مستەفا عەلی، کاسبکار

لەم بەرنامەیەی پلان A، مستەفا عەلی قادر، گەنجێکی خەڵکی خانەقین و دانیشتووی هەولێر، میوان بوو. مستەفا، کە دەرچووی پەیمانگای کۆمپیوتەرە، لە منداڵییەوە خولیای کار و کاسبی بووە و باوەڕی بەوە نییە کە تەنیا یەک کار سەرچاوەی داهات بێت. ئەو بە درێژایی رۆژ دوو کاری جیاواز دەکات: لە بەیانیانەوە تاوەکو ئێوارە کاری گەیاندن (دلیڤەری) دەکات و لە ئێوارانیشدا لەسەر شەقام شیرینی دەفرۆشێت. بەرنامەکە بە شێوەیەکی کرداری بەدوای رۆژێکی کاری مستەفادا دەچێت و لەنێو ئۆتۆمبێلی کارەکەیەوە دەستپێدەکات و لەسەر مێزی شیرینییەکەی کۆتایی دێت.

لە بەشی یەکەمی بەرنامەکەدا، چاوان فەرەیدوون یاوەریی مستەفا دەکات و پرسیاری لێدەکات دەربارەی وردەکارییەکانی پیشەکەی. مستەفا، باسی لەو ساتە سەیر و سەمەرانە کرد کە لەکاتی کارکردنیدا رووبەڕووی دەبێتەوە. ئەو ئاماژەی بەوەدا کە زۆر جار رووبەڕووی ئاڵنگاریی وەکو شوێنی نادیار و کڕیاری سەیر دەبێتەوە، بەڵام هەمیشە بە پشوودرێژییەوە مامەڵەی کردووە. لە وەڵامی پرسیارێکدا کە ئایا هیچ کاتێک برسێتی زەفەری پێ بردووە و خواردنی کڕیارەکەی خواردووە، بە پێکەنینەوە گوتی، "دووعام کردووە داواکە کانسڵ ببێتەوە." ئەو جەختی لەوە کردەوە کە پابەندبوون بە رێنماییەکانی کۆمپانیا بنەمای کارەکەیەتی.

یەکێک لە خاڵە سەرنجڕاکێشەکانی کەسایەتیی مستەفا، رەتکردنەوەی کاری مووچەی جێگیر بوو. ئەو گوتی، "حەزم لە مووچەی جێگیر نییە،" چونکە پێی وایە کاری ئازاد و پڕۆژەی تایبەت دەرفەتی زیاتری تێدایە بۆ داهێنان و بەدەستهێنانی داهاتی زیاتر. ئەو بە تووندی باوەڕی بەو قسەیە هەیە کە دەڵێت "لە تۆ حەرەکەت، لە من بەرەکەت" هەیە و ئەمەی کردبووە دروشمی ژیانی. لە پەیامێکیدا بۆ ئەو گەنجانەی کە لە ماڵەوە دانیشتوون و چاوەڕێی دامەزراندنن، گوتی، "تاوەکو دابنیشی و هەر چاوەڕێی دامەزراندن بی، بە هیچ ناگەی." ئەو هانی گەنجانی دا کە بجووڵێن و کار بکەن، تەنانەت ئەگەر لە سەرەتاوە بچووکیش بێت.

لە بەشی کۆتایی بەرنامەکەدا، کامێراکان دەچنە سەر شەقام، ئەو شوێنەی مستەفا ئێواران مێزێکی شیرینیی لێ دادەنێت. ئەو باسی لەوە کرد کە شیرینییەکانی رۆژانە و تازەن، ئەمەش وایکردووە کە کڕیارێکی زۆری هەبێت. لەنێو قەرەباڵخیی شەقام و مامەڵەکردن لەگەڵ کڕیارەکاندا، مستەفا ئاماژەی بەوەدا کە نزای دایکی گەورەترین پشتیوانییەتی و هۆکاری سەرکەوتنیەتی. سەبارەت بە پلانی داهاتووی "پلان A"، ئەو گوتی هیچ شتێکی دیاریکراوی نییە، بەڵکو ئامادەیە هەر کارێک بکات کە بزانێت "پارەی تێدایە،“. 

پلان A، بەرنامەیەکی گەنجانەی مەیدانییە، لێکۆلینەوە دەکات لە جیاوازیی نێوان ئەو شتانەی گەنجان هیوای بۆ دەخوازن و ئەو ژیانەی تێیدان لە هەرێمی کوردستان و عێراق. هەر ئەڵقەیەک دەرفەت دەداتە گەنجێک باسی خەونەکانی بۆ داهاتوو بکات، وەکو کار، خێزان، سەقامگیری، کۆچ. پێشکێشکار گەنجان رووبەڕووی ئەو راستییانە دەکاتەوە کە هیوا و خەونەکانیان دروست دەکەن، دەبنە هۆی دواخستنی خەونەکانیان، یان هەندێکجار رێگرییان لێدەکرێت. بەرنامەکە چیرۆکی راستەقینەی ژیانی خوێندکارانی زانکۆ، فرۆشیارانی سەر شەقام، میوزیکژەنان، سەرتاش، کرێکارانی کارگەکان، خاوەنکارە گەنجەکان تۆمار دەکات.