ئەحمەد شەرع: پاراستنی ئاسایشی سوەیدامان بە گرووپە خۆجێییەکان سپارد

 

ئەحمەد شەرع، سەرۆککۆماری سووریا لە گوتارێکی تەلەڤیزیۆنیدا، ئیسرائیلی بەوە تۆمەتبار کرد کە لەدوای رووخانی رژێمی پێشوو، بەردەوام هەوڵی تێکدانی سەقامگیری و دروستکردنی ئاژاوە لەنێو خەڵکی سووریادا دەدات و رایگەیاند، "ئیسرائیل جارێکی دیکە هەوڵدەدات خاکی سووریا بکاتە گۆڕەپانێکی بێ کۆتایی لە پشێوی، دەیەوێت یەکڕیزیی گەلەکەمان لێکبترازێنێت و تواناکانمان بۆ پێشکەوتن لە پرۆسەی ئاوەدانکردنەوە و هەستانەوە لاواز بکات."

 

ئەحمەد شەرع گوتی، "باش دەزانین کێ هەوڵدەدات رامانکێشێتە ناو شەڕ و کێ دەیەوێت دابەشمان بکات. هەرگیز ئەو دەرفەتەیان پێنادەین گەلەکەمان بخەنە ناو شەڕێکەوە کە ئامانج لێی تەنیا پارچەپارچەکردنی نیشتمانەکەمان و پەرشکردنی هەوڵەکانمانە بەرەو ئاژاوە و وێرانکاری."

 

چەند رۆژێکە شەڕ و پێکدادان لە سوەیدای سووریا دەستی پێکردووە و تاوەکو ئێستا زیاتر لە 250 کەس کوژراون. ئیسرائیلی هاوپەیمانی دروزەکان دوێنێ باڵەخانەی وەزارەتی بەرگری و ئەرکانی سوپای سووریای بۆردوومان کرد.

 

شەرع باسی لە رووداوەکانی سوەیدا کرد، رایگەیاند، سووریا بە هەموو دامەزراوەکانییەوە هەوڵی دا کۆتایی بە شەڕی نێوخۆیی نێوان گرووپە چەکدارەکانی سوەیدا و دەوروبەری بهێنێت، بەڵام "گرووپی دەرچوو لە یاسا" دەرکەوتن کە "بەرژەوەندییە تایبەتییەکانی خۆیان خستە سەرووی بەرژەوەندیی نیشتمانەوە و تاوانیان بەرامبەر خەڵکی سڤیل ئەنجامدا."

 

بە گوتەی شەرع، دوای ئەوەی وەزارەتەکانی بەرگری و ناوخۆ هێزیان لە سوەیدا بڵاوکردەوە بۆ کۆنترۆڵکردنی دۆخەکە، "ئیسرائیل دەستیکرد بە هێرشی بەرفراوان بۆ سەر دامەزراوە مەدەنی و حکومییەکان بۆ تێکدانی ئەو هەوڵانە، ئەمەش دۆخەکەی ئاڵۆزتر کرد."

 

 

ئەحمەد شەرع بڕیاری کۆتایی حکومەتەکەی ئاشکرا کرد و گوتی: "ئێمە لەوانە نین لە شەڕ بترسین، بەڵام بەرژەوەندیی سوورییەکانمان خستە سەرووی ئاژاوە و وێرانکارییەوە. بۆیە بڕیارماندا بەرپرسیارێتیی پاراستنی ئاسایش لە سوەیدا بسپێرینە هەندێک لە گرووپە خۆجێییەکان و شێخەکان (سەرکردەکانی دروز)، ئەم بڕیارە لە تێگەیشتنی قووڵمانەوە بوو بۆ مەترسیی دۆخەکە لەسەر یەکپارچەیی نیشتمانمان."

 

شەرع پەیامێکی بۆ دروزەکانیش نارد و گوتی، "ئێوە بەشێکی رەسەنی ئەم نیشتمانەن و سووریا هەرگیز نابێتە شوێنی دابەشکاری و ئاژاوەگێڕی. پاراستنی ماف و ئازادییەکانتان لە پێشینەی کارەکانمانە و رێگە نادەین هیچ لایەنێک ئەم وێنە جوانەی فرەڕەنگیی سووریا بشێوێنێت."

 

سەرۆککۆماری سووریا بەڵێنی دا لێپرسینەوە لەو کەسانە بکرێت "دەستدرێژییان کردووەتە سەر برا درووزەکانمان" و رایگەیاند: "ئەوان لەژێر پارێزگاری و بەرپرسیارێتیی دەوڵەتدان و یاسا و دادپەروەری مافی هەمووان دەپارێزێت."