دەوڵەتی ئیسلامیی لە عێراق و شام (داعش)، یانیش ئێستا تەنیا (دا) ! سەری گێژكردین بە لێدوان، هەڵوێست و رووداوەكانی، كە هەریەكێكیان لەوەی دیكە سەیرترە .
من نەمدەویست لەسەر ئەو شتانە قسە بكەم، هەرچەندە دەزانم ئەوە پرسێكی زۆر گەورەیە بۆ ناوچەكە و جیهانیش، بەڵام رۆژێك دێت ئەو قسەكردنە زیاتر دەبێت لەسەر ئەو پرسە و دەبێتە یەكێك لە گەرمترین باس و خواسەكانی ناوچەكە! بۆیەش ئامادەكاریی بۆكردنی پێویستە .
قسەكردنی من لەڕووی پێویستی قسەكردنی زۆرینەی بێدەنگەوەیە كە فیكرێكی نێوەنجییان هەیە لە بەرامبەر كەمینەی بێ عەقڵی و دوورخستنەوەیەكی تووڕە. ئەوە نێوەڕۆكی بیرۆكەی منە و هیچ پەیوەندییەكی لە دوور و نزیكەوە بەهیچ نزیكبوونەوەیەكی حیزبییەوە نییە .
بەڕاستی داعش نامترسێنێ، چونكە داعش تەنیا ئامرازێكە، داعش كۆمەڵەیەكی ئیسلامیی وەك قاعیدە نییە و هیچ قوڵاییەكیشی نییە لەڕووی ئایدیۆلۆژی و سیمبوولەكانیشی وەك بنلادن و زەواهیری نین. بەڵام لەگەڵ ئەوەشدا داعش رووخسارێكی كێشەیەكی مەترسیدارتر و قوڵترە . كێشەی قوڵ و مەترسیدارتر لەو فیكرەدایە كە دەدرێتە ئەو كۆمەڵگەیانە و رێگەی بوونیان پێدەدات و پاساویان بۆ دروستدەكات و زەمینەیەك دروستدەكات كە هەندێ بۆچوونی دیاریكراو بۆ هەندێ توێژی خەڵك بەتایبەتی گەنجان، مەترسییەكەش لێرەوە سەردەگرێت .
زۆر سەیرە كە ئەو ئایینەی كە وەك رەحمەت بۆ مرۆڤ هاتووە (وماأرسلناك الا رحمە للعالمین- الانبیاو 107) ، ببێتە ئایینی كوشتن و سەربڕین و، ئێمەش بێدەنگبین بەرامبەر ئەو فیكرە كە دەیەوێ خۆی تەرخانبكات بۆ دژایەتیكردنی هەموو شتێك.
دژی هەڵبژاردن، دیموكراسی، رۆژئاوا، رۆژهەڵات، شارستانیەت، تەكنەلۆژیا، هونەر، وێژە، جولەكە، كریستیان، هەموو حیزبەكانی جیهان، هەموو كۆمەڵەكان، هەموو بۆچوون و ئاراستەكانی جیهان لەوانەش ئیسلامییەكان و تەنانەت لەسەرووی هەموویانەوە ئیسلامییەكان. ئەوانیش بە لێدوان و ئاماژە فیرقەی رزگاربوو و ئەو فیرقەیەن كە هەموو راستی لەلای ئەوانە و خراپە لەنێو دەستەكانی و پشتییەوە بۆی نایێت. هەركەسێكیش لەگەڵ ئەواندا نەبێت لە دەرەوەی گەلی موسڵمانە، چونكە ئەوان گەلی موسڵمان و پێوەری راستی پێكدێنن. لەڕاستیشدا هەموو ئەوەی دەیكەن شێواندنی ئایین و وێنەی موسڵمان و مرۆڤایەتی مرۆڤیشە. هەموو هەوڵی ئەوانیش لەپێناو بڵاوكردنەوەی رق و تووڕەییە، هەروەك ئەوەی ئیسلام گوتاری رقلێبوونەوەو بڵاوكردنەوەی رق و كوشتن بێت، باشە ئەوە چ دینێكە؟ ئەوە چ فیكرێكە؟
ئایا ئەمە ئەو ئایینەیە كە خەڵك باوەڕی پێبێنێ لە ئەخلاقی بازرگارنەكانی؟ ئایا ئەمە ئەو ئاینەیە كە شارستانیەتی دروستكرد و چەندین دەیە و سەدە سەركردایەتیكرد؟ ئایا ئەوە بە شمشێر، كوشتن، رقلێبوونەوە لە خەڵك، كە وایكرد خەڵكی چین و هیندستان و سند باوەڕ بە ئیسلام بێنن؟ ئایا تەقاندنەوەی تاوەری بازرگانیی جیهان لە نیویۆرك، وادەكات كە سەنتەرە ئیسلامییەكان پڕببن لەكەسانی تازە موسڵمانبوو؟ ئایا موسڵمانان بریتین لە گردبوونەوەی پیاوكوژان و دڵڕەش و خوێنڕێژان؟ یان بریتین لە داخوازكارانی خێر و ئاشتی و ئاوەدانی؟
ئەو فیكرە پێویستی بە هەڵوەستە لەسەركردنێكی جیدییە . ئەوەش بەس نییە كە رزگاری بكەین و لە قوژبنێكدا گرمۆڵەی بكەین. هەندێك هەڵوێست و كردار هەن كە كۆمەڵگەكەمان لە رێگەیانەوە پاساو دەداتە ئەو فیكرە و موسڵمانان كە دڵنیابن شەڕێك دژی ئایین، بەتایبەتی ئایینی ئیسلام هەیە و، ئێمە كۆمەڵگەی فاسق و كافرین، یان دەبێ تۆبە بكەین و بگەڕێینەوە، یان دەبێ حەقیان لێدەربكرێت، سەربڕینیش باشترین رێگەیە بە بۆچوونی ئەوان بۆ گێڕانەوەی خەڵك بۆ لای خوا!!
دەبێ كۆمەڵگەكانی ئێمە لە رێگەی دەستەبژێری سیاسی، فیكری، رۆشنبیری، پەروەردەیی، ئایینی، مەدەنی و میدیاییەوە، پاساوەكانی ئەو فیكرە هەڵوەشێنێتەوە كە كەس كەس قبوڵناكات و هەموویان بە كافر دادەنێت . هەروەها دەبێ كۆمەڵگەكانی ئێمە چاو بخشێننەوە بە جۆری هەڵوێست و جۆری گوتارەكەی بەرامبەر ئایین و ئیمانداری. هەروەها بچێتە نێو هەندێك وردەكارییەوە بۆ ئەوەی لەگەڵ یەكتر ئاشتببنەوەو، وێنەیەكی روونیان هەبێت بەرامبەر ئەو پرسانە . دەڵێم (ئاشتبوونەوە) بەلانیكەمەوە، چونكە هیچ پێویست نییە هاوبیری لەسەر فیكرێكی دیاریكراوی یەكگرتوو هەبێت . بە واتایەكی دیكە، رێككەوتن هەبێت كە (گفتوگۆ بكەین) بۆ ئەوەی (رێكبكەوین) لەسەر (ژیانێكی هاوبەش). هەروەها هەندێ پێداچوونەوەی تایبەت و پێویست لەسەر حیزب و كۆمەڵە ئیسلامییەكان.
هەروەها پێویستە پێداچوونەوە بە گوتاری هەینی مزگەوتەكان، گوتارەكانی بانگخوازەكان، پرۆگرامی كۆلیژەكانی شەریعەت، پەیمانگە ئیسلامییەكان و وانەكانی پەروەردەی ئایینی لە هەموو قۆناخەكانی خوێندندا بكرێت. ئەو باسە لە گفتوگۆ شاراوەكانماندا هەیە و، خۆی لە چەندین كردەوە ناڕەزایی و ناكۆكییەكانی گۆڕەپانە جیاوازەكاندا دەردەخات، بەڵام ئێمە بەدیاریناخەین. لەو بڕوایەدام كە میانڕەوەكانیش لە لایەنە ناكۆكەكانن (بە ئیسلامی، عەلمانی، بێدین و سۆسیالیستەكانەوە)، ئەوان بە ئاشكراگۆیی لەگەڵ یەكتر قسە ناكەن و لەسەر بنچینەی موجامەلە قسە لەگەڵ یەكتر دەكەن، هەروەك چۆن لە ئیدارە و سیاسەتدا لەگەڵ یەكتری دەكەین. لەگەڵ ئەوەدا كە ئەو بابەتە بەرەگەی موجامەلە ناگرێت و هەندێك پێشهات هەن كە ئەوە نیشاندەدەن كە هەندێ كێشە لەوانەیە ببنە قومبەلەی نێوخۆیی پێش ئەوەی ببنە قومبەلەی دەرەكی! ئەو گەنجە داعشییە و ئەوانیدیكەش نموونەیەكن كە مەترسیداریی ئەو پرسەمان نیشاندەدەن.
باوەڕێكی تەواو هەیە لەلای لایەنە ناوخۆیی و دەرەكییەكان كە رەوتە گەورەكانی كوردستان بایەخ بە پابەندیی ئیسلامیی و پێگەی شەریعەت نادەن. بەڵكو زۆربەی جار دژە ئەو ئاراستەیە وەپێشدەخرێت. لەوانەیە هەندێك راستی لەو قسەیەدا هەبێت، كە لەوانەیە ئەوە رەفتاری تاكەكەسی بن، لەوانەشە بەپێی ئیرادەیەكی رێكخراوبێت. پاشبەردەیی زۆرە و رووبەڕووبوونەوە و ئاشكراگۆییش كەمە. ئێمە پێویستیمان بە راشكاوی و ئاشكراگۆییە بۆ وەڵامدانەوەی پرسیارەكان و رێككەوتن لەسەر هاوبەشەكان، بۆ ئارامكردنەوەی دەروونەكان و ئارامكردنەوەی هەموو لایەنەكان و مانگرتن، لەجیاتی ئەوەی داعش و ئەوانیدیكە لەناوەوە سمكۆڵمان بكەن .
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ