هەر تەنیا لەم ماوە كەمەدا زیاتر لە 150 خانەوادەی كوردی كەركوك بە خێزانەوە و بە ئومێدی بەهەشتی ئەوروپا، رێگەی مەرگی دەریای ئیجەیان تاقیكردووەتەوە و لەو رێگایەشدا خێزانێكی كەركوكی بە تەواوی لەنێوچوون و چیرۆكە ئازاربەخشەكەیان چووە سەر هەزاران چیرۆكی خەمناكی دیكەی كوردەواری.
لەو خانەوادەیە تەنێ باوكەكە بۆ مەینەتی مایەوە، چیرۆكی مانەوەی ئەو باوكە چیرۆكی شەریفی كوێخا عومەری ساتیم بیردەخاتەوە كە ئەنفال جگە لە خۆی هەموو ئازیزەكانی برد. لە ئەنفالدا چیرۆكی ئازاربەخشی وا زۆرە، مەلا عەبدولڕەحمانی كانی كوردە لە برا و دایك و خوشك و هاوسەر و منداڵ هەر خۆی مایەوە.
من نەمبیست لەبارەی ئەو خێزانە كەركوكییەوە هیچ بەرپرسێكی كەركوكی یان هەرێمی كوردستان قسەیەك بكات. چیرۆكی فڕینی ئەم خێزانانە هێشتا نەبووەتە هۆی ئەوەی هەڵوەستەیەك بە بەرپرسانی ئەم وڵاتە بكات. تۆ لەلایەكەوە باس لەوە دەكەیت كە دەبێ عەرەبەكانی دیالە و تكریت بچنەوە شوێنی خۆیان و لەلایەكی دیكەشەوە بە بێدەنگی سەیری ئەو كۆچە بە كۆمەڵە دەكەیت كە لە كەركوكەوە قەتارەی بەستووە بۆ ئەوپەڕی دنیا!
دەی دەسەڵات ئەگەر نەتوانێ بەهەشتێك بۆ هاونیشتمانیەكانی دروست بكات دیارە كە خەڵك بەدووی بەهەشتدا سەرهەڵدەگرن. گیای نەمری لە ئەفسانەی گلگامشدا لەشوێنێكە لەودیوی باو بۆران و ئاگر و ئافاتەكەوە، ئێستا كە ئیجەو رێگەی قاچاخ بووە بە دۆزەخی كوردان، هەق نییە بە دوای ئەوەدا بگەڕێین كە چی بكرێ، راستە كەركوك ئێستا تا رادەیەك داعشی لێ دووركەوتووەتەوە، بەڵام ئەوەتا هەر جارناجارێ بەرپرسێكی ئەمەریكی بە هەواڵێكی ناخۆش كایەكە دەباتەوە سەرەتا.
مرۆڤ كە گوێی لە فەرماندەیەكی سەربازیی ئەمەریكا دەبێت بەكاوەخۆ دەڵێ "نەمانی داعش سێ بۆ پێنج ساڵی تری دەوێ"، یان هەندێك قسەی لەو جۆرەی كە گوایە رۆژ بە رۆژ لەبری ئەوەی داعش كەم ببێتەوە زیاد دەكات و تۆپی دۆزەخ دروست دەكات و تادوایی، ئیدی ئەوە پرسیاری ناوێت كە بۆچی خەڵك دەڕوات، ئەوەش لەولاوە بوەستێ كە دوای 12 ساڵ لە رووخانی بتەكە، هێشتا عێراق لە خراپترین وڵاتەكانی دنیایە لەڕووی گەندەڵییەوە، لەڕووی نەبوونی دیموكراسییەوە، لەڕووی كوشتنی رۆژنامەنووسان و تادوایی.
كەركوكییەكان دەیانەوێ لەو عێراقە دەربچن كە تا ئێستاش بەشێك لە بڕیاربەدەستە مووچە باڵاكانی كوردن، ئەو كوردانەی تەنانەت نەیانتوانیوە لانیكەم فشاری ئەوە بخەنە سەر بەغدا كە قووتی خەڵك بنێرێ، ئێ لە بارودۆخی بەم جۆرەدا هەر چاوەڕوانی ئەوە دەكرێ كەركوكیەكان بڕۆن و سەری خۆیان هەڵبگرن، ئەمە لە كاتێكدا لە 2005ەوە ئەنجومەنی پارێزگای كەركوك هەر ئەو دەموچاوانەی رابردوون و ئەوانیش تا ئێستا نە لەبارەی چارەنووسی كەركوكەوە، نە لەبارەی كێشە و قەیرانە بەردەوامەكانەوە هیچی ئەوتۆیان دیار نییە، بەتایبەت رووی دەمم لە لیستی برایەتی كەركوكە كە بەرپرسیارێتی زیاتریان دەكەوێتە ئەستۆ. رەنگە هەبن بڵێن ئەوان لە رابردوودا هەندێك هەنگاویان ناوە و شتیان كردووە، بۆ نوێنەرانی خەڵك شتێك نییە ناوی ئێستا و رابردوو بێت.
من ناڵێم بەرگرتن لە كۆچ، بەڵام ئەگەر ئەم كۆچی بە كۆمەڵە چارەسەر نەكرێت و وەڵامی خواست و پێویستییەكانی خەڵك نەدرێتەوە، ئەوە خۆمان بە دەستی خۆمان بە شێوازێكی تر درێژە بە عەرەباندنی كەركوك و تەنانەت هەرێمی كوردستانیش دەدەین، ئاخر ئەگەر كەسانێك ئەرك بكێشن و ئاماری یەك مانگی نەخۆشخانەكانی منداڵبوون وەربگرن، ئەوسا ئەحمەد شەماڵ گوتەنی دەڵێین " كەر لە كوێ كەوتووەو كوندە لەكوێ دڕاوە".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ