رووداوەكانی دوای (12ی ئۆكتۆبەر)، بەتەواوی هێز و لایەنە سیاسییەكانی هەرێمی كوردستانی دابەشی سەر چەند بەرەیەكی دژ و جیاواز كرد، بە جۆرێك هەموو ئومێدێكی دانیشتن و كۆبوونەوە و سازانیان لە گۆڕ نا، لەلایەكی دیكەوە هەر لایەنە و بەجۆرێك لەژێر بیانوویەكدا خۆی لە كۆبوونەوە دەدزییەوە و مەرج و مەرجكارییان دەكردە بیانوو بۆ كۆنەبوونەوە.
ئەم دووری و دابڕانەی نێوان لایەنەكان گەیشتە ئاستێك هەموویان تەنیا وەك پاڵەوانی شاشە و لەمیانی بەرنامەی تەلەفزیۆنیدا قسەیان لەگەڵ یەكتر دەكرد، وەلێ كەسیان هیچیان پێ نەبوو بۆ چارەسەری و تەنیا موزایەدەیان بەسەر میللەتەوە دەكرد.
هاتنە پێشەوە و راگەیاندنی كابینە تەكنۆكراتەكەی عەبادی هەموو هاوكێشەكانی گۆڕی و زۆر شتی ئاوەژووكردەوە، بەجۆرێك ئەو پارتی و گۆڕانەی لە هەرێم بە هیچی یەكتر رازی نین، لە بەغدا لەتەك یەك دادەنیشتن و بەحیساب یەكدەنگیی كوردیان دەپاراست، پرسیاری جەوهەری لێرەدا ئەوەیە ئەرێ دەكرێ ئێمە لە بەغدا یەك دەنگ بین و لەناو خۆشمان فرەدەنگ و پارچە پارچە؟
هەر لە سەرەتاوە و بۆ وەڵامی ئەو پرسیارە دەمەوێ بڵێم درۆیەكی زۆر گەورەیە كە باس لە یەكڕیزی بكەین بۆ بەغدا و كەچی لەناوەوە پەرتەوازە بین و تەنانەت ئامادە نەبین لەگەڵ یەكتریش دابنیشین، ئەم قسەیەی حیزبەكانی كوردستان وەك ئەوە وایە تۆ خانوویەكی گەورەت هەبێ، لە ناوەوە وێران بووبێ و كەڵكی دانیشتنی نەبێ، كەچی بڵێی لە ناوەوەی بگەڕێن با هەوڵ بدەین دەرەوەی جوان بكەین، چونكە خەڵك دەیبینێ!
ئاخر ئەمە كوێی مەنتقە تۆ لە كوردستان بە چەقەنەیەك سەرۆكی پەرلەمان و چوار وەزیر و چەند بەڕێوەبەرێكی گشتی بنێریەوە ماڵەوە، كەچی بڵێی وەرن با یەكدەنگ بین بۆ ئەوەی لە بەغدا پۆستە وەزارییەكەی گۆڕان نەفەوتێ !
چۆن دەكرێ نزیكەی دووسەد رۆژە پەرلەمانی كوردستان كۆنەبووەتەوە و لەبەر جیاوازیی حیزبی ئامادە نین دانیشن، كەچی بڵێی لەوانەی ئێرە بگەڕێن با فراكسیۆنەكانمان لە بەغدا یەكدەنگ بن و شەڕی كورد بكەن.
بەبڕوای من ئەوەی ئێستا لایەنەكان دەیكەن، سەر دەگرێ و هەر بەڕاست لە بەغدا و ناوەند یەك دەنگ دەبن و لە هەرێمیش فرە دەنگ، چونكە شەڕی بەغدایان شەڕی پۆست و ئیمتیازە نەك شتی دیكە، ئاخر سەیر لەوەدایە تا ئێستا یەك سیاسی كورد نەیگوتووە مەرجی متمانەدانمان بە كابینە تەكنۆكراتەكەی عەبادی جێبەجێكردنی مادەی 140 و ئیستیحقاقاتەكانی پێشمەرگە و قووتی خەڵكی كوردستانە، هەمووی هەر دەڵێ پۆستەكانی كورد كەم نەكرێتەوە، كەوایە دەبێ ئەو میللەتە تێبگات كە سەرجەم حیزبەكان بەبێ جیاوازی، شەڕی كورسی و پۆست و دەسەڵاتیانە لە بەغدا، نەك شەڕی بەشداریی راستەقینە و دابینكردنی مافەكانی كورد، بۆیە یەكدەنگ دەبن لەوێ ئەگەرنا هەموویان سوێندیان خواردووە لە ناوەوە چاكی نەكەن و بەردەوام بن لە كێشە و ململانێ.
زۆر چاوەڕێ بووم و پێشبینیم دەكرد حیزب و لایەنە سیاسییەكان كابینە تازە تەكنۆكراتەكەی عەبادی بە هەل بقۆزنەوە و بڵێن وەرن با دانیشین و كێشەكانی ناوخۆمان چارەسەر بكەین و ئینجا بە یەكدەنگی بڕۆینە بەغدا، نەك بڵێن ئێرە لێگەڕێ با شەڕی ئەوێ بكەین.
مەبەستمە بڵێم: با سەرجەم لایەنەكان بەگشتی و پارتی و گۆڕان بە تایبەتی، ناكۆكییەكانیان وەلانێن و كێشەكان چارەسەر بكەن، ئینجا بە یەك تیم و كۆدەنگییەوە بچینە بەغدا، نەك سەرۆكی هەرێم لای گۆڕان ماوە بەسەرچوو و ناشەرعی بێ و سەرۆكی پەرلەمان لای پارتی سەرۆكی پێشووی پەرلەمان بێ و وەزیر لە ماڵەوە دانیشتبێ و لەكاتی ئامادەیی خۆیدا كارەكانی بە وەكالەت بەڕێوە ببردرێ و بشڵێن با هەموومان لە بەغدا شەڕی ئەوە بكەین وەزیرێك زیاتر وەربگرین.
ئیتر دەبێ هەموومان لەوە تێبگەین بانێكە و دوو هەوا ناكرێت، یان دەبێ لە هەموو شتەكان كۆك و تەبا بین، یانیش با ناتەبا و ناكۆك بین.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ