ئەوە یەكلایی بووەوە كە پارتی بە بەشداریی بزووتنەوەی گۆڕان حكومەت پێكدێنێ، ئەم بڕیارە گەڕانەوەیە بۆ سەرەتای نەوەدەكان كە حكومەتی پەنجا بە پەنجا ئۆتۆماتیكی كارەساتی شەڕی ناوخۆی لێكەوتەوە.
بزووتنەوەی گۆڕان لەسەر بناغەی تووڕەیی و كۆكردنەوەی دەنگە تووڕەكان دروست بوو. هیچ فەلسەفەیەكی ئاشكرای نییە، هیچ نەخشەڕێگایەك شك نابات كە لەسەری بڕوات بەڕێوە جگە لە تانە و توانج لە دوو حیزبی حاكمی هەتا ئەمڕۆ.
ئەوانەی پێشڕەوی بزووتنەوەكەن، یەكێیتیە كۆنە داخ لەدڵەكانن. كەسانی تووڕەی چەپ، ئیسلامی، تاكی رادیكاڵ، گەنجی بێلایەن و بێ هەل، كوردی تاراوگەی بێبەش لە دەوڵەمەندیی كوردستان، كۆنە یەكێتی و پارتیی تووڕە كە نەبوونە هیچ و نەبوونە خاوەن دەوڵەمەندی، كەسانی هەر بۆ خۆشی ناڕەزا و تووڕە، كۆمەڵێك گەنجی خوێندەوار كە ئارەزووی كاركردنیان هەیە و كەس ناچێت بە دەنگیانەوە و...هتد. ئەمانە هەمووی خستووەتە پاڵ خۆی و نازانێت چۆن هاوكێشەیەكیان بۆ بدۆزێتەوە. بەمانە پەرلەمان و حكومەت دەكات بە مەیدانی جەنگێكی بەناو دیمۆكراتی و هەریەكەو بێ ئامادەكردنی حیوارێكی پێشكەوتووانە و شارستانیانە، بە مووچەیەكی خەیاڵی، رۆڵێك لە شانۆیەكدا دەبینێت كە شوێنی كاركردنە. بەكورتی سیاسەتێكی ماكیاڤیلیانەی گرتووەتە بەر، ئامانجی دەستخستنی دەسەڵاتە بە هەر رێگایەك بێت، تەنانەت گەر ئەو رێگایە ئیسلامیش بێت.
یەكەم جەنگی گۆڕان (ئەوەندەی من لە ئەڵمانیا ئاگاداری بووبم) دژ بە بنەماڵە بوو! كەچی ئەمڕۆ بە روونی دەبینین كە هەموو ئەوانەی بڕیاربەدەستن، بنەماڵەن. گۆڕان دژ بە دروستكردنی كەسانی وەك تاڵەبانی و بارزانی بوو. فەرموو ببینن، هەر ئەوەندە دەزانیت، نەوشیروان مستەفا و پەیامەكانی كراونەتە ریكلام لەناو تەلەڤیزیۆن، میدیای ئەلیكترۆنی، قسەی ناو چاخانەكان و سەر خیابان.
گەورەكردن و بەهەند وەرگرتنی گۆڕان دەكەوێتە ئەستۆی یەكێتی و پارتی، چونكە ئەگەر هەر زوو پشتگوێیان بخستنایە وردە وردە خۆیان ماڵئاواییان دەكرد.
ئەو هەموو جیابوونەوە و ناڕەزایەتییەی ناوخۆیان ئەوە دەسەلمێنێ كە ناگەنە هیچ ئەنجامێك، مەگەر جیابوونەوەیەكی دیكە و دروستبوونی "بزووتنەوەی گۆڕان دوو" بۆ گۆڕینی گۆڕان. جا چ پارتی و چ یەكێتی پێش ئەوەی بیر لە بەشداركردنی گۆڕان بكەنەوە، با بیر لەوە بكەنەوە كە بۆچی گۆڕان دروست بوو.
با پرسیارێك لە خۆیان بكەن و بزانن گۆڕان داوای چ ریسۆرسێك دەكات!
بێگومان ریسۆرسی بابەتە مرۆڤایەتییەكان و كاروبار نا، بەڵكو ئەو ریسۆرسانەی دەسەڵاتی تایبەتیان پێدەبەخشێ و ترادیشنی كەلتووری سیاسی كلاسیكی ناو شاخ دەژێنێتەوە!
بێگومان ئەوكات ئەم دوو حیزبە گەورەیە دەگەنە ئەوەی كە دەستبەجێ گەنجە تووڕەكان ئاشتبكەنەوە و بایەخیان پێبدەن، كە ئەمڕۆ كراونەتە كەرەسەی گێرەشێوێنی.
گرنگترین كاری حكومەتی تازە ئەوەیە كە ئەم گەنجانە لە خۆی نزیك بكاتەوە و بەپیر داواكاریەكانیانەوە بچێت و قایلیان بكات، بە شێوەیەك بیانوو لە دەست هەموو ئەو كەس و لایەنانە ببڕێت كە گەنجان دەكەنە ئاگرخۆشكەر بۆ ئەوەی دەسەڵاتی پێ وەربگرن و وڵاتی پێ بشێوێنن، چونكە سەرۆكەكانی گۆڕان، سەر گردەكە و دەسەڵاتی خۆیان لە دەست نادەن و نزیك ناكرێنەوە لە هیچ سیستمێك.
دڵنەوایی خەڵكە تووڕەكەمان چارەسەری یەكەمە لەم ئەزموونە سیاسییە هەستیارەدا.پارتی و یەكێتی لەم رێگەیە شارەزان! دەبێت بكرێت. گوتن بەسە.
حیزبی چەپی ئەڵمان كە لەساڵی 1989وە بە لابردنی دیواری بەرلین سەری هەڵهێناوە و لە ئەڵمانە تووڕەكانی رۆژهەڵات و رۆژئاوا دروست بوو، وردە وردە پاش 4 ساڵ، پاش ئەوەی كە لە پەرلەمانی چەند هەرێمێكدا كورسی زۆریان هێنا و بە نیازی بەشداریكردن بوون لە حوكمڕانی، هەتا ئەمڕۆ لەسەر ئاستی حكومەتی ناوەند لە بەرلین جێیان نییە، چونكە هەرزووجێیان بۆ دروست نەكرا و نەكرانە سەرنجڕاكێشەر.
گەر پارتی بەرنامەی خۆی وەك حیزبێكی گەورە نوێ بكاتەوە و ناعەدالەتی كەم بكاتەوە لەناو خۆیدا و لەنێوان ناوچە جیۆگرافیەكانی هەرێمی كوردستان و چینەكانی كۆمەڵگە و كەسێكی پسپۆڕ بە بودجەیەكی تایبەتەوە بكاتە خاوەن بڕیار بۆ دابینكردنی كاروباری گەنجان و.. هتد، ئەوا گۆڕان وەك بزووتنەوەیەكی لەپڕ هەڵتۆقیو، هەر خۆی بۆ خۆی وردە وردە كاریگەری نامێنێت.
هەموو كارێكی سیاسی تاقیكردنەوەیە، بەڵام ئەوەی زۆر بە زەقی دیارە، زۆر كارەسات دەبێت گۆڕان بخرێتە حكومەتەوە. چونكە ئەوەی بە تووڕەبوونی میللەت دەگاتە سەر كورسی دەسەڵات، ناتوانێ میللەتێكی تووڕە حوكم بكات و هەمیشە دەگەڕێت بۆ هەلێكی نوێی تووڕەبوون و پرەنسیپی رێزگرتنی كۆنتراكت بەلایەوە گرنگ نییە. خۆ ئەگەر ئەمە بووە ناچارییەكی ستراتیجی، ئەوا دەبێت كۆنتراكتەكە بە پێنووسێكی تایبەت و ئارام بنووسرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ