هۆی سڕینەوەی تاوانەکان و رزگاربوونی تاوانباران لە سزا، هۆکارە بۆ دووبارەبوونەوەی ئەم جۆرە پێشێلکارییە مەترسیدارانە."
فەرماندەییەکە داوا لە کۆمەڵگەی نێودەوڵەتی و رێکخراوەکانی مافی مرۆڤ دەکات، "بێدەنگیی خۆیان بشکێنن" و ئەرکی خۆیان بەرامبەر ئەم تاوانبارانە جێبەجێ بکەن، هەروەها کار بۆ راپێچکردنی بەرپرسانی ئەو هێرشانە بۆ بەردەم دادگە بکەن.
فەرماندەیی ئاسایشی ئێزیدخان، هێزێکی ئەمنی و پۆلیسیی خۆجێییە لە ناوچەکانی شنگال و دەوروبەری، کە دوای کۆمەڵکوژیی ئێزدییەکان لەلایەن داعشەوە لە ساڵی 2014 دامەزراوە.
راگەیێندراوەکە لە کاتێکدایە شەڕ لە هەردوو گەڕەکی شێخ مەقسوود و ئەشرەفییە بەردەوامە؛ هێزەکانی ئاسایشی ناوخۆ (ئاسایشی حەلەب) هێرشە زەوینییەکانیان تێکشکاندووە، بەڵام سوپا هەڕەشەی بۆردوومانی ئاسمانی دەکات.
بەهۆی گرژییەکانەوە زیاتر لە 140 هەزار کەس لەو دوو گەڕەکە کوردنشینە ئاوارە بوون.
.jpg&w=3840&q=75)
