جیهان لەسەر لێواری تەقینەوەیە؛ بەفر لە کوردستان و گەردەلوول لە دیمەشق و تاران

ململانێیەک لەنێوان سەرمای زستان و گەرمای سیاسەت

ئەم بەیانییە، لە کاتێکدا بەشێکی ناوچەکانی هەرێمی کوردستان لە ژێر بەفردان و دەوامی قوتابخانەکان پەکخراوە، نەخشەی سیاسیی ناوچەکە سەرقاڵی داڕشتنەوەیەکی خوێناوی و خێرایە. لە رۆژی هیوا جەمال تەنیا هەواڵەکان ناگێڕینەوە، بەڵکو گەشتێکی قووڵتان پێدەکەین بەنێو جەرگەی ئەو رووداوانەی بڕیار لەسەر داهاتووی رۆژهەڵاتی نێوەڕاست دەدەن.
لەم بەرنامەیەدا، پەردە لەسەر زۆر رووداو لادەدەین هەروەها ئەو "مێشکە ستراتیژییە" باس دەکەین کە سووریای دوای ئەسەد بەڕێوە دەبات.

تاران لە چاوەڕوانیدا دەکوڵێت

گەورەترین تەمومژ ئێستا لەسەر ئاسمانی ئێرانە. لە کاتێکدا هێڵەکانی ئینتەرنێت بڕدراون، ئامارەکان لە نێوان 2 هەزار بۆ 20 هەزار کوژراو دێن و دەچن. وەزارەتی دەرەوەی ئەمریکا هۆشدارییەکی "دەستبەجێ"ی بڵاوکردووەتەوە: "ئێران جێبهێڵن!". دۆناڵد ترەمپ، کە خۆی بە "سەرۆکی ئاشتی" دەناسێنێت، لە کۆشکی سپییە و چاوەڕێی دواین راپۆرتی هەواڵگرییە بۆ ئەوەی بڕیار لەسەر چارەنووسی دەسەڵاتەکەی تاران بدات. ئایا واشنتن بەرەو رووبەڕووبوونەوەی سەربازی دەچێت؟ ئێمە وردەکاریی ئەو هێزە دەریاییانەتان بۆ ئاشکرا دەکەین کە ئەمریکا لە ناوچەکەدا هەیەتی.

مێشکە تەمومژاوییەکە و یاریی سکیی ئیسرائیلییەکان لە سووریا

لە سووریا، سەردەمێکی نوێ دەستی پێکردووە، بەڵام کێ لە پشت ئەم گۆڕانکارییانەیە؟ ئەمڕۆ چیرۆکی "ئەسەعد شەیبانی"تان بۆ دەگێڕینەوە؛ ئەو پیاوەی بە پێنج ناوی جیاوازەوە گەمەی سیاسی دەکات و بە "ئەندازیاری" سووریای نوێ دادەنرێت.

لە لایەکی دیکەوە، دیمەنەکان سەرنجڕاکێشن؛ لە کاتێکدا سوپای عەرەبیی سووریا هەموو هێزی خۆی بۆ شەڕی کورد لە باکوور و رۆژهەڵاتی وڵاتەکە کۆکردووەتەوە، سەربازە ئیسرائیلییەکان لە باشووری وڵاتەکە و لەسەر لووتکەی چیاکانی حەرەموون خەریکی یاری "سکی" و مەشق و راهێنانن! ئێمە نیشانتان دەدەین چۆن سەروەریی وڵاتێک لە نێوان هێرشی زەوینیی ئیسرائیل و هەڕەشەکانی ئەحمەد شەرع-دا دابەش بووە.

ململانێی کورد و دیمەشقی نوێ

ئیلهام ئەحمەد هۆشداری دەدات: "دیمەشقی نوێ دەیەوێت بە چەک ئیرادەی خۆی بسەپێنێت". لە کاتێکدا درۆنەکانی تورکیا ئاسمانی ناوچەکە دەبەزێنن، کوردە ئاوارەکانی حەلەب لە نێوان هیوای گەڕانەوە و ترسی چەوسانەوەدا دەژین. نەتەوە یەکگرتووەکان لەسەر بێڕێزیکردن بە تەرمی شەڕڤانێکی کورد هاتە دەنگ. ئایا ئەمریکا "هێڵی سوور" بۆ پاراستنی کورد دادەنێت؟ کۆنگرێسمانەکان وەڵامی ئەم پرسیارە دەدەنەوە.

راوکردنی "رێوییە کوردەکە"

لە نێوخۆی هەرێمی کوردستان، ئۆپەراسیۆنێکی هەواڵگریی دەگمەن ئەنجامدرا. دەستگیرکردنی سەرکردەکانی مافیای "فۆکسترۆت" لە سلێمانی، کە یەکێکە لە مەترسیدارترین باندەکانی جیهان، دەریخست کە کوردستان شوێنی ئارام نییە بۆ تاوانبارانی نێودەوڵەتی. ئێمە باسی "رەوا مەجید" دەکەین، ئەو کەسەی بە "رێوییە کوردەکە" ناسراوە و چۆن تۆڕە تاوانکارییەکەی لە سویدەوە گەیشتە ناو جەرگەی کوردستان.

لە قەیرانی پۆستی سەرۆککۆمارەوە تاوەکو ترافیکی 12 ملیۆن ئۆتۆمبێل

لە بەغدا، سەرۆکایەتی کۆمار نیگەرانە لە "ناشیرینکردنی" بەربژێرەکان. هاوکات ئامارێکی سەرسووڕهێنەر بڵاوکراوەتەوە؛ 12 ملیۆن ئۆتۆمبێل لە عێراق تۆمارکراون! چۆن ژێرخانی وڵات بەرگەی ئەم قەرەباڵغییە دەگرێت؟ لەم بەرنامەیەدا باس لە هەوڵەکانی حکومەت دەکەین بۆ کۆنترۆڵکردنی نرخ و دۆلار لە رێگەی دەستگیرکردنی سەدان کەسەوە.

رێگەی ترەمپ بۆ ئاشتی

هەر لەم بەرنامەیەدا، باس لە پڕۆژە ستراتیژییەکەی ئەمریکا دەکەین بە ناوی "رێگەی ترەمپ بۆ ئاشتی" لە نێوان ئەرمینیا و ئازەربایجان؛ پڕۆژەیەک کە نەک تەنیا ئاشتی، بەڵکو کانزا دەگمەنەکانی جیهانیش بۆ ئەمریکا مسۆگەر دەکات.

کۆتایی: هەموو ڕاستییەکان لە یەک بەرنامەدا

ئەم بەیانییە نزیکەی 40 هەواڵی جیاواز و گرنگمان لابوو. لە بەفرەکەی سلێمانی و سۆرانەوە تاوەکو گەرمەی شەڕی درۆنەکان لە تەبقا و دێرحافر.

بۆ بینینی وردەکاریی کلیک لە دیمەنەکە بکە.

رۆژی هیوا جەمال

شۆیەکی 50 خولەکییە هەموو بەیانییەک کاژێر 08:00 بەشێوەی زیندوو پێشکێش دەکرێت. تێیدا گفتوگۆی پڕ زانیاری لەگەڵ کەسانێک دەکرێ کە مەرج نییە لەنێو هەواڵەکاندا ناسراوبن، بەڵام مژارەکانیان زۆر گرنگن. هەوڵدەدرێ لە رێگەی چیرۆکە کەسییەکانەوە باشتر و ئاسانتر زانیاری بگەیێندرێتە خەڵک.

لە ماوەی بەرنامەکەدا هەوڵدەدرێ وەرگر بەشی تەواوی رۆژەکە بەرچاوڕوونیی هەبێ سەبارەت بەو شتانەی لە کوردستان و ناوچەکە و جیهانیش روودەدەن. هەموو بەیانییەکیش هیوا جەمال راستی و ناڕاستیی زانیارییەک ئاشکرا دەکات کە لەنێو خەڵک دا بڵاوبوونەتەوە. 

دیوێکی جیاوازی دیکەی ئەم شۆیە، گەنگەشەی پێشکێشکارە لەنێو خەڵک و لەسەر شەقام لەسەر ئەو مژارانەی رای گشتییان بەخۆیەوە سەرقاڵ کردووە. 

ئامانجی شۆیەکە ئەوەیە وەرگری کوردستانی لە هەواڵی ساختە (فەیک نیوز) دووربخاتەوە. وابکات هەمیشە بۆ زانینی ئەوەی بڕیار وایە بەدرێژایی رۆژ و رۆژانی دواتر رووبدات بگەڕێتەوە بۆ (رۆژی هیوا جەمال).