سارا محەممەد، راهێنەری زمان

لەم بەرنامەیەی پلان A، سارا محەممەد، مامۆستا و راهێنەری زمانی ئینگلیزیی میوان بوو. سارا، کە خەڵکی هەولێرە و خاوەنی زیاتر لە سێ ساڵ ئەزموونی کارکردنە، یەکێکە لە خوێندکارە یەکەمەکانی پەیمانگا و زانکۆ. پلانی سەرەکیی ئەو بریتییە لە پەرەپێدانی بزنسەکەی لە بواری وانەگوتنەوەی ئۆنلاین و هەروەها بەدەستهێنانی بڕوانامەی ئەکادیمیی بەرزتر.

لە سەرەتای گفتوگۆکەدا، سارا باسی لە دیاردەی تێکەڵکردنی وشەی ئینگلیزی لەگەڵ زمانی کوردی کرد. بە بڕوای ئەو، ئەم بابەتە دوو لایەنی هەیە. یەکەمیان، ئەو کەسانەن کە بەهۆی پیشەکەیان یان خوێندنی بەردەوامەوە "نوقمی زمانەکە بوون" و بەکارهێنانی وشە ئینگلیزییەکان لایان شتێکی ئاساییە. لایەنی دووەم، ئەو کەسانەن کە ئاستی زمانی ئینگلیزییان باش نییە، بەڵام هەندێک وشە بەکاردەهێنن تەنیا بۆ ئەوەی خۆیان دەربخەن، کە ئەمەش بە زیادەڕۆیی دادەنرێت. ئەو جەختی لەوە کردەوە کە سەرکەوتن لە خوێندندا پەیوەست نییە بە "بەخت"، بەڵکو بەرهەمی "هەوڵ و ماندووبوونی خۆتە".

سارا محەممەد، ئاماژەی بە بزنسەکەی کرد کە وانەگوتنەوەی ئۆنلاینە و خوێندکاری لە تەمەنی 3 ساڵییەوە تاوەکو 60 ساڵی هەبووە. کۆرسەکانی ئەو بە شێوەی گرووپ و تاکەکەسی (VIP) بەڕێوەدەچن. سەبارەت بە کاریگەریی ژیریی دەستکرد (AI) لەسەر کارەکەی، سارا گوتی کە زیانی بە کارەکەی نەگەیاندووە، بەڵکو سوودێکی زۆری لێ بینیوە. ئەو پێی وایە ژیریی دەستکرد بووەتە "دەرچەیەکی زۆر باش" بۆ فێرخوازان، بەتایبەت بۆ راهێنان لەسەر قسەکردن و، پێشنیاز دەکات فێرخوازان بۆ پەرەپێدانی تواناکانیان بەکاریبهێنن.

یەکێک لە ئەزموونە سەرنجڕاکێشەکانی سارا، فێرکردنی زمانی کوردی بوو بە خوێندکارێکی فەڕەنسی. ئەو خوێندکارە دەیویست هاوسەرگیری لەگەڵ کوڕێکی کورد بکات، بۆیە حەزی دەکرد فێری ئەو دەستەواژە و رستانە ببێت کە لە ژیانی رۆژانە و لەگەڵ "ماڵی خەزووری" پێویستی پێیان دەبێت. 

پلان A، بەرنامەیەکی گەنجانەی مەیدانییە، لێکۆلینەوە دەکات لە جیاوازیی نێوان ئەو شتانەی گەنجان هیوای بۆ دەخوازن و ئەو ژیانەی تێیدان لە هەرێمی کوردستان و عێراق. هەر ئەڵقەیەک دەرفەت دەداتە گەنجێک باسی خەونەکانی بۆ داهاتوو بکات، وەکو کار، خێزان، سەقامگیری، کۆچ. پێشکێشکار گەنجان رووبەڕووی ئەو راستییانە دەکاتەوە کە هیوا و خەونەکانیان دروست دەکەن، دەبنە هۆی دواخستنی خەونەکانیان، یان هەندێکجار رێگرییان لێدەکرێت. بەرنامەکە چیرۆکی راستەقینەی ژیانی خوێندکارانی زانکۆ، فرۆشیارانی سەر شەقام، میوزیکژەنان، سەرتاش، کرێکارانی کارگەکان، خاوەنکارە گەنجەکان تۆمار دەکات.