پەندێكی بەناوبانگی كوردی هەیە دەڵێ "دەستی ماندوو لەسەر سكی تێرە". پەندێكی تری هاوشێوەیش هەیە دەڵێ "بدە رەنج، بخۆ گەنج". ئەگەرچی ئەم پەندە زیاتر لە چوارچێوە سادە و كۆمەڵایەتییە رۆژانەكەدا بەكاردێ و خەڵك وەك حیكمەتێكی مێژوو لەسەر زەرورەتی كاركردن و تێكۆشان بۆ گەیشتنە ئامانج بەكاری دێنن، بەڵام دەكرێ ئێمە لە بواری خەباتی سیاسیی گەلی كوردستانیش بۆ گەیشتنە ئامانجەكانی كە دروستكردنی دەوڵەتی سەربەخۆیە، بەكاری بێنین.
ئەم پەندە زۆرجار بەدرۆ دەخرێتەوە بەبەڵگەی ئەوەی زۆر كەس بەبێ رەنج و ماندوبوون شاهانە دەژین، هەیشە رەنجی فەرهاد دەدا، بەڵام تا دەمرێ سكێك تێر و حەوت سك برسییە. راستیەكەی، لۆژیكی پەندەكە سەبارەت بە پرسە سیاسییەكەی كوردیش تا ئەم ساتە ئامانجی نەپێكاوە و كورد سەرباری دەستی ماندوو و قوربانیدانی زۆری، هێشتا لەسەر سكی تێر ئۆقرەی نەگرتووە.
كورد 25 ساڵە دەوڵەتی دیفاكتۆیە و پردێكی وشكەكەڵەك بە باقیی ناوچەكانی عێراقیەوە دەبەستێتەوە كە بەزۆر راگیراوە.
لەپاش رووخانی رژێمی سەدام حوسێن و هاتنە سەر كاری حیزبە شیعە و سوننەكان، كێشەكانی نێوان هەردوولا لەباتی چارەسەر قووڵتر بوونەتەوە و رۆژ بەڕۆژ ئەو رایەڵانەیش كە هەردوولایان پێكەوە بەستووە، یەك لەدوای یەك دەشكێن و بۆشایی نێوان بەغدا و هەولێر فراوانتر و هەلی پێكەوە هەڵكردنیان لە چوارچێوەی وڵاتێكدا لاوازتر دەبێ. ئەمە لەبارێكدایە تا ئەم ساتەش كورد جگە لە سوپاس و پێزانینێكی زارەكیی نێودەوڵەتی بۆ قارەمانێتیی پێشمەرگە لە شەڕی داعشدا، هیچ گەرەنتییەكی بۆ بوونە دەوڵەت بەدەست نەهێناوە.
پاش هێرشە چەندقۆڵیەكەی ئەم دواییەی داعش بۆ سەر سەنگەرەكانی پێشمەرگە (باشیك، ناوەران، خازر و مەخموور..) سەرۆكی هەرێمی كوردستان لە كاتی بەسەركردنەوەی سەنگەرەكانی پێشمەرگە لە باشیك لە وتەیەكیدا ئاماژەی بۆ ئەوە كرد كە بەهۆی قارەمانیی پێشمەرگەوە هەموو دنیا بەچاوی رێزەوە سەیری كورد دەكەن، بارزانی گوتی: "خۆزگە گوێتان لە وەزیری بەرگریی ئەمەریكا دەبوو كە چۆن باسی قارەمانێتی پێشمەرگەی دەكرد".
ئەم قسانە راستن و ئێستا خۆڕاگری و قارەمانێتی پێشمەرگە بووەتە مایەی سەرسامیی كۆمەڵگەی نێودەوڵەتی، رۆژانە یان هەفتانە گەورە بەرپرسانی دنیا سەردانی كوردستان دەكەن و ستایشی ئەو قارەمانییە دەكەن. ئەمە بۆ هەموو كوردێك –جگە لەو كەمینەی هەوادار و هاوبیری داعشن- جێی شانازییە، بەڵام ئایا تەنیا ئەمە بۆ كورد بەسە؟ ئایا سوپاس و پێزانین و دەربڕینی سەرسامی بەتەنیا، جگە لە هەستكردنێكی راگوزەری شانازی بەخۆكردن، كە زیاتر شتێكی عاتیفییە، بەبێ بوونی پلانێك بۆ گۆڕینی ئەو دەستخۆشانەیە بۆ پرۆژەیەكی سیاسی كە كورد بە خەونی مێژوویی خۆی دەزانێ و دەیان ساڵە قوربانیی بۆ دەدات و 25 ساڵیشە بە دیفاكتۆ مومارەسەی دەكا، هیچ نرخێكی هەیە؟
ئاخر لێگەڕێ لە وڵاتانی ئەوروپا، ئەمەریكا بەو جەبەروتەی خۆی و حكومەتی عێراق بەو لاوازی و بێ هەیبەتیەی خۆی، لەكاتێكیشدا سوور دەزانێ تاكە پێكهاتە لە عێراقدا بتوانێ متمانەی پێی هەبێ كورد و كوردستانە، هێشتا ئامادە نییە تەنانەت لەو دۆخە دژوارەی شەڕی داعش كە كوردستانی پێدا تێدەپەڕێ، راستەوخۆ – نەك لە رێگەی بەغداوە- پێداویستییە جەنگیەكان بگەیەنێتە دەست حكومەتی هەرێم. ئەگەر لە بارێكی وا نائاساییدا كە كورد رۆژانە رۆڵەكانی دەكاتە قوربانیی شەڕێك كە بە قسەی خۆیان شەڕە بەنوێنەرایەتیی جیهان، تەنانەت وەك بارێكی نائاسایی-ش، هیچ جۆرە سەربەخۆییەكی رێژەیی بە كوردستان رەوا نەبینن، چۆن دەكرێ دڵمان خۆش بێ سبەی كە شەڕەكە كۆتایی هات و كاریان پێمان نەما، لەوە گەورەترمان بۆ بكەن؟َ
راستە كورد لەو شەڕەدا بەپلەی یەكەم بەرگری لە وجود و نیشتمان و كەرامەتی خۆی دەكا، بەڵام ئەوەیش روونە، بەرگرتنی كورد لە پێشڕەویی داعش و پاشەكشەپێكردنی، سەرئەنجام بەشداریكردنێكی جیددییە لە شكاندنی هێزێك كە چەندین هاوپەیمانیی نێودەوڵەتی و ئیسلامیی سی دەوڵەتی و شەست دەوڵەتی بۆ بەگژاچوونەوەی پێكهێنراون، بۆیە دەبێ بارتەقای ئەو بەشداریكردنە گەورەیە پاداشتی گەورە بكرێ و تەنیا بە سوپاس و سەرسامیەك بەڕێی نەكەن.
زۆر جار كە باسی ئەو سەرسامیەی بەرپرسانی دەوڵەتان بە پێشمەرگە و شەڕڤانی كورد دەبیستم، لەپاڵ هەستێكی شانازی بەخۆكردن، ترس و بەدگومانییەك سەر دڵم دەگرێت و لەخۆم دەپرسم: تۆ بڵێی پاداشتی ئەو هەموو قوربانیدانەی كوردستان و شەهیدبوونی رۆڵە جوانەكانی لەو شەڕە نەگریسەدا، هەر سوپاس بێ و سبەی سفر هیچ بەدەست بەڕێمان بكەن.
كورد رێك سەدەیەك لەمەوبەر هەمان ئەزموونی لەگەڵ كەمال ئەتاتورك هەبووە كە خۆی ناونابوو غازی (واتە موجاهید). ئەتاتورك بەناوی غەزاوە كوردی فریودا و شەڕی سەربەخۆیی توركیای پێ كردن، بەڵام پاش بڕانەوەی جەنگ و بەدەستهێنانی سەربەخۆیی، لەجیاتیی پاداشتكردن و كردنیان بەشەریكە بەشی سەركەوتنەكان، نكوڵی لە بوونیان كرد و وا سەت ساڵە كورد خەبات بۆ بەدەستهێنانەوەی ئەو بوونە دەكا.
هەرێمی كوردستان تا رادەیەكی زۆر لە خەم رەخسیوە و قۆناغی نكوڵیكردن لە بوون و مەترسیی لەناوچوونی تێپەڕاندووە، بەڵام تا نەبێتە خاوەن قەوارەی سەربەخۆی خۆی، لە ئاگرەسوورە بەدوور نابێ و دەكرێ لە هەر پەرەسەندنێكی هەڵتۆقیودا –هاوشێوەی هەڵتۆقینی داعش- ریسەكەی ببێتەوە بە خوری، بۆیە گرنگە سەركردایەتی سیاسیی كورد ئەم قۆناغی "سوپاس و سەرسامی"یە لەڕووی دیپلۆماسییەوە ژیرانە و زیرەكانە بۆ مسۆگەركردنی ئایندەی ئەزموونی كوردستان تەوزیف بكەن.
ئەگەر ئەم دۆخەی ئێستا كورد بە دەوڵەتی سەربەخۆ نەگەیەنێ، پێموایە ئیتر ئەستەمە بتوانین بەئومێدیەوە بژین.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ