رووداو دیجیتاڵ
لە ئۆپەراسیۆنێكی هێزە ئەمنییەکانی تورکیا بە تۆمەتی سیخوڕی بۆ دەزگای هەواڵگری ئیسرائیل، هەشت کەس دەستبەسەر کران. بە بڕیاری دادگە دوو کەسیان خرانە زیندانەوە و شەش کەسەکەی دیکە بە مەرجی دادی ئازادکران.
ئۆپەراسیۆنەکە ئەمڕۆ هەینی، 5ـی نیسانی 2024، لە شاری ئیستەنبووڵ بە هاوئاهەنگیی سەرۆکایەتیی داواکاریی گشتیی ئیستەنبووڵ و بەڕێوەبەرایەتی دەزگەی هەواڵگریی میت و بەڕێوەبەرایەتیی دژە تیرۆر کرا.
عەلی یەرلیکایا وەزیری ناوخۆی تورکیا لە هەژماری تایبەتی خۆی لە تۆڕی کۆمەڵایەتی ئێکس رایگەیاند: "ئێمە بەدواداچوون دەکەین. هەرگیز رێگە بە چالاکییەکانی سیخوڕی نادەین کە بە مەبەستی تێکدانی یەکێتیی نیشتمانی و هاودەنگیمان لە سنوورەکانی وڵاتەکەماندا بکرێت".
وەزیری ناوخۆ ئاماژەی بەوەدا، ئەو تۆمەتبارانە دەستنیشان کران کە کۆبوونەوەیان لەگەڵ دەزگەی هەواڵگریی ئیسرائیل کردووە، زانیارییان لەسەر ئەو کەس و کۆمپانیایانە لە تورکیا کۆکردووەتەوە کە لەلایەن دەزگای هەواڵگریی ئیسرائیلەوە کراونەتە ئامانج، هەروەها ئەو زانیاری و بەڵگەنامانەی کە کۆیانکردونەتەوە بۆ دەزگای هەواڵگریی ئیسرائیلیان ناردووە.