گۆڕان و بادینان؛ ئاوڕێك بۆ دواوە

هەر لەسەرەتاوە گۆڕان وەك كاردانەوەیەكی جەماوەری لەدژی نۆرمی سەپێنراو هاتە كایەوەو بانگەشەی دیموكراسی و شەفافییەت و یەكسانی و سەروەری یاسای كرد. گۆڕان دەریخست كە قوتابخانە سیاسییە كۆنەكان زیانی  زۆریان لە كوردو كوردستان داوە. هەروەها دەریخست كە سیاسەتمەدارانی كورد لە ناو مێژووەكەیاندا  قەتیس ماون و توانای نەخشەكێشانی دوارۆژیان نەماوە. گۆڕان بانگەوازی "دروستكردنی نەتەوە"یان كرد و واقیعی شێوە ئەمارەتنشینیی زۆنی سەوزو زۆنی زەردی رەتكردەوە.

گۆڕان و بەڵێنی كۆمەڵایەتی

ئەم بانگەشە ئازایانە زۆر لە نەوەكانی كوردستانی ووروژاندو هێناینیە سەر جادە. بەتایبەتی  لە رووبەڕووی ئەو كەسایەتییە مەزنانەی  كە حوكمی  كوردستانیان ئەكرد، وەك بەرێزان جەلال تالەبانی و مەسعود بارزانی، بە تایبەتیش كە یەكێكیان میراتگری گەورەپیاوێكی وەك مەلا مستەفای بارزانییە. چارەنووسی مێژوویی كوردستان لەچوار دەیەی رابوردوودا لەنێوان ئەم دوو كەسایەتییە مێژووییەدا بڕیاریان  لێ دراوە. ئەم دوو زاتە نەك هەر ژیانی سیاسیی، كۆمەڵایەتیی و ئابووریی كوردستانیان قوڕخ كردووە، بگرە بەموڵكی خۆیانی دەزانن.

بۆیە كاتێ كە پیاوێك، كە جگە لە ناوو مێژووی خۆی، چەند قەڵەمێك و كەنالێكی سەتەڵایتەوە هیچی تری نەبوو، هاتو توانی  بەڕە لەژێر پێیان رابكێشێ و تەرازووی هێزەكان بە شێوەیەكی دراماتیكی وا بشێوێنێ كە یەكێك لەو دوو زلهێزانە بخاتە پلەی سێیەمەوەو هەروەها ببێتە ئەلتەرنەتیڤێكی جیددی بۆ لایەنە دەسەڵاتدارەكان لەرێگای بانگەشەی شێوازێكی باشتر لە حوكمڕانی كردن، ئەمە كارێكی بێ هاوتایە لە مێژووی سیاسیی رۆژهەڵاتی ناوەڕاست. بگرە نمونەی وا تەنانەت لە دنیاش كەمن  كە بزووتنەوەیەك لە سەرەتای سەرهەڵدانی دا  گۆڕانكارییەكی وا بهێنێتە كایەوە بەبێ خوێنرێژی. دەبێ ئەوەش بووترێ كە قەبوڵ كردنی ئەم گۆڕانكارییە خالێكی گەش بۆ لایەنی دەسەڵاتیش دادەندرێت كە بە توندوتیژی نەچوونەوە بەگژیا.

نهێنی  ئەو سەركەوتنە تەنها بۆ حیكمەت و كارێزمای سەركردەی ئەم بزووتنەوەیە، بەڕێز نەوشیروان مستەفا، وە بۆ پێنگاڤە زیرەك و لێكدانەوە  وردەكانی  ناگەڕێتەوە، بەڵكو بەشێكی  زۆریشی بۆ بەپیرەوە هاتن و بەرگریی ئەو خەڵكە دەگەڕێتەوە كە لەدەروی بزووتنەوەكە ئاڵان و  گیانیان وەبەرهێنا.

گۆڕان توانی سەركەوتووانە عەقدێك لەگەڵ خەڵكی كوردستاندا بسازێنێ؛  "بڕوای خۆت بە من ببەخشەو منیش ئەتگەینمە حكومڕەوانیی رەوا". بە  هەزاران  كەس  لە ٢٠٠٩ ئەو بەڵێنەیان بەجێگەیاندو رووبەڕووی تاكتیكی داپلۆسێنەرانەی  هەردوو حیزبی دەسەڵاتدار وەستانەوە.  لەكاتێكدا لەژێر گەفی  نانبڕین و بگرەوبكوژەشدا بوون.

لە ساڵی ٢٠٠٩دا من بەچاوی خۆم ئەو ئازایەتییەی خەڵكیم بینی لە دهۆك كە سەرپرشتیاری هەڵمەتی هەڵبژاردنی بزووتنەوەی گۆڕان بوم لەوێ. بینیم چۆن ئەم گەنجانە بەرەو بارەگاكانمان دەهاتن و بە حەماسێكی زۆرەوە ئاڵای گۆڕانیان هەلدەگرت و لە شەقامەكانی دهۆك و زاخۆدا دەیانگێڕا. ئەم كارە رەنگە زۆر ئاسایی بێ لە سلێمانی، بگرە شتێكی وا گرنگ و بەرچاو نییە. بەڵام لە دهۆك، لە ناو جەرگەی كونترۆڵی دەزگاكانی پارتی و رێكخستنی تایبەت و پاراستن و تەنانەت ئاسایشی حكومەتیشەوە، ئەمانە كردەوەی ئازایانەن. چونكە ئەوان ئەم كارانەیان بە "خیانەت" لەقەڵەم دەدا. چۆن بادینییەك پشتگیری سۆرانێكی خەڵكی سلێمانی بكات كە رەخنە لە ماڵی بارزان دەگرێ؟ لەو دەڤەرەداو لەو كاتەدا، پێم وایە تا ئێستاش، ئەم كارە بە "خیانەتی گەورە لەبادینان" لەقەڵەم دەدرێ.

بەڵام خەڵكەكە جارێكی دیكە  لە ساڵی ٢٠١٠ و ٢٠١٣دا ئەم كارەیان دووپات كردەوە.  خەڵكی ئەم كارەیان كردەوە هەرچەندە دەیانبینی كە هەزارانیان نانبڕاو ئەكران و كاروتیجارەتیان نەدەما، كە زۆریان ژیاریان لەدەست دەداو تەنانەت هەندێكیشیان لە هێزی پێشمەرگە دەردەكران. خەڵك  لە دهۆك و هەولێریش ئەو خۆڕاگریەیان كردوە سەرەڕای ئەوەی دەزگا زەبەللاحەكانی ئەو دوو پارتە فەرمانڕەوایە وایان ئێمە دەناساند  كە ئێمە كۆمەڵێك كەللە رەقی خۆبەشتزانی زدی-دینی رق-لە-بادینی و رق-لە-هەولێرین و "سلێمانچی"تی دەكەین و  لەرێگەی كەڵەگاییەوە دەمانەوێ بێینە سەر حوكم.

ئەو بەڵێنە بوو بە سۆزێك، كۆنتڕاكتێكی كۆمەڵایەتی لە نێوان  گۆڕان و خەڵكی كوردستان كە خەڵكی پشتگیری گۆڕان بكەن، لە بەرامبەر بە داپڵۆسینی پارتە فەرمانرەواكانیشدا بێت، وە گۆڕانیش پەیمانی بەگەیاندنی ئەو خەڵكە بەو ئاقارەی  بەڵینیان دا بەرامبەر بەو دەنگانەی خەڵك. ئەم كۆنتراكتە ئێستاش هەر بەرقەرارە، بگرە لەم نزیكانەدا تازەكرایەوە. لە كاتێكدا تازە كرایەوە كە ئەو دوو پارتە فەرمانرەوایە بە لۆری دۆلاریان خەرج دەكرد لەپێناوی شكاندنی.  تەنانەت خەڵك چاوپۆشی لەوەش دەكرد كە  نوێنەرانی بزووتنەوەكە لە هەردوو پەرلەمانی عیراق و كوردستاندا زور سەركەوتوو نەبوون لەگۆڕینی سیاسەت و یاساكانی ئەم وڵاتەو كۆنتراكتەكەی تازەكردەوە. تەنانەت كە ناوماڵی گۆڕان هەندێ جار بە پەرپووتی دەهاتە بەرچاویان، هەر تازەیان كردەوە. تەنانەت كە هەڵبژاردنی هەندێ لە نمایندەو كاندیدەكانی گۆڕان ئەبوونە مایەی سەرنج و رەخنەشیان، هەر تازەیان كردەوە. ئەو كۆنتراكتە لە هەموو كوردستاندا تازەكرایەوە، نەك هەر لە سلێمانی، چونكە نزیكەی ١ لە ٣ ئەو دەنگانەی بۆ گۆڕان چوون لە "ناوچەی زەرد"ەوە هاتبوون.

بەڵام دەرسی مێژوو، بەتایبەتی دەرسی هەڵبژاردنی ئەم دوایەش، وامان فێردەكات  كە ئەم دەنگانە بە دەنگی مسۆگەری خۆمان نەزانین.  ئەم دەنگانە لەپێناوی تاقە ناوێك، یان بۆ دەسكەوتێك، یان دەستكەوتی عەشیرەتێكی دیاریكراودا نەدراوون. ئەو دەنگانە بۆ ئەوە دراوون تا بگەینە ئەو ئاقارەی بەڵینمان بە خەڵك دابوو؛ بۆ كۆمەڵگایەكی دادوەر، بۆ ئیدارەیەكی بێ گەندەڵی، بۆ یەكسانی بۆ هەمووان و بۆ سەروەری یاسا. گۆڕان هێشتا ئەم بەڵێنانەی بەجێ نەهێناوە.

گۆڕان و بادینان

گۆڕان هەرگیز ئیدئعای ئەوەی نەكردووە كە لە یەكێتیی جیا بووبێتەوە.  هەرگیز نەیوتووە  كە ئەوان خاوەنی راستەقینەی رێبازی ئەو حیزبەن، وەكو هەموو ئەو گروپانەی لە حیزبی تر جیا دەبنەوە ئیدیعا دەكەن. بگرە ناوێكی جیاوازیان بۆ خۆ دانا، ستراكتۆرێكی جیاوازیان بەخۆوە گرت، شێوازێكی نوێی كاركردنیان پەیڕەوكرد، تەنانەت رەنگ و ئاڵای جیاوازیان بۆ خۆ هەڵبژارد. لەگەڵ ئەوەشدا تەنها لەو شوێنانەی كە یەكێتیی بەهێزبوو گۆڕان گەشایەوەو لەو دەڤەرانەی كە یەكێتیی لاواز بوو ئێمەش بە لاوازی ماینەوە. لەبەر چەند هۆیەك هەموو لایەنێك گۆڕانیان بە ئینشیقاقێكی یەكێتیی لەقەڵەم دا و هەرواش لەگەڵیدا جوڵانەوە، تا ئەو رادەیەی كە مەترسیی ئەوە هەیە كە گۆڕان ببێتە درێژ بوونەوەی كلتوری یەكێتی، ئەگەر ئەو مەترسییە تائێستا نەهاتبێتەدی. ئەوەی دیارە گۆڕان بووبە میراتگری زۆری كێشەكانی یەكێتیی )بەداخەوە میراتگری سامان و هێزەكانی نا( لەوانەش ئەستەمیی كاركردنی لە بادینان.

كە ئێمە یەكەمین جار چووین بۆ دهۆك لە ساڵی ٢٠٠٩  پشتگیرییەكی ئەوتۆمان نەبوو. لە بەرامبەردا یەكێتی شەش مەڵبەندو دەیان كۆمیتەو سەدان كەرت و هەزاران ئەندامی رێكخراوی هەبوو. ئەمە جگە لە سەدان پۆستی حیزبی و حكومی و دەستكەوتی ماددی لەبەردەستدا بوو كە بیبەخشێتە دەنگدەرانیان. لە ساڵی ٢٠٠٥ دا یەكێتیی لە هەلبژاردنەكانی ئەنجومەنی پارێزگاكان لە دهۆك ١٧٠٠٠ دەنگی هێنا. كە گۆڕان هات لە ساڵی ٢٠٠٩ دا، بەبێ هیچ شتێك جگە لەو بەڵێنەی هەیبوو، سەرەڕای تەزویرێكی زۆرەوە، توانی ١٥٠٠٠ دەنگ بێنێ و تەنانەت لە ٢٠١٠  بۆ ٢٢٠٠٠ دەنگ زیادی كرد. بەڵام ئەم دەنگانە لە ٢٠١٣ دا بۆ ١٢٠٠٠ دەنگ دابەزین.

ئەم دەنگدابەزینەی گۆڕان لە دهۆك بەپێچەوانی ئەو تەووژمەی دەنگ زیاد كردنەی بوو  لە هەولێر و سلێمانی . لەوە دەچی كە ئەم ئەنجامە سەركردایەتیی گۆڕانی تووشی شۆك كردبێ، هەربۆیەش لەم دواییەدا بڕیاری داوە كە لە پارێزگای دهۆك بۆ هەڵبژاردنی ئەنجومەنی پارێزگا كانكاندیدی نەبێ. لەڕاستیدابەڕێز بابەكر دڕەیی، ئەندامی جڤاتی نیشتمانی گۆڕان، )سەرنج بدەن كە جڤات ووشەیەكی بادینییە(  لە چاوپێكەوتنێك لە تەلەفزیۆنی رووداو لە ٢٠١٣/١١/٤دا ووتی ئەوان "دەستیان شووشتووە" لە ناوچەكە. تەنانەت  دەستەواژەی وەكو "كات بەفیڕۆدان" و "كاری بێ هوودە"ی بەكار دەهێنا لە شیكردنەوەیدا دەربارەی نەبوونی ستراتیژێك بو ئەو ناوچەیە لەلایەن بزووتنەوەی گۆڕانەوە.

لە وڵامی پرسیارێك دەبارەی كەمیی پشتگیری بۆ گۆڕان لە ناوچەكەو شكستیان لە پەیوەندی كردن بە خەڵكی ناوچەكەوە بەرێز درەیی ووتی "مەوزووعەكە علاقەی هەیە بە تەركیبەی خەڵكەكەوە، بەشێكی، و بەشێكی علاقەی هەیە بە نفووزی پارتی بەو شێوازەی كە خۆی هەیەتی لەوێ وە رەنگە علاقەشی بەوەوە هەبێ كە نوخبەی موسەققەف و سیاسیی  ناوچەكە ئێستاش بەڕووی گۆڕانەوە نەكراوەتەوە.”

ئەم قسانەی ئەم برادەرەم قسەكانی سەرانی یەكێتیی بیر خستمەوە كە دەربارەی ئەو شكستەیان لە هەڵبژاردنەكاندا ئەیانكردو گلەییان لە داروبەرد ئەكرد جگە لەخودی خۆیان نەبێت لەم مەسەلەیەدا. لەراستیدا شكستی گۆڕان لە دهۆك كاردانەوەیەكی راستەوخۆی سیاسەتەكەیانە كە نەیانتوانی لەگەڵ  خەڵكی ناوچەكە تێكەڵ بن و بیروبۆچوونیان هەڵێنجن.  لەوە ناچێ كە گۆڕان كاتێكی وای تەرخان كردبێ بۆ تێگەیشتنی باری كۆمەڵایەتی، سیاسی و ئابووری دهۆك، یاخود بۆ ئەوەی كێشەكانی خەلكی دهۆك تێبگەن و لەبیركردنەوەیان وورد ببنەوە. بۆ نمونە، گۆڕان بۆ ماوەیەك برادەرێكی خەڵكی سلێمانی بە لێپرسراوی رێكخستنەكانیان لە دهۆك  دانا.  بێگومان لەحاڵەتی ئاساییدا هیچ كێشەیەك لەو بڕیارەدا نییە. بەڵام كە ووردەكارییەكانی ئاڵۆزیی بارودۆخی دهۆك و پەیوەندییە "مێژووییەكانی" گۆڕان و دەڤەرەكە رەچاو دەكەیت، تێگەیشتنی ئەم كارە ئەستەم دەبێ.  هەرچەندە ئەو برادەرە لەخۆبووردوو، كاراو بەتواناش بوو لە ئەركەكانی، ئەوە ئەمەی نەگۆڕی كە ئەم هەنگاوە پەیامێكی خەراپ بدات بە خەڵكی ناوچەكە. هەمان شت بۆ هەڵبژاردنی تەنها یەك بادینی لە ریزی جڤاتەكەیدا كە لە ٣٠ ئەندام زیاتر پێكدێ. ئەم هەنگاوانەی گۆڕان بوون بەوەرەقە لەدەستی نەیارانی و باسی لێوە دەكرا كە وەك نمونەیەكی رەنگدانەوەی دیدو هەڵسەنگاندنی گۆڕان بۆ خەڵكی ناوچەكە تەماشا دەكران. بۆیە چاوەڕوان نەكراو نەبوو كە ئەوانیش پشتیان لە گۆڕان كردو لە سەر سندوقی دەنگدان سزایان دان. خەلكی بادینان وایان دەهاتە بەرچاو كە مەبەستی گۆڕان لە ناوچەكە لەوە تێناپەڕی كە لە كاتی هەڵبژاردندا  دەنگەكانیان بەوان زیادبكەن .

ئەگەر گۆڕان نەچیتە ناو مەیدانەوە بۆ هەڵبژاردنەكانی پارێزگاكان لە بادینان، ئەوە دەبێتە هەڵەیەكی ستراتیژی گەورە كە نەك هەر گۆڕان زەرەرمەند دەبێ بگرە هەموو خەڵكی دەڤەرەكە. ئەوە دەبێتە مەیدان چۆڵ كردنێك كە تەنها لە قازانجی حیزبی دەسەڵاتداری ناوچەكە دەبێ. جگە لەوەش ئەوە دەرگا ئاواڵە دەكات بۆ هەركەسێك، رەنگە بە بشگیری و ئاسانكاری دەزگاكانی پارتییەوەش، كە بێت و هەوڵ بدات ئەو بۆشاییە پر بكاتەوەو تەنانەت بە ناوێكی نزیك لە ناوی گۆڕانەوە لیستێك دابەزێنێ و ئەو دەنگانەی ماویشن رابكێشێ.

گۆڕان و سلێمانی

ئەوەی جێگەی نیگەرانییەكی زیاتریشە بۆ منێكی بادینی، كە ئاڵای گۆڕانی بردە دهۆك و داوای لە خەڵكی ئەوێ كرد لەدەوریا بئاڵێن  و بە هەزارانیش ئەو كارەیان كرد، ستراتیژی گۆڕانە  بۆ  بەدەستهێنانی دەسەڵات لە سلێمانی.

ماوەیەك لەمەوپێش كومیسیۆنی باڵای هەڵبژاردن بڕیاری داكە هەڵبژاردنی ئەنجومەنی پارێزگاكانی كوردستان كە لە ساڵی ٢٠٠٥ دا هەڵبژێردرابوون، كە  بڕیاربو لە ٢١ی تشرینی دووەمدا ئەنجام بدرێن، دوابخرێن.  ئەمە شەشەمین جارە ئەم هەڵبژاردنانە دوابخرێن، بێ گومان هەمدیس بە دەسیسەی حیزبە دەسەڵاتدارەكان. وەك پەرچەكردارێك گوایە سەركردایەتی گۆڕان، نیازی ئەوەی هەیە  مەسەلەی حكومڕانی سلێمانی بهێنێتە پێشەوە بۆ ئەوەی بەلایەنی كەمەوە لەگەڵ یەكێتییدا بەهاوبەشیی بیكەن و مەسەلەی گۆڕینی پارێزگاریان كردووە بە سەنگی مەحەك. تەنانەت لەم كۆبوونەوانەی ئەم دواییەی لەگەڵ هەدوو جێگرەكی سكرتێری گشتیی یەكێتیی و سەرۆكی هەرێم و سەرۆكوەزیراندا، رێكخەری گشتیی بزووتنەوەكە ئەم مەسەلەی خستۆتە سەر ئەجینداكەو باسی لێوە كردووە.

خونیایە كە هەموو هێزەكانی كوردستان هۆشدارن لە توانای گۆڕان لە بەرپاكردنی  شلۆقییەكی جیددی لەو پارێزگایەدا، ئەگەر ئارەزوو بكەن. وە رەنگە ئەو ئارەزووە بێت و بەهێزتر بێ ئەگەر یەكێتیی بەردەوام بێ لە تاكرەوییەكەیدا لە بەڕێوەبردنی  شاری سلێمانی.

ئەوەی راستی بێ سكاڵاكانی گۆڕان  لە جێگەی خۆیدان دەربارەی حوكم كردنی تاكڕەوانەی پارێزگای سلێمانی لەلایەن حزبێكەوە كە لە هەلبژاردنی ئەم دواییەدا تەنها ٢٩٪ دەنگەكانی پارێزگاكەی هێناوە.  ئەم حاڵەتە نزیكە لە دیكتاتۆرییەت. لەراستیدا دواخستنی ئەم هەڵبژاردنانە لەلایەن دوو حیزبە فەرمانرەواكەی كوردستانەوە مایەی ئابڕووچوونەو پێشێلكردنێكی زەقی یاسایەو رەچاونەكردنی ئیرادەی خەڵكە، چۆنكە ئەم ئەنجومەنە لە ٢٠٠٥ دا بۆ ماوەی ٤ ساڵ هەڵبژێردرا. ئەوا ٤ ساڵی تریشی بەسەردا چووەو هەێشتا ئەو هەڵبژاردنە نەكراوەتەوە، بۆیە ئەم ئەنجومەنە ماوەی خۆی تێپەركردووەو  شەرعییەتی نەماوە. بەڵام ئەگەر ئەمە راست بێ لە سلێمانی، بەهەمان شێوە ئەمە راستە لە هەولێرو دهۆكیش. هەڵوێستی سووڕی گۆڕان لەسەر مەسەلی فەرمانرەوایەتی ناوچەیی لە سلێمانی زور پێچەوانەی هەڵوێستی "دەست شوشتن" ە لە دهۆك دەربارەی هەمان مەسەلە. ئەمە كاری بەوە نییە كە گۆڕان دەنكی كەم هێناوە لە دهۆك یان نا، یاخود خەڵكەكەی ساردوسڕ بووبن بەرامبەر بە پەیامەكەی گۆڕان. ئەمە مەسەلی پرنسیپە. ئەگینا ئەمە دەبێتە بانێك و دوو هەوا.

ئەوەی قوڕەكە خەستتر ئەكاتەوە ئەو دەنگانەن كە هەندێ لەو نووسەر و رۆشنبیرانەی دەوری  گۆڕانیان گرتووە بەرزی دەكەنەوە دەربارەی "بەپەراوێز كردنی سلێمانی" و ماوەنەدان بە "حكومەتكردنی سلێمانی لەلایەن پارتیەوە لەرێگای یەكێتیی". هەندێكیشیان بەئاشكرا باسی هەڵوەشاندنەوەی هەرێمی فیدراڵی كوردستان دەكەن بە جیاكردنەوەی سلێمانی لە دوو پارێزگاكەی تر. ئەگەر ئەم دەنگانە ببنە سیاسەتی گۆڕان ئیدی ئەوە چیتر نابێتە "چاككردنەوەی ماڵی كوردی" بگرە ئەبێتە مایەی تێكدان و رماندنی ئەو ماڵە. ئەمەش بەپێچەوانەی ئەو بەڵینانەی گۆڕان دەبن و دەچنە قاڵبی چەواشەكردنی ئەو كۆنتراكتەوە كە لەگەڵ خەڵكی كوردستان بەستوویەتی.

ئەم سیاسەتە دووفاقیە دژبەیەكەی دهۆك و سلێمانی، ئەگەر گۆڕان پەسەندی كردن، مەترسیی ئەوەی لێدەكەوێتەوە كە بزووتنەوەكە بگۆڕێ لە حیزبێكی نیشتمانیی خاوەن پرۆگرامی نەتەوەیی كە بۆ خزمەتكردنی نیشتمانەكەوە خەبات دەكات، بیگۆڕێت بۆ گرووپێكی فشاری  لۆكاڵ  كە تەنها لە یەك دەڤەری هەرێمەكە بزاڤدەكا و بۆ قازانجی یەك دەڤەر ئەبێ، بەبێ رەچاوكردنێكی ئەوتۆی قازانجی  دەڤەرەكانی تر یان ووڵاتەكە بەگشتی. ئەگەر مەسەلەكە گەیشتە ئەو حاڵەتە، ئەوكاتە رەنگە خەڵكیش گۆڕان بە جیددی وەرنەگرن، نە لە دەرەوە و نە لە ناوەوەی سلێمانی.  ئەمەش لەجێی خۆیدا دەبێ چونكە بە تەبیعەتی حاڵ گروپی فشار نە دەسەڵات دەگرنە دەست، نە دەبنە خاوەن بڕیار. تەنها كاریگەرییان دەبێ لەسەر ئەو بڕیارانەی حیزبی دەسەڵاتدار دەیدا. لەوەش ناچێت ئەو دەنگانەی دەوروبەری گۆڕان ئەو كاریگەرییە لەسەر سیاسەت لە رێگەی هەوڵدانیانەوە بهێننە كایەوە كە را ئالوگۆڕ بكەن لەگەڵ خەڵكی كوردستان و قەناعەتیان پێ بكەن بە گرنگیی دیموكراسیەتی لۆكاڵ و سوودمەندیی حكومەتی ناوچەیی. ڵەوە دەچێ ئەم دەنگانە زیاتر بیر لەم رێگایە بكەنەوە كە ئەگەر بەقسەیان نەكرێ ئەوە ئەوانیش ماڵەكە لەهەموو كەس تێك بدەن. ئەگینا من دڵنیا نیم گۆڕینی پارێزگاری سلێمانی چی لە مەسەلەكان دەگۆڕێ، لەچاو ئەم مەسەلە چارەنووس سازانەی لەبەردەم گۆڕان و هەمو میللەتەكەماندا هەن، بەتایبەتی مەسەلەی هەڵبژاردنی ئەنجومەنی پارێزگاكان.  

هەروەها ئەم تاكتیكانە ماوە دەدات بە ناحەزانی گۆڕان كە پرۆپاگەندەی "سلێمانچێتی" لەسەر ئەم بزووتنەوەیە ببووژێننەوە و خەست تری بكەن، بگرە بە پشتراست كردنێكی زیادتترەوە، بەتایبتی كاتێ كە گوێبیستی یەكێك دەبن وەكو بەڕێز دڕەیی، ئەندامی جڤاتی نیشتمانی بزووتنەوەی گۆڕان و یەكێك لە دامەزرێنەرانی ئەو بزووتنەوەیە، كە لە هەمان چاوپێكەوتنەیدا دەڵێ "خەڵكی سلێمانی بێگومان جیاوازن لە شوێنی تر، بەحوكمی تەئریخی سلێمانی، بە حوكمی رۆشنبیریی سلێمانی و بەحوكمی هەموو شتەكانی سلێمانی.”

هەڵوێستی دەستشتن لە پارێزگایەك و گەف لێ كردنی لەتكردنی هەرێم لەسەر پارێزگایەكی تر دووركەوتنەوەن لە بەڵێنەكانی جارانیان و میللەتەكەمان پارچە پارچە دەكات و ئەجینداكەی دەشێوێنێ بە زیادكردنی تەنگژیی بەبێ ئەوەی هیچ گرێیەك بكاتەوە. ئەم سیاسەتانە یارمەتی گۆڕان نادەن بۆ جێبەجێ كردنی بەڵێنەكانی. ئەمە هەر لەوە دەچێ دوو فیشەك بە قاچی خۆتەوە بنێی.

گۆڕان پەیمانێكی هەیە لەگەڵ زیاتر لە ٤٧٠،٠٠٠ دەنگدەری كوردستان بۆ ئەوەی ئەو بەڵێنانە بهیێنێتە دی كە بیانگەیەنێتە حكومڕەوانی رەوا. گۆڕان بانگەشەی بەرنامەی "دروستكردنی میللەت" دەكات. گۆڕان خۆی بە ئەڵتەرناتیڤی حیزبە فەرمانرەواكانی كوردستان دادەنێ بۆ حوكمڕانییەكی باشتر، كۆمەڵگایەكی دادوەرتر و پاكتر. حەقە گۆڕان ئەم داكۆكییە لەسەر بەئەنجامدانی هەڵبژاردنەكانی ئەنجومەنی پارێزگاكان بكات، لە هەر سێ پارێزگاكەی هەرێمی كوردستان.