هەڤاڵ ئەبوبەکر، پارێزگاری سلێمانی
هەڤاڵ ئەبوبەكر: ئێستاش خۆم هەڵبژێرمەوە دەنگی زیاتر دەهێنم
لەبەرنامەی (گفتوگۆی باڵۆن) هەڤاڵ ئەبوبەكر، پارێزگاری سلێمانی دەڵێت، ئەگەر ئێستاش خۆی بەربژێر بكاتەوە دەنگی زیاتر دەهێنێت. هەڤاڵ ئەبوبەكر پارێزگاری ئێستای سلێمانی لە هەڵبژاردنی ئەنجوومەنی پارێزگاكاندا لە ساڵی 2014دا 241 هەزار و 241 دەنگی هێنا. لەبارەی بزوتنەوەی گۆڕانیش گوتی "گۆڕانیش ئەگەر رێچكەی سیاسەتكردنی خۆی بگۆڕێت دەنگی زیاتر دەهێنێتەوە".
پارێزگاری سلێمانی لە بەرنامەکەدا ئاشکرای دەكات، ئاساییە رۆژێك بزوتنەوەی گۆڕان بەجێبهێڵێ و جەختیش لەوە دەكاتەوە كە دەبێت گۆڕان خۆی نوێ بكاتەوە و دەڵێت دوای گۆڕان ناچمە نێو هیچ هێزێكی سیاسیی دیکە. پارێزگاری سلێمانی ئەوەش رووندەكاتەوە، ئەو قسەو لێدوانانەی كە دەیدات زۆرینەیان زانیارین دەشڵێت "خەڵكی وەها هەیە دوای 10 ساڵ تێیان دەگات.''
هەڤاڵ ئەبوبەکر دڵخۆشە بەوەی لە سەردەمی ئەودا سلێمانی لە زۆر بواردا گەشەی كردووە، بەگوتەی ئەو سلێمانی لە چەندین بواری وەكو خوێندەواری و تەندروستی و گەشتیاری لە پلەی یەكەمدایە. هەڤاڵ ئەبوبەكر ئاماژە بەوەش دەكات، لەماوەی دەسەڵاتداری ئەودا ئابووری چەتەگەری گواستراوەتەوە بۆ ئابووری سەوز و گرنگیدان بە كەرتی گەشتیاری.
سەبارەت بەوەی بۆچی پێش هەڵبژاردنی بە پاسكیل هاتوچۆی دەكرد، بەڵام دوای دەرچوونی وازی لە پاسكیل هێناوە هەڤاڵ ئەبوبەكر ئەوەی رەتكردەوە كە وازی لە بەكارهێنانی پاسكیل هێنابێت و گوتی "ئێستا ئەگەر لە سەرچنارەوە بچمە دەوام بە پاسكیل بە چەند كاژێرێك ناگەم، چونكە خەڵكی دەموەستێنن و وەك مافێكی خۆیان پرسیارم لێدەکەن".
لە كۆتایی قسەكانی پارێزگاری سلێمانی ئەوەی روونكردەوە خۆی كارەبای حكومەت و مۆلیدەش بەكارناهێنێ، بەڵكو سوود لە سیستەمی سۆلار وەردەگرێ بۆیە پێویستی بەكارەبای دیكە نییە.
بهشی بكه لە
