پژمەكەی گۆڕان و هەڵامەتی ئۆپۆزسیۆن...!

لەدوای دروست بوونی بزوتنەوەی گۆڕان، زۆرپێدراو لە كایەی سیاسی كوردستاندا گۆڕانگاریان بەسەرداهات، بەڵام گۆڕانكاری دراماتیكی. جگەلەوەی سایكۆلۆژیای سیاسی بڕیاردەری كورد چ وەك دەستەڵات و چ وەك ئۆپۆزسیۆن گۆڕا، هەریەكە بە گۆشەیەكی دیاری كراو. دەبینین ڕۆشنبیریی سیاسی بژاردەش، بەتایبەت كادیرانی حیزبی و میدیاكاران و ڕۆشنبیرانی حیزب بەتایبەتی ئەم گۆڕانكاریە گرتیەوە.

گۆڕان لەخودی خۆیدا پێدراوێكی هەم پۆزەتیڤە هەم حەتمیەتی مێژوییە، بەڵام زیرەكی سەركردەكانی بزوتنەوەی گۆڕان و بەتایبەتی كاك نەوشیروان لەوەدابوو توانی گرەوە سیاسیەكەی خۆی ببەستێتەوە بەو حەتمیەتە سروشتیەوە. 

لەو ئامانجەدا پڕبەپێست مامەڵەیەكی تەندروستی كرد. بەڵام ڕەنگدانەوەی ئەم مامەڵە كردنە زیرەكانەیە لە ئاستی بژاردەی ڕۆشنبیر و گوتاربێژانی سیاسیدا، ڕەنگدانەوەیەكی سروشتی و پۆزەتیڤ نەبوو. یان ڕەنگە تا هەنوكەی نوسینی ئەم چەند دێڕە ئاماژە گەلێكی لەم جۆرەمان لەبەردەستدا نەبێت كەئەم بەرەنجامگیریە ڕاست بكەنەوە..




ئێمە پێمان وایە كاریگەری خراپی ئەو پێدراوەی باسمان كرد لەدوو گۆشەوە بەڕوونی دەرئەكەوێ‌، كەبریتین لە:

1) مەعسومیەتی ئۆپۆزسیۆن:  یەكێك لەو ڕەنگدانەوە خراپانەی گوتاری ئۆپۆزسیۆن بەگشتی و بزوتنەوەی گۆڕان بەتایبەتی لەسەر ئەقڵی شەقام و تەنانەت بژاردەش، یان ڕاستتر بڵێین یەكێك لەو مامەڵە خراپانەی كە نوخبەی ئێمە لەگەڵا گوتاری ئۆپۆزسیۆن كردی و بەردەوامیش ئەیكات، ئەوەیە جۆرێ‌ لە مەعسومیەتیان داوە بە هەموو جوڵە وڕەفتارو بڕیار و گوتارێك كەلە ئۆپۆزسیۆن بەگشتی و بزوتنەوەی گۆڕان بەتایبەتیەوە دەربچێت. 

ئەم جۆرە سەقافەتە سیاسیە خەریكە پێ دەنێتە ناو سنورەكانی ئایدۆلۆژیاوە. واتە مەعسومیەتی ئۆپۆزسیۆن وەك ئایدۆلۆژیای لێهاتوە.  بەجۆرێ‌ 
بۆئەوەی هەر تاكێك خۆی نابوت بكات، هەر ئەوەندە بەسە ڕەخنەیەك لە ئۆپۆزسیۆن بگرێ‌، ڕاستەو خۆ دەیان ناوناتۆرە پێوە دەلكێنرێ‌. بەمانایەكی ڕونتر:
 ڕەخنەگرتن لە ئۆپۆزسیۆن و بزوتنەوەی گۆڕان بوەتە سەركەشیەكی گەورە، مەگەر هەر ئەوانە بتوانن خۆیانی لەقەرە بدەن كە زۆر ڕووقایمن و دەربەستیان بە هەندێ‌ شت نەبێ. 

ئەمەی باسی دەكەین ڤایرۆسێكی ترسناكە هەم بۆ گۆڕان كە ڕەنگە پەیتایەیتا بەرەو شمولی بوونی بەرێ‌، هەم بۆ چینی بژاردەش كە زات ناكەن ڕەخنەی لێ بگرن... مەترسیەكی تری ئەم ڤایرۆسە ئەوەیە كاریگەریەكانی گوازراوەتەوە بۆ ئۆپۆزسیۆنیش و ئەوانیشی توشی هەڵامەتی سیاسی كردوە.. واتە ئەوانیش بەجۆرێ‌ لە پیرۆزێتی و مەعسومیەتەوە سەیری خۆیان ئەكەن...



بۆیە پێم وایە بۆ بزوتنەوەی گۆڕان زۆرباشە گەر هەر لەئێستاوە كاربكات بۆ گۆڕینی ئەو وێنە نەمەتیەی كە لەهزری شەقامدا بۆی دروست بووە.  تاكو بیروڕا گشتیەكە نەبوەتە ئایدۆلۆژیایەكی سیاسی، پێویستە دەستكاری بكرێت.

 بەتەڕی و تازەیی بیچەمێنێتەوە لەگەڵا بەهاكانی پلۆرالیزمدا نەك لەكاتێكی درەنگدا هەوڵا بۆ گۆڕینی ئەو سایكۆلۆژیایە بدرێ‌  كەكات تێئەپەڕی و لەبری چەمانەوە ئەشكێتەوە. 

لێرەدا بۆ ڕوون بونەوەی مەبەست یەك نمونە لەقورئان وەر ئەگرین، قورئان بەشێوەیەكی ورد كاری كردوە بۆ ئەوەی ئەو وێنە نەمەتیەی لەسەر پێغەمبەر ئیسلام (د.خ) لەكۆمەڵگادا دروست ئەبێ‌ دەستكاری بكات، نەبادا پیرۆزی محەمەد (د.خ) بگاتە ڕادەی پەرستن. بۆیە هەركات كێرڤی پیرۆزكردنی محەمەد لەناو كۆمەڵگەدا بەرزئەبێـتەوە، قورئان دێتە سەرخەت و ئەفەرمێت: وما محمد الا رسول قد خلت من قبله الرسل... یاخود دێتە سەرخەت و دەفەرمێ: ماكان محمد ابا احد من رجالكم...هتد.



كاتێ‌ قورئان ئەو ئاماژەیە لەسەر محەمەد ئەدات، بۆ ئەوەیە هەنگاو بەهەنگاو دەستكاری ئەقڵی كۆمەڵگە بكات و ڕێگە نەدات بەوەی بەهۆی بەرزی و پاكیزەیی پەیام و ئاراستەكاریەكانیەوە، محەمەد ببێتە بتێك و بپەرسترێ‌ یان بیروڕای پیرۆزكردنی ببێتە ئایدۆلۆژیا... ئەم نمونەیە بۆ بزوتنەوەی گۆڕانیش هەر ڕاستە.

 نابێ‌ لەبەر ئەوەی دروشمی دژایەتی گەندەڵی و بەفیڕۆدانی سامانی گشتی و...هتد. یەكەمجار لەلایەن گۆڕانەوە كراوەتە كارتی سیاسی، ئیتر پیرۆزكردنی گۆڕان ببرێتە خانەیەكی ناسروشتی ( وەك ئێستا براوە) بەڵكو ئەركی خودی بزوتنەوەی گۆڕانە جاروبار هەوادارانی وریا بكاتەوە لەوەی گۆڕانیش وەك هەر حیزبێكی تر دیاردەیەكی ئاسایی ئەم كۆمەڵگەیەو مەحكومە بەهەموو ئەو بەهایانەی كە سەرچاوەكەیان كۆمەڵگەی كوردیە. 



ڕەنگە كەسێك بڵێت: ئەم داوایە تەعجیزیە، چونكە هیچ حیزبێكی سیاسی نایەت بەدەستی خۆی لەو هالەیە كەم بكاتەوە كە بەدەوریدا دروست بوە، لەڕادەی ئەو پیرۆزیە بهێنێـتە خوارەوە كە لای ئەندامەكانی هەیەتی. بەڵام گەر بەهەڵەدا نەچوبم، ئەوەی ئێمە داوای ئەكەین كاركردن نیە لەسەر كەمكردنەوەی ڕەسیدی سیاسی گۆڕان. بەڵكو داوای لێ ئەكەین بەردەوام كاربكات بۆ ئەوەی عیسمەتی گۆڕان نەبێتە ئایدۆلۆژیای سیاسی هەوادارانی.

 چونكە ئەزمونی لەو جۆرە كارەساتی لەمێژوی مرۆڤایەتیدا لێكەوتۆتەوە. بەداخەوە لەئێستادا جڵەوی ئەو سایكۆلۆژیایە شل كراوە و نەك هەر گۆڕان بەڵكو تەواوی ئۆپۆزسیۆنی گرتۆتەوەو ئێمە لەئێستادا لەگەڵا سەرەتاكانی یەك كێشەی گەورەدا ئەژین كە ئاسەوارەكانی لەداهاتوودا دەرئەكەوێ‌ و لەئێستاوە ناوی ئەنێین  ئایدلۆژیای مەعسومیەتی ئۆپۆزسیۆن.

2)  خاڵێكی تر كەدەمەوێ زۆر بەگوشراوی ئاماژەی پێ بدەم، بریتیەلە هەبونی حاڵەتێك لەتوڕەیی لەناو هەوادارانی ئۆپۆزسیۆن بەگشتی و گۆڕان بەتایبەتی. 

ئەم توڕەییە بەڕادەیەكە ڕەنگە پەل بكێشێ بۆ فەوزەویەت. ئێمە لەم توڕەییەی لایەنگرانی گۆڕاندا پێدراوێكی دووجەمسەر ئەبینین: یەكەمیان ئەوەیە گۆڕان نەی توانیوە جەوهەری مرۆڤی كورد بگۆڕێت و گۆڕانخوازانیش هەمان مرۆڤە توڕەكانی كۆمەڵگەی ئێمەن. دووەم ئەوەیە مۆدیلی كاری سیاسی گۆڕانیش جیاوازیەكی ئەوتۆی نیە لەگەڵا ئەو مۆدیلەی كە حیزبەكانی تری كوردستان هەیانە و هەمیشە جۆرێ‌ لە ئامادەباشی دەرونییان هەیە بۆ كارلێكی زبر لەگەڵا بەرانبەرەكانیاندا.

بۆ ئەم بەرەنجامگیریە دوو خاڵا دەكەینە بنەمای شیكاری:

یەكەم:  بەدرێژایی ماوەی خۆپیشاندانەكانی 17ی شوبات و ڕۆژانی دواتر، لەسەرای ئازادی  تەنها ڕێگە بەو كەسانە ئەدرا قسە بكەن، كەبە فلتەری ئەواندا تێدەپەڕین و وەگەرنا بەتوڕەیی و بەكارهێنانی توندوتیژیش ڕێگری لەهەركەسێكی تر دەكرا( وەك ئەوەی لەگەڵا فەرهاد پیرباڵا كرا) .



دووەم: لەدوای دەركەوتنی ئەنجامی هەڵبژاردنەكانی 21/9/2013 و بڵاوبونەوەی هەوڵی ساختەكردنی ئەنجامەكان، چەندین مەكۆی گۆڕانمان بینی ( لە ڕێی فەیسبوكەوە) كە بەچەكدار  پڕكرابوون. .. 

ئەم ڕیتمە توڕەیەی كاركردن، پێویستی بەوەیە هەر ئێستا چارەسەر بكرێ. چونكە وەك گوتمان ئایدۆلۆژیایەك بۆ پیرۆزكردنی ئۆپۆزسیۆن خەریكە چەكەرە ئەكات، هاوكات  ئامادەباشیەكی دەرونی هەیە بۆ بەرگری كردنی زبر لەبیروڕاكانی، ئیدی هەموو ڕەگەزەكانی گۆڕانی ئەو حاڵەتە بۆ مەترسی ئەمنی و شڵەژانی كۆمەڵایەتی لە ئارادان.. ئەم مەترسیە لەدوای كاك نەوشیروان گۆڕان دەخاتە دۆخێكی ترەوە... بۆیە گرنگە كاك نەوشیروان تاكو خۆی لەژیان و لەكایەی سیاسیدایە، دەست بەپرۆسەی گۆڕینی جەوهەری بزوتنەوەی گۆڕان بكات.بێ گومان دوای ئەو ئەركەكە قورستر ئەبێت و ئەزمونی بەرچاوی حیزبەكانی تری كوردستان لەبەرچاوە.