هەشت ساڵ لەمەوبەر كاتێك تازە ئومێدمان بەوە هەبوو عێراقێكی رووخاو بكەینەوە بە وڵاتێك بۆ ئەوەی بتوانین پێكەوە تێیدا بژین، من هاوارم لێ هەستابوو كە ئێمە ناتوانین لەگەڵ عەرەب لە یەك وڵاتدا بژین، تەنانەت لە دوو دەوڵەتی تەنیشت یەكیش هەر زەحمەتە، بەڵام هەرچۆنێك بێت باشترە لەوەی لەیەك وڵاتدا بژین.
سەركردایەتی حیزبە كوردستانییەكان گرەوێكی دۆڕاویان لەسەر بە سیاسیكردنی كێشەی كورد دەكرد
سەركردایەتی حیزبە كوردییەكان لەبەر نەبوونی ئەڵتەرناتیڤی دیكە پێیان خۆشبوو جارێكی دیكە لەگەڵ عەرەب، چانسە رەشەكەی خۆیان تاقیبكەنەوە كە هیچ گۆڕانكارییەك بەسەر مێنتاڵیتی عەرەبدا نەهاتووە نەك لە 2003وە بەڵكو ئەوە 1400 ساڵە هەمان رەبابە دەژەنن.
سەركردایەتی حیزبە كوردستانییەكان گرەوێكی دۆڕاویان لەسەر بە سیاسیكردنی كێشەی كورد دەكرد و هەمیشە گوتوویانە: هیچ گرفتمان لەگەڵ میللەتانی عێراق نییە و هەموومان براین! بەڵكو گرفتمان لەگەڵ دەسەڵاتە!
منیش هەمیشە پێموابووە كە گرفتمان لە عێراق نەتەوەیی و رەگەزییە و هیچ هێڵێكی سیاسی تێدا نادۆزرێتەوە، چونكە جۆرەها حكومەت هاتن و رۆیشتن و گرفتی كورد هەروەك خۆی مایەوە و هەر سەرۆكێك دێت لەوەی پێش خۆی خراپتر دەكات، هەر ئەوەندەیە تاوەكو جێی پێی خۆی قایم دەكات ، ئینجا لەدەوری كورد دەسووڕێتەوە و هەمان سیناریۆ دووبارە و دەبارە دەبێتەوە، ئێمەش نە ماندوو دەبین و نە واز دەهێنین و نە دەهێڵین ئەوانیش ئیسراحەت بكەن.
نە واز دەهێنین و نە دەهێڵین ئەوانیش ئیسراحەت بكەنلە زەمانی مەلیك دەمانگوت: كێشەمان لەگەڵ میللەتانی عێراق نییە، تەنیا مەلەكیەت نەمێنێت هەموو گرفتەكانمان چارەسەر دەبن و بەدوای دۆڵژەنی بلۆكی سۆسیالیستی كەوتین و عەبدولكەریم بە تانك و تۆپ قەسری ریحابی داگیركرد و كولتووری كودەتای لە عێراق دروستكرد. عەبدولكەریم بووە رزگاركەر و لەسەرەتادا وای نیشاندا كە لەگەڵ كورد باش دەبێت، تاوەكو شوێن پێی خۆی دۆزییەوە، ئینجا دەستی بە لێدانی كورد كرد، دەستمان بەدوعا كردەوە بۆ ئەوەی بڕوات چونكە نكۆڵی لە مافەكانی ئێمە كرد، عەبدولڕەحمان و عەبدولسەلام عارف و ئەحمەد حەسەن بەكر، بەهەموویان رازی نەبووین ، تاوەكو سەددام هات و قێزەونترین كارەساتی سەدەی بەسەرماندا هێنا، ئینجا دەستمان بەدوعا كردەوە كە تەنیا سەددام بڕوات هەركێ دێت بابێت.
رۆژ هات و رۆژ چوون و حوكمی عێراق گۆڕا و عەللاوی هات و هەرهەمان شتمان گوت، جەعفەری هات و هەرهەمان شتمان گوت هەتا مالیكی هات، دەستمان بە كامپەینی دژی مالیكی كرد تاوەكو ئەویشمان لادا و عەبادیمان هێنا. هەر دەڵێین با ئەو كابرایە بگۆڕێت هەركێ بێت لەو باشتر دەبێت و هەركێ دێت لەوەی پێشی خۆی خراپتر دەبێت.
كەی فێردەبین؟
داعش وا زوو تەواو نابێت و ئەگەر تەواویش بوو عێراقمان تێبەردەدەنكەی دەزانین كە لە عێراقدا گرفتمان لەگەڵ میللەتەكانە نەك حكومەت یان حیزبی سیاسی، دەبێ چارەی كێشەی كورد لەعێراق لەسەر بنەمایەكی قەومیی رەگەزی بكرێت نەك سیاسی و، ئەگەر سەركردایەتی كورد بە تەمای ئەوەبێت گرفتی داعش كۆتایی پێبێنێت ئینجا ریفراندۆم بكات، ئەوە لەئێستاوە من دەڵێم داعش وا زوو تەواو نابێت و ئەگەر تەواویش بوو عێراقمان تێبەردەدەن و ناهێڵن ئەو ریفراندۆمە بكەین.
دوێنێ حەنان فەتلاوی و ئەوڕۆ هادی عامری ، عەبادی و سبەی دەیانی وەك ئەوان. هەتا لەناو عێراقدا بژین حاڵمان لەوە باشتر نابێت.
پێویستە كورد دەستبەجێ بە جیهان بڵێت: زۆر سوپاس بۆ ئەو بڕوایەی كە بەهێزی پێشمەرگە هەتانە و زۆر سوپاس بۆ هاوكاریی سەربازی، بەڵام ئێمە چەتەی كەس نین و چیتر لە دەرەوەی خاكی كوردستان شەڕناكەین. ئەگەریش بیكەین و خوێنی كوڕانی كوردستان بڕێژین تەنیا لەسەر خاكی خۆمان دەبێت، یانیش بەمەرج و گرەنتی نێودەوڵەتیی رەسمی كە جارێكیتر گوشارمان بۆ ناهێنن بمانگەڕێننەوە سنووری پێش 2003 و شوێنە كوردستانییەكانمان لێوەرنەگرنەوە بۆ ئەوەی سوننە رازی بكەن.
سەرمان پفدەدەن بۆ ئەوەی شەڕەكەیان بۆ بكەین و خۆیان بەرامبەر گەورەترین تاوانی چەرخی 21 بێدەنگ بن!داعش رووی جەنگی لە ئەمریكا كرد بۆ ئەوەی ببێتە هێزێكی تیرۆریستی نێودەوڵەتی و تێیدا سەركەوت، چونكە ئەمریكا توانی هاوپەیمانییەكی نوێ لە دەوری گرفتە نوێیەكەی دروستبكات و دەوڵەتی دیكەی تێوەبگلێنێ، بەڵام ئێمە سوودمان دەبێتە چی؟ جیهان هەمووی چاوی لە پێشمەرگەیە و سەرمان پفدەدەن بۆ ئەوەی شەڕەكەیان بۆ بكەین و خۆیان بەرامبەر گەورەترین تاوانی چەرخی 21 بێدەنگ بن! زیاتر لە 500 ژنی كورد لەبەرچاویان رفێندران و لەبازاڕی بەندە فرۆشران. سوودی ئێمە چییە لەوەی جەنگەكە لەجیاتی ئەوان بكەین بۆ ئەوەی كوڕەكانی خۆیان نەكوژرێن، تەنیا ئەوەیە بە چەتەی نێودەوڵەتیمان ناودەبەن و تائێستا یەك سووكە وەعدیش نییە كە تەنانەت ناوچە دابڕاوەكانیشمان بدەنەوە، بەشداریشمان لەحكومەت بەوشێوە لاوازە كێشەكە باشتر ناكات ، هەرچەندە سەركردایەتی كورد سێ مانگی دانابێت ، بەڵام ئەوان رەزامەندییان پێشاننەداوە نە بۆ سێ مانگ و نە بۆ سێ ساڵ.
كۆتایی: با كوڕی خۆمان چیدی نەكەینە قوربانی كوڕی خەڵك، لەپێناوی چەند مووشەكێكی دژە تانك یان فرۆشتنی نەوت و مووچەی بەغدا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ