40 هەزار دۆلار ژیانی محەممەدی 31 ساڵ رزگار دەکات

 

 

محەممەد تەمەنی 31 ساڵە، بەهۆی ئازار و نەخۆشییەوە بە ئەستەم دەیتوانی لە بەرپرسیار قسە بکات، داوای هاوکاری لە خێرخوازان کرد و گوتی: "ساڵێکە جگەرم لەکارکەوتووە و ئازارم زۆرە، رۆژانە تەنیا دەرزیی هەوکردنی خوێن وەردەگرم و پێویستم بە هاوکارییە."

 

هاوژینەکەی محەممەد دەڵێت، "هەر سێ منداڵەکەم هەڵگری تالاسیمیان. هاوژینەکەم جگەری ئاوساوە و ئێسکەنەرمەشی هەیە. دوو نەشتەرگەریی بۆ دانراوە، بەڵام بەهۆی کەمدەرامەتییەوە تاوەکو ئێستا نەکراوە."

 

بە گوتەی دکتۆر ئەسعەد حەسوون، پسپۆڕی نەشتەرگەری شێرپەنجە، پەنکریاس، جگەر و گورچیلە، ژیانی محەممەد لە مەترسیدایە و پێویستی بە پەلەی چاندنی جگەرە.

 

 دکتۆر ئەسعەد لە بەرپرسیار، گوتی: "پەرەسەندنی نەخۆشییەکەی، چارەسەرەکەیشی قورستر دەکات."

 

نەشتەرگەرییەکەی محەممەد لە هەولێر دەکرێت و تێچووەکەی زیاتر لە 40 هەزار دۆلارە. دکتۆر ئەسعەد، گوتی، نەشتەرگەرییەکە "بە رێژەیەکی زۆر سەرکەوتووە و دوای چوار مانگ چاودێریی پزیشکی، دۆخی زۆر ئاسایی دەبێتەوە."

 

ئەو خێزانە لە گوندی حەسارۆکان لە سنووری هەولێر نیشتەجێن. تەنیا داهاتیان مووچەیەکی کەمئەندانی محەممەدە کە بەشی دەرمان و خەرجیی هاتووچۆی هەفتانەی نەخۆشییەکەی محەممەد ناکات.