چاوی رووداو... چیرۆکی یوسف و ئەسپەکەی لە ئامەد

عیزەدین حامید؛ قورئان بە زمانی ئاماژە بۆ نابیستان دەنووسێتەوە

عیزەدین حامید، گەنجێکی دەرچووی کۆلێژی شەریعەی ئیسلامییە لە هەولێر، پڕۆژەیەکی بێوێنەی لەسەر ئاستی جیهانی ئیسلامی ئەنجامداوە، ئەویش نووسینەوەی قورئانی پیرۆزە بە زمانی ئاماژە بۆ ئەو کەسانەی نابیستن یان توانای قسەکردنیان نییە. عیزەدین کە خۆی لە خێزانێکدا گەورە بووە کە خوشک و برای نابیستی هەیە، لە منداڵییەوە زمانی ئاماژەی وەک ئامرازێک بۆ گەیاندنی پەیامی ئایینی بەکارهێناوە.

ئەم گەنجە چەندین ساڵ شەو و رۆژی خستووەتە سەر یەک بۆ ئەوەی پیت بە پیت و ئایەت بە ئایەت قورئان وەربگێڕێتە سەر زمانی ئاماژە. عیزەدین ئاماژەی بەوە کرد کە پڕۆژەکەی گەیاندووەتە مەککە و مەدینە و لەوێش پێشوازییەکی زۆری لێکراوە. تاوەکو ئێستا سێ جار ئەم قورئانە چاپکراوە و هەزاران کۆپی لێ بڵاوکراوەتەوە

چیرۆکی یوسف و ئەسپەکەی لە ئامەد

لە گوندی عەنبارێی لە ئامێدی، چیرۆکێکی کاریگەری میهرەبانی و خۆشەویستی لە نێوان باوکێک و کوڕە نڤیشکانەکەی و ئەسپێکدا هەیە. یوسف، گەنجێکی تەمەن 24 ساڵە و بەهۆی نەخۆشییەوە توانای رۆیشتنی نییە، بەڵام باوکی "شێخ موس" نەیهێشتووە ئەم نڤیشکانییەی ببێتە بەربەست لەبەردەم ژیانی کوڕەکەیدا.

شێخ موس، عەرەبانەیەکی بۆ ئەسپەکەیان دروستکردووە تاوەکو یوسف بتوانێت رۆژانە بە نێو سروشتی جوانی ناوچەکەدا بگەڕێت. ئەسپەکەیان ناو ناوە دلۆ و بووەتە هاوڕێی هەرە نزیکی یوسف و بەشێکی دانەبڕاو لە ژیانی. باوکی یوسف کە خۆی و هەموو خوشک و براکانی نابیستن، تەواوی ژیانی بۆ خزمەتی یوسف تەرخان کردووە و رۆژانە چەندین کاتژمێر بە پێ لەگەڵ ئەسپەکەدا دەڕوات تاوەکو کوڕەکەی دڵشاد بێت.


مزگەوتی موفتی؛ شوێنەوارێکی 160 ساڵە لە کۆیە بەرەو وێرانبوون دەچێت

مزگەوتی موفتی لە قەزای کۆیە، یەکێکە لە کۆنترین و ناسراوترین مزگەوتەکانی شارەکە کە مێژووەکەی بۆ ساڵی 1865ی زاینی دەگەڕێتەوە. ئەم مزگەوتە لەسەر دەستی کەسایەتیی ناوداری کۆیە "عومەری بەکر" دروست کراوە، کە بازرگانێکی دەوڵەمەندی عەشیرەتی سوورچی بووە و لەو سەردەمەدا جێگیر بووە.

ناوی مزگەوتەکە بۆ "مەلا ساڵحی موفتی" دەگەڕێتەوە، کە هاوڕێی نزیکی عومەری بەکر بووە و کراوەتە پێشنوێژی مزگەوتەکە. یەکێک لە تایبەتمەندییە دەگمەنەکانی ئەم شوێنە ئەوەیە کە گۆڕی عومەری بەکر لە نێو حەوشەی مزگەوتەکەدایە، دوای ئەوەی لەسەر داوای خۆی زەوییەکەی لە ئەوقاف کڕیوەتەوە تاوەکو لەوێ بنێژرێت. سەرەڕای گرنگییە مێژوویی و ئایینییەکەی، ئێستا بەشێکی زۆری مزگەوتەکە درزی بردووە و بەرەو رووخان دەچێت. شوێنەوارناسان و خەڵکی ناوچەکە داوا دەکەن لایەنە پەیوەندیدارەکان بە هانای ئەم میراتە مێژووییەوە بچن پێش ئەوەی بە تەواوی لەناو بچێت.

مام عەلی و شۆفرلێتەکەی؛ 57 ساڵ پاراستنی ئۆتۆمبێلێکی کلاسیک لە کەرکووک

لە گوندی حەساری گەورەی کەرکووک، مام عەلی تەمەن 78 ساڵ، خاوەنی ئۆتۆمبێلێکی شۆفرلێتی مۆدێل 1968ـە کە ماوەی 57 ساڵە بە پاک و خاوێنی پاراستوویەتی. مام عەلی ئەم ئۆتۆمبێلەی لە ساڵی 1969 لەسەر سنووری سعوودیە لە کەسێکی عەرەب کڕیوە و لەو کاتەوە تاوەکو ئێستا نەیکردووەتە ناوی کەس و وەک چاوی خۆی دەیپارێزێت.

ئەم ئۆتۆمبێلە کە لە تەواوی عێراق و هەرێمی کوردستاندا هاوشێوەی دەگمەنە، مام عەلی دەڵێت، چەندین جار کۆمپانیا و بازرگانەکان داوای کڕینیان لێکردووە و تەنانەت بڕی 30 هەزار دۆلاریشیان پێداوە، بەڵام ئەو ئامادە نییە بە هیچ نرخێک دەستبەرداری ببێت. فەهمی، کوڕی مام عەلی، ئێستا خەریکی نۆژەنکردنەوەی بزوێنەرەکەیەتی تاوەکو جارێکی دیکە بیخاتەوە کار و وەک یادگارییەکی گەورەی باوکی بۆ نەوەکانی داهاتوو بیهێڵێتەوە. مام عەلی هەموو بەیانییەک ئۆتۆمبێلەکەی ماچ دەکات و سوپاسی خودا دەکات کە ئەم هاوڕێ دێرینەی بۆ ماوەتەوە.