76 ساڵ لەمەوبەر و لە بەرەبەیانێكی وەك ئەمڕۆ 2ی ئایاردا، منداڵێك لەدایك بوو، باوكی ئەو منداڵە شاعیرێكی ناوداری كورد بوو. دواتر خۆیشی بووە یەكێك لەو شاعیرە دیارانەی كورد كە لە شیعری كوردیدا، ڕوخسارێكی پرشنگدارە.
تا خۆی لە ژیاندا مابوو، لە هەر شوێنێك بووایە، یادی ئەم ڕۆژەی بە شێوەیەك دەكردەوە، كە كۆچی دوایی كرد، كەس نییە ئەو یادەی بكاتەوە. ئەمەش رێك وەك ئەو هەستەی خۆی بوو لە ژیاندا كە هەمیشە لەوە دەترسا لە چاوان ون بێت و خوێنەرەكانی بیریان بچێتەوە. هەموو ساڵێك كە 2ی ئایار دێت، من ئەم شیعرەیم بەبیردێتەوە كە بۆ یادی لەدایكبوونی خۆی نووسیویەتی:
من ناوم خەونە
خەڵكی وڵاتی ئەفسوونم
باوكم شاخە و
دایكم تەمە
من لە ساڵێكی مانگ كوژراو
لە مانگێكی هەفتە كوژراو
لە ڕۆژێكی سەعات كوژراودا
دوای شەوێكی ئاوس بە "با"
دوای شەوێكی پشت كۆماوەی هەوراز بە كۆڵ
بەرەبەیانێكی زامدار
لە شەفەقێكی كەسكەوە
وەك گزنگێكی خوێناوی كەوتمە خوارێ
و داگیرسام و بووم بە مۆمێك
گڕ بە مل و
بووم بە پرسێك
دەم بە هاوار
شێركۆ بێكەس، ئەو مرۆڤەی هەمیشە لە دەنگی مەرگ و بیرچوونەوە دەترسا، دەیویست هەمیشە كارەكتەرێكی سەرەكیی ژیان و رووناكییەكی بەردەوام و پرشنگداری نێو ژوورە جیاوازەكانی ژیان بێت. شیعری زۆری دەنووسی، نامەی زۆری دەنووسی، لە كۆڕ و چالاكییە جۆراوجۆرەكاندا زۆر دەردەكەوت.
جارێكیان لە ژوورەكەی خۆیدا لە دەزگای سەردەم، هاوڕێیەكی نزیكی پێی گوت: "كاك شێركۆ ئەم ماوەیە زۆر دەنووسیت. پێم باشە كەمێك نووسین كەم بكەیتەوە، با بەرهەمەكانت زۆر و بۆر نەبن"، ئەویش وەڵامی دایەوە و گوتی خۆیشم دەزانم زۆر دەنووسم، بەڵام ئێمە كوڕی میللەت و نەتەوەیەكین، یادەوەریی خوێنەر و هاووڵاتییەكانمان زۆر كز و لاوازە و زوو شتی بیر دەچێتەوە، من زۆر دەنووسم بۆ ئەوەی پاش خۆم، كەمێك لەو نووسینانە بمێننەوە، دڵنیام كەم بنووسم هیچی نامێنێتەوە.
ئەم بار و هەستە دەروونییە لای شاعیرێك، بۆ ترسان و لەبیرچوونەوەی لای خوێنەرەكانی، مایەی هەڵوێستە و لەسەر وەستانە. رەنگە ئەو هەست و دڵەڕاوكێیەی خۆی پێیگەیشتبوو، لای خوێنەرەكانی بە پێچەوانەوە بێت. ئەگەر نا چۆن ناوی (حاجی قادری كۆیی و نالی و گۆران و وەفایی) و دەیانی دیكە بە نەمری دەمێننەوە، ناوی شێركۆش بە هەمان شێوەو هەرگیز لەبیر ناچێتەوە. بەڵام ئەم ترس و گومانە بەردەوام وەك كابووسێك لەگەڵیدا بوو، هەمیشە زۆر دەینووسی بۆ ئەوەی لەبیر نەچێتەوە و لەبەر چاوان ون نەبێت.
لەماوەی كاركردنمدا لە دەزگای سەردەم، زۆر جار نامەی بچوكی (شێركۆ بێكەس) بۆ من و زۆر لە هاوڕێیانی دیكەی سەردەم هاتووە. سەیرە.. ئەم پیاوە چەند حەزی بە نووسینی شیعر بوو، هێندەش خولیای نووسینی نامە بوو. چ لەكاتی كاركردنی ڕۆژانەی لە دەزگای سەردەم، چ لە ناردنی بۆ هاوڕێكانی. پێموایە ئەگەر گەڕانێكی ورد بكرێت، نامەكانی شێركۆ بێكەس لە شیعرەكانی زیاتر نەبێت، كەمتر نییە. ئەم قسەیە لەخۆڕا فڕێ نادەم، خۆم رۆژانە بینیومە، بۆ ئەندامانی ئەنجوومەنی سەردەم، نووسەرەكان، سەرنووسەری گۆڤارەكان، بەرپرسی چاپخانە، ژمێریاری و...هتد نامەی دەنارد. ئەمە جگە لەوەی هەموو هاوڕێ كۆن و نوێیەكانی نامەی دەستنووسی (شێركۆ بێكەس)یان لایە. شێركۆ پەیوەندییەكی بەرفراوانیشی لەگەڵ كەسایەتییە سیاسییەكان هەبوو، كۆمەڵێك نامەشی لە قۆناغە جیاوازەكانی ژیانیدا لەگەڵ سیاسییە باڵاكانی كوردستان هەبووە.
لە ژیانی ڕۆژانەی كاركردنماندا لە دەزگای سەردەم، هەندێجار كارێكی سادەی بەسەردا دەدای بۆی بكەی، بە نامە بۆی دەنووسیت، یان دوای چەند ڕۆژێك نامەیەكی بۆ دەناردیت و پرسیاری كارەكەی دەكرد كە بەكوێ گەیشتووە. ئەم خولیای نامە نووسینە لای ئەم شاعیرە زۆر سەیر و سەرنجڕاكێش بوو.
پێش نزیكەی ساڵێك لە كۆچی دوایی كاك شێركۆ، بەیانییەك كە هاتم بۆ دەوام، هەورامان، ئەو كوڕە گەنجەی لە ئۆفیسەكەیدا كاری دەكرد، بانگی كردم و گوتی كاك شێركۆ كاری پێتە. چووم و چەند نامەیەكی خۆی پێدام كە لە ڕابردوودا و لە قۆناغی جیاوازی ژیانیدا لەلایەن (چەند كەسایەتییەكی دیاری سیاسی و ئەدەبیی كوردستان) لە قۆناغە جیاوازەكانی ژیانیدا بۆی هاتبوون، گوتی بۆم سكان بكە و لای خۆشت نوسخە هەڵبگرە. ئەو نامانە هی هەریەك لە د.كەمال مەزهەر، ئەحمەد هەردی، خەسرەو خاڵ، نەوشیروان مستەفا و د.كەمال فوئاد بوون. سكانم كرد و لە (سی دی)یەكدا بۆم هێنایەوە. خۆیشم نامەكانم خوێندنەوە. هەر لەو ڕۆژەوە بیرۆكەی چاپكردنی (نامەكانی شێركۆ بێكەس) هات بە بیرمدا. پێمگوت ئەم نامانە و ئەوانەشی ناردووتن بۆ هاوڕێ و دۆستەكانت، با كۆیانبكەینەوە و چاپیان بكەین. پێكەنی و گوتی كات زۆری ماوە. جارێ زووە، بەڵام بیرۆكەیەكی باشە و كاری لەسەر دەكەین.
كاتێك سەیری ئەدەبیاتی نامەی میللەتانی دونیا دەكەیت، سەروەتێكی گەورەی بواری ئەدەبیاتە، بە تایبەتیش نامەكانی نێوان (سترنبێریی نووسەری سویدی و هنریك ئیپسن نووسەری نەرویجی) كە بەچەند بەرگێك بڵاو بووەتەوە، یان نامەكانی نێوان (سامۆیل بیكێت و هاڕۆڵد پنتەر)، نامەكانی نێوان (ئەنتوان چیخۆف و ئۆلگا كنیپەر) و زۆر نموونەی دیكەش لە ئەدەبیاتی نامەی ئەدەبی میللەتاندا هەیە، بەڵام بەداخەوە كورد لە بواری ئەدەبیاتی نامە نووسیندا، یەكجار لاواز و هەژارە. ئەگەرچی چەندین نامەی مەولانا خالید و شێخ مارفی نۆدێ و كاك ئەحمەدی شێخ و شێخ مەحمود و شێخ عوسمانی بیارە و پیرەمێرد و ئەمین زەكی بەگ ماونەتەوە و پارێزراون، بەڵام بەشی هەرە زۆریشیان فەوتاون و لەناو چوون، لە كاتێكدا لەنامەی ئەو كەسایەتییانەوە دەتوانیت قۆناغی سیاسی و رۆشنبیریی ئەو سەردەمە بخوێنیتەوە، لەو بوارەشدا چەند هەوڵێك هەیە.
پاش مردنی كاك شێركۆ، ئەو بیرۆكەیە لای من گەشەی كرد و دەستم كرد بە كۆكردنەوەی نامەكانی، بە ئێستاشەوە سەرقاڵی كۆكردنەوەی نامەكانی ئەوم، خۆشبەختانە پاش ماندووبوونێكی زۆر، بەرگی یەكەمی ئامادەیە و لە مانگی داهاتوودا بڵاودەبێتەوە. خوێنەر لەم بەرگەی نامەكاندا، لە ڕێگەی ئەو نامانەوە دەتوانێت بە ئاسانی و بە ساكاری تێڕوانینی شێركۆ بێكەس بۆ بوارەكانی (شیعر، سیاسەت، نیشتمان، ئازادی، داهێنان، هاوڕێیەتی، وەفا و یادەوەری) و زۆر بواری دیكە بخوێنێتەوە كە ڕەنگە لە شیعرەكانیدا كەمێك ئەستەمتر بێت، بە تایبەتیش بۆ خوێنەرێك زۆر ئاگای لە دونیای شیعری شێركۆ بێكەس نەبێت.
لێرەدا و لەم نووسینەدا كە هاوكاتە لەگەڵ یادی لەدایكبوونی شێركۆ بێكەس، خاڵێك زۆر مەبەستمە ئاماژەی پێ بدەم، ئەویش ئەوەیە كە لە بەرگی یەكەمی نامەكاندا، هەموو نامەكان وەك خۆی دانراونەتەوە، بەبێ ئەوەی دەستكاریی ڕێنووسەكەی بكەم، هەندێ جار وشەیەك یان زاراوەیەكیش بە هەڵە نووسرابێت، ئەمەش لە پێناو پاراستنی ڕاستگۆیی نێو نامەكانە و نەمویستووە بە هیچ شێوەیەك دەستكاریی بكەم، ئەوەندە نەبێت لەكۆی ئەو نامانە، تەنیا چەند ناوێكمان سڕیوەتەوە و یەك دوو دێڕیشمان لابردووە، تەنها لەبەر پاراستنی شكۆی كەسایەتیی ئەو كەسەی كە ناوی هاتووە، یان ڕەنگە لە قۆناغێك لە قۆناغەكاندا، ئەو وتە و دەستەواژانە شیاو بووبێت، بەڵام ئێستا و لەم سەردەمەدا، ئەو دەستەواژە و وشەیە پشێوییەكی كۆمەڵایەتی و سیاسی دروست بكات، بەڵام كە كۆی گشتیی ئەو نامەیە دەخوێنیتەوە، خوێنەر خۆی دەزانێت ئەو كەسە كێیە، بەڵام ئەمە هیچ كاریگەری لەسەر تام و چێژی نامەكان نییە، تا نەخوێنرێتەوە نازانرێت ئەو نامانە بەشی زۆریان چ شاكارێكی گەورەو پڕ تام و چێژ و هەمەڕەنگی ئەو شاعیرەن.
لە كۆتایی كتێبەكەشدا، كۆمەڵێك نامەی بچووك، بەناوی (ئاوێنە بچووكەكان) دانراوە كە نامەی كورت و نامەی ڕۆژانەن، بۆ من و بەشێك لە هاوڕێیانی دەزگای سەردەمی ناردووە لە كاتی كاركردنمان لەو دەزگایە.
ئێستا و پاش تەواوبوونی بەرگی یەكەمی ئەو نامانە، سەرقاڵی ئامادەكردنی بەرگی دووەمی نامەكانم، هیوادارم هەر نووسەر و كەسێك نامەی كاك شێركۆی لایە، بەرگی دووەمی كتێبەكەمان دەوڵەمەند بكات و بۆمان بنێرێت.
ئەم دێڕانە دیاریی منە بۆ دووی ئایار، ڕۆژی لەدایكبوونی شێركۆ بێكەس، ئەو شاعیرە كوردەی تا لە ژیاندا بوو، بە عیشق و ژیاندۆستییەكی زۆرەوە خۆی و خوێنەرەكانی ئەو یادەیان دەكردەوە، كە كۆچی دوایی كرد، ئەو یادە تەنیا لە نووسیندا دەكەینەوە.
تا خۆی لە ژیاندا مابوو، لە هەر شوێنێك بووایە، یادی ئەم ڕۆژەی بە شێوەیەك دەكردەوە، كە كۆچی دوایی كرد، كەس نییە ئەو یادەی بكاتەوە. ئەمەش رێك وەك ئەو هەستەی خۆی بوو لە ژیاندا كە هەمیشە لەوە دەترسا لە چاوان ون بێت و خوێنەرەكانی بیریان بچێتەوە. هەموو ساڵێك كە 2ی ئایار دێت، من ئەم شیعرەیم بەبیردێتەوە كە بۆ یادی لەدایكبوونی خۆی نووسیویەتی:
من ناوم خەونە
خەڵكی وڵاتی ئەفسوونم
باوكم شاخە و
دایكم تەمە
من لە ساڵێكی مانگ كوژراو
لە مانگێكی هەفتە كوژراو
لە ڕۆژێكی سەعات كوژراودا
دوای شەوێكی ئاوس بە "با"
دوای شەوێكی پشت كۆماوەی هەوراز بە كۆڵ
بەرەبەیانێكی زامدار
لە شەفەقێكی كەسكەوە
وەك گزنگێكی خوێناوی كەوتمە خوارێ
و داگیرسام و بووم بە مۆمێك
گڕ بە مل و
بووم بە پرسێك
دەم بە هاوار
شێركۆ بێكەس، ئەو مرۆڤەی هەمیشە لە دەنگی مەرگ و بیرچوونەوە دەترسا، دەیویست هەمیشە كارەكتەرێكی سەرەكیی ژیان و رووناكییەكی بەردەوام و پرشنگداری نێو ژوورە جیاوازەكانی ژیان بێت. شیعری زۆری دەنووسی، نامەی زۆری دەنووسی، لە كۆڕ و چالاكییە جۆراوجۆرەكاندا زۆر دەردەكەوت.
جارێكیان لە ژوورەكەی خۆیدا لە دەزگای سەردەم، هاوڕێیەكی نزیكی پێی گوت: "كاك شێركۆ ئەم ماوەیە زۆر دەنووسیت. پێم باشە كەمێك نووسین كەم بكەیتەوە، با بەرهەمەكانت زۆر و بۆر نەبن"، ئەویش وەڵامی دایەوە و گوتی خۆیشم دەزانم زۆر دەنووسم، بەڵام ئێمە كوڕی میللەت و نەتەوەیەكین، یادەوەریی خوێنەر و هاووڵاتییەكانمان زۆر كز و لاوازە و زوو شتی بیر دەچێتەوە، من زۆر دەنووسم بۆ ئەوەی پاش خۆم، كەمێك لەو نووسینانە بمێننەوە، دڵنیام كەم بنووسم هیچی نامێنێتەوە.
ئەم بار و هەستە دەروونییە لای شاعیرێك، بۆ ترسان و لەبیرچوونەوەی لای خوێنەرەكانی، مایەی هەڵوێستە و لەسەر وەستانە. رەنگە ئەو هەست و دڵەڕاوكێیەی خۆی پێیگەیشتبوو، لای خوێنەرەكانی بە پێچەوانەوە بێت. ئەگەر نا چۆن ناوی (حاجی قادری كۆیی و نالی و گۆران و وەفایی) و دەیانی دیكە بە نەمری دەمێننەوە، ناوی شێركۆش بە هەمان شێوەو هەرگیز لەبیر ناچێتەوە. بەڵام ئەم ترس و گومانە بەردەوام وەك كابووسێك لەگەڵیدا بوو، هەمیشە زۆر دەینووسی بۆ ئەوەی لەبیر نەچێتەوە و لەبەر چاوان ون نەبێت.
لەماوەی كاركردنمدا لە دەزگای سەردەم، زۆر جار نامەی بچوكی (شێركۆ بێكەس) بۆ من و زۆر لە هاوڕێیانی دیكەی سەردەم هاتووە. سەیرە.. ئەم پیاوە چەند حەزی بە نووسینی شیعر بوو، هێندەش خولیای نووسینی نامە بوو. چ لەكاتی كاركردنی ڕۆژانەی لە دەزگای سەردەم، چ لە ناردنی بۆ هاوڕێكانی. پێموایە ئەگەر گەڕانێكی ورد بكرێت، نامەكانی شێركۆ بێكەس لە شیعرەكانی زیاتر نەبێت، كەمتر نییە. ئەم قسەیە لەخۆڕا فڕێ نادەم، خۆم رۆژانە بینیومە، بۆ ئەندامانی ئەنجوومەنی سەردەم، نووسەرەكان، سەرنووسەری گۆڤارەكان، بەرپرسی چاپخانە، ژمێریاری و...هتد نامەی دەنارد. ئەمە جگە لەوەی هەموو هاوڕێ كۆن و نوێیەكانی نامەی دەستنووسی (شێركۆ بێكەس)یان لایە. شێركۆ پەیوەندییەكی بەرفراوانیشی لەگەڵ كەسایەتییە سیاسییەكان هەبوو، كۆمەڵێك نامەشی لە قۆناغە جیاوازەكانی ژیانیدا لەگەڵ سیاسییە باڵاكانی كوردستان هەبووە.
لە ژیانی ڕۆژانەی كاركردنماندا لە دەزگای سەردەم، هەندێجار كارێكی سادەی بەسەردا دەدای بۆی بكەی، بە نامە بۆی دەنووسیت، یان دوای چەند ڕۆژێك نامەیەكی بۆ دەناردیت و پرسیاری كارەكەی دەكرد كە بەكوێ گەیشتووە. ئەم خولیای نامە نووسینە لای ئەم شاعیرە زۆر سەیر و سەرنجڕاكێش بوو.
پێش نزیكەی ساڵێك لە كۆچی دوایی كاك شێركۆ، بەیانییەك كە هاتم بۆ دەوام، هەورامان، ئەو كوڕە گەنجەی لە ئۆفیسەكەیدا كاری دەكرد، بانگی كردم و گوتی كاك شێركۆ كاری پێتە. چووم و چەند نامەیەكی خۆی پێدام كە لە ڕابردوودا و لە قۆناغی جیاوازی ژیانیدا لەلایەن (چەند كەسایەتییەكی دیاری سیاسی و ئەدەبیی كوردستان) لە قۆناغە جیاوازەكانی ژیانیدا بۆی هاتبوون، گوتی بۆم سكان بكە و لای خۆشت نوسخە هەڵبگرە. ئەو نامانە هی هەریەك لە د.كەمال مەزهەر، ئەحمەد هەردی، خەسرەو خاڵ، نەوشیروان مستەفا و د.كەمال فوئاد بوون. سكانم كرد و لە (سی دی)یەكدا بۆم هێنایەوە. خۆیشم نامەكانم خوێندنەوە. هەر لەو ڕۆژەوە بیرۆكەی چاپكردنی (نامەكانی شێركۆ بێكەس) هات بە بیرمدا. پێمگوت ئەم نامانە و ئەوانەشی ناردووتن بۆ هاوڕێ و دۆستەكانت، با كۆیانبكەینەوە و چاپیان بكەین. پێكەنی و گوتی كات زۆری ماوە. جارێ زووە، بەڵام بیرۆكەیەكی باشە و كاری لەسەر دەكەین.
كاتێك سەیری ئەدەبیاتی نامەی میللەتانی دونیا دەكەیت، سەروەتێكی گەورەی بواری ئەدەبیاتە، بە تایبەتیش نامەكانی نێوان (سترنبێریی نووسەری سویدی و هنریك ئیپسن نووسەری نەرویجی) كە بەچەند بەرگێك بڵاو بووەتەوە، یان نامەكانی نێوان (سامۆیل بیكێت و هاڕۆڵد پنتەر)، نامەكانی نێوان (ئەنتوان چیخۆف و ئۆلگا كنیپەر) و زۆر نموونەی دیكەش لە ئەدەبیاتی نامەی ئەدەبی میللەتاندا هەیە، بەڵام بەداخەوە كورد لە بواری ئەدەبیاتی نامە نووسیندا، یەكجار لاواز و هەژارە. ئەگەرچی چەندین نامەی مەولانا خالید و شێخ مارفی نۆدێ و كاك ئەحمەدی شێخ و شێخ مەحمود و شێخ عوسمانی بیارە و پیرەمێرد و ئەمین زەكی بەگ ماونەتەوە و پارێزراون، بەڵام بەشی هەرە زۆریشیان فەوتاون و لەناو چوون، لە كاتێكدا لەنامەی ئەو كەسایەتییانەوە دەتوانیت قۆناغی سیاسی و رۆشنبیریی ئەو سەردەمە بخوێنیتەوە، لەو بوارەشدا چەند هەوڵێك هەیە.
پاش مردنی كاك شێركۆ، ئەو بیرۆكەیە لای من گەشەی كرد و دەستم كرد بە كۆكردنەوەی نامەكانی، بە ئێستاشەوە سەرقاڵی كۆكردنەوەی نامەكانی ئەوم، خۆشبەختانە پاش ماندووبوونێكی زۆر، بەرگی یەكەمی ئامادەیە و لە مانگی داهاتوودا بڵاودەبێتەوە. خوێنەر لەم بەرگەی نامەكاندا، لە ڕێگەی ئەو نامانەوە دەتوانێت بە ئاسانی و بە ساكاری تێڕوانینی شێركۆ بێكەس بۆ بوارەكانی (شیعر، سیاسەت، نیشتمان، ئازادی، داهێنان، هاوڕێیەتی، وەفا و یادەوەری) و زۆر بواری دیكە بخوێنێتەوە كە ڕەنگە لە شیعرەكانیدا كەمێك ئەستەمتر بێت، بە تایبەتیش بۆ خوێنەرێك زۆر ئاگای لە دونیای شیعری شێركۆ بێكەس نەبێت.
لێرەدا و لەم نووسینەدا كە هاوكاتە لەگەڵ یادی لەدایكبوونی شێركۆ بێكەس، خاڵێك زۆر مەبەستمە ئاماژەی پێ بدەم، ئەویش ئەوەیە كە لە بەرگی یەكەمی نامەكاندا، هەموو نامەكان وەك خۆی دانراونەتەوە، بەبێ ئەوەی دەستكاریی ڕێنووسەكەی بكەم، هەندێ جار وشەیەك یان زاراوەیەكیش بە هەڵە نووسرابێت، ئەمەش لە پێناو پاراستنی ڕاستگۆیی نێو نامەكانە و نەمویستووە بە هیچ شێوەیەك دەستكاریی بكەم، ئەوەندە نەبێت لەكۆی ئەو نامانە، تەنیا چەند ناوێكمان سڕیوەتەوە و یەك دوو دێڕیشمان لابردووە، تەنها لەبەر پاراستنی شكۆی كەسایەتیی ئەو كەسەی كە ناوی هاتووە، یان ڕەنگە لە قۆناغێك لە قۆناغەكاندا، ئەو وتە و دەستەواژانە شیاو بووبێت، بەڵام ئێستا و لەم سەردەمەدا، ئەو دەستەواژە و وشەیە پشێوییەكی كۆمەڵایەتی و سیاسی دروست بكات، بەڵام كە كۆی گشتیی ئەو نامەیە دەخوێنیتەوە، خوێنەر خۆی دەزانێت ئەو كەسە كێیە، بەڵام ئەمە هیچ كاریگەری لەسەر تام و چێژی نامەكان نییە، تا نەخوێنرێتەوە نازانرێت ئەو نامانە بەشی زۆریان چ شاكارێكی گەورەو پڕ تام و چێژ و هەمەڕەنگی ئەو شاعیرەن.
لە كۆتایی كتێبەكەشدا، كۆمەڵێك نامەی بچووك، بەناوی (ئاوێنە بچووكەكان) دانراوە كە نامەی كورت و نامەی ڕۆژانەن، بۆ من و بەشێك لە هاوڕێیانی دەزگای سەردەمی ناردووە لە كاتی كاركردنمان لەو دەزگایە.
ئێستا و پاش تەواوبوونی بەرگی یەكەمی ئەو نامانە، سەرقاڵی ئامادەكردنی بەرگی دووەمی نامەكانم، هیوادارم هەر نووسەر و كەسێك نامەی كاك شێركۆی لایە، بەرگی دووەمی كتێبەكەمان دەوڵەمەند بكات و بۆمان بنێرێت.
ئەم دێڕانە دیاریی منە بۆ دووی ئایار، ڕۆژی لەدایكبوونی شێركۆ بێكەس، ئەو شاعیرە كوردەی تا لە ژیاندا بوو، بە عیشق و ژیاندۆستییەكی زۆرەوە خۆی و خوێنەرەكانی ئەو یادەیان دەكردەوە، كە كۆچی دوایی كرد، ئەو یادە تەنیا لە نووسیندا دەكەینەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ