كۆگەكان پڕن لە خۆراك و سەرۆكی ژووری بازرگانی دەڵێت، "ترستان نەبێت"
بەرهەمی كۆگاكراوی هەرێمی كوردستان بەشی چەند دەكات، كاریگەری جەنگی ئۆكراینا و رووسیا لەسەر ئاڵۆگۆڕی بازرگانی چی بووە و جەنگی رووسیا- ئۆكرینا كاریگەریی لەسەر بازاڕەكانی كوردستان دروستكردووە؟ ئایا بەرپرسانی ئیدارەی خۆراكی زیادەیان بۆ ماڵەكانی خۆیان كڕیوە؟ لەم بەرنامەیەدا وەڵامی ئەو پرسیاران دەدرێتەوە یەكێك لە میوانەكانیش دەڵێت، "پێویستە مەلای مزگەوتەكان، كڕینی خۆراك زیادە لەم دۆخەدا حەرام بكەن".
ئاوات محەممەد، قایمقامی سلێمانی ئەوەی خستەڕوو كۆگەكانی خۆراك لە سلێمانی و شارەكانی دیكەش پڕ لە خۆراك پێویستە بە دڵەڕاوكێ ناكات. گلەیی لە وەزارەتی تەندروستیش كرد بەوەی مۆڵەتی هێنانی رۆنی گەڕاندووەتەوە بۆ دیوانی وەزارەت، نەك بەڕێوەبەرایەتییە گشتییەكان، ئەو دەڵێت "لەجیاتی وەزارەت دەكرێت ئەو دەسەڵاتە بدرێتە بەڕێوەبەرە گشتییەكان، چونكە بەشێك لەو كەم رۆنەی ئێستا هەیە پەیوەندی بەو هۆكارەوە هەیە".
قایمقامی سلێمانی كۆمەڵێك ئاماری خستەڕوو و گوتی، "تەنیا لە دەروازەی باشماخ لە مانگی یەك 1769 بار و لە مانگی دوو 2200 بار و لە یەك هەفتەی مانگی سێش 375 بار خۆراك و پێداویستی هاتووەتە هەرێمی كوردستانەوە ئیدی بۆچی قەیران دروست بێت".
عەبدوڵڵا گەڵاڵی، كە وەك جووتیارێك لە بەرنامەكەدا بەشداربوو ئاماژەی بەوەدا كە ئەمساڵ لەگەڵ دواكەوتنی باران بەڵام گەنمێكی باش بەرهەمهاتووە، جەختی لەوەش كردەوە، لەگەڵ ئەوەی پێویستە مەلای مزگەوتەكان لەم دۆخەدا كڕینی خۆراك و كاڵای زیادە "حەرام" بكەن داوای لە بازرگانانیش كرد ئەو خۆراكەی بە هەرزان بۆیان هاتووە گرانی نەكەن.
سۆران عەبدولغەفوور، بەڕێوەبەری چاودێریی بازرگانیی سلێمانی وەك میوانێكی دیكەی بەرنامەكە ئەوەی خستەڕوو پێشنیازی ئەوەیان كردووە ئەم ماوەیە گومرگ لەسەر خۆراك هەڵبگرن.
شەریف رەسوول، خاوەنی كۆمپانیای سەفرە وەك میوانێكی دیكەی بەرنامەكە باسی لەوە كرد ئەو نەك كاڵا و خۆراكی گران نەكردووە، بەڵكو بەپێچەوانەوە نرخەكانیش بە رێژەیەك داشكاناوە. حاجی حەسەن رەحیم، بازرگانێكی دیكەی بەرنامەكە بوو ئەوەی خستەڕوو لە چەند رۆژی داهاتوو پێشەنگەیەكی خۆراك و كاڵا لە سلێمانی دەكرێتەوە ئەوەش وەك وەڵامدانەوەیەك بۆ ئەوەی هەندێ كەس كە دەڵێن گوایە خۆراك لە كۆگەكاندا كەمە گوتیشی، "لەو پێشەنگەیەدا بە هەزاران تۆن خۆراك دەخرێتەڕوو".
ئەم بەرنامەیە شەوی 09-03-2022 پەخش كرا و میوانەكانیش پێكهاتبوون لە:
1- ئاوات محەممەد، قایمقامی سلێمانی
2- سیروان محەممەد، سەرۆكی ژووری بازرگانی و پیشەسازی سلێمانی
3- سۆران عەبدولغەفوور، بەڕێوەبەری چاودێریی بازرگانیی سلێمانی
4- شەریف رەسوول، خاوەنی كۆمپانیای سەفرە
5- حەسەن رەحیم، بازرگان
6- محەممەد مستەفا، بازرگان
7. عەبدوڵڵا گەڵاڵی، جووتیار.
بهشی بكه لە
