رووداو - هەولێر
دڵسۆز حەمە، نووسەرێكی دیاری كوردە و لە بواری ئەدەب و سیاسەتدا دەنووسێت، خاوەنی دوو دیوانی شیعرییە: (تاقانە یار) و (لە پایزێكدا بمخوازە)، قەڵەمێكی یاخی و ژنێكە لە شیعردا جێی خەمەكانی دەكاتەوە، هەروەها یەكێكە لە ژنە شاعیرە دیارەكان كە دەقی ئیرۆتیكی دەنووسێت و لەم گفتوگۆیەدا باس لە شیعر بەگشتی دەقی ئیرۆتیكی دەكەین و دەچینە دونیای تایبەتی نووسین لای ئەو.
هێرۆ كوردە: با ئاوا دەستپێبكەین، دڵسۆز بۆ دەنووسێت؟
دڵسۆز حەمە: لەڕاستیدا من بۆ خۆم و لەسەر خۆم دەنووسم، لەسەر گومان و ئازارەكانی خۆم دەنووسم وەكو ئینسانێك، لەسەر غەریبی و تەنیایی خۆم دەنووسم وەكو ژنێك كە رۆژانە بەر دڵڕەقییەكانی ژیان و ئەوانی تر دەكەوم، ڕەنگە نووسین تەنها پانتاییەكی ئارامبەخش و هەمانكات چێژبەخشیش بێت بۆ ڕۆحی من كە دەتوانم بڵێم رۆحێكی بریندار و نەخۆشیشە، تەنیا نووسین دەتوانێت ئەو پانتاییەم بۆ فەراهەم بكات كە بە ناخی خۆمدا بچمە خوارەوە و دەست لە برین و گومان و ئازارەكانی خۆم بدەم و قسەیەكم هەبێت لەسەر ژیان و نادادوەرییەكانی، لەسەر ژیان و جوانییەكانی، داڵانی پەنهان و گومانەكانی خۆم بگەڕێم و خۆم بم، ژنێكی ڕەها و زوڵال بەبێ دەمامك و هەموو ئەو سیفاتانەی نامەوێت لەژێر جەبر و فشاردا هەڵگریان بم بۆ ئەوەی بتوانم لەگەڵ ئەوانی تردا بژیم و قەبوڵم بكەن، تێگەیشتنی بەینی مرۆڤەكان درۆیەكی ئەبەدییە كە دەشێت بەختەوەریی ساختەی لەسەر بینا بكرێت، شتێك نییە لە پەیوەندییە مرۆییەكاندا بەناوی تێگەیشتن و سەمیمیبوون و نزیكی، بەتایبەت بۆ ئەو ڕۆحانەی شەڵاڵی ئازار و برینی گەورەن، هەڵگری هۆشیارییەكی قووڵترن بۆ ژیان و دنیا، جارێ لەناو ئەم جڤاكە پاشكەوتووە سەرەتاییەی ئێمەدا كە پڕی دڵڕەقی و توندوتیژی و چاودێریكردنە، مرۆڤ هەمیشە بوونەوەرێكی تەنیایە، بوونەوەرێكی پەراوێزخراوی بیرلێنەكراوەیە، جا ئەگەر تۆ هۆشیار بیت بەم شتانە و هاوكات ژیانیشت برینی گەورەی تێزابێت، ڕۆحت بریندار بێت و بە چاوێكی هۆشیارتر و كراوەترەوە ژیان ببینی، بە ئاگاییەكی ترەوە ئەو پانتاییانە بدۆزیتەوە كە ژیان و بوون هەڵگریەتی، كاتێك بەخۆت دەزانی كەوتوویتە ناوەڕاستی تەنیاییەوە، ناوەڕاستی گفتوگۆی تاكلایەنە لەهەمبەر ژیان و پێدراوەكانی، ئەو قسەكردنە لەگەڵ ژیان بۆخۆی هونەرە، ڕەنگە لە وێنەكێشاندا بەرجەستە بێت، ڕەنگە لە نووسیندا، من دەنووسم هەتا تەنیایی خۆم ئاوەدان بكەمەوە، دەنووسم هەتا نائومێدییەكانی خۆم جوانتر بكەم و مانایەك بدەم بە تەنیایی و پێكەوەبوون و ژیان و ئینسانبوونم، هەربۆیە نووسین ڕێگاچارەیەكە بۆ هەڵسوكەوت لەگەڵ ئەم دۆخەدا، ئەوەش بزانە كە خودا هەندێك لە مەخلوقەكانی خۆی بۆ نووسین خەلق كردووە هەتا بەتەنیشت ژیانی واقیعیدا هەمیشە ژیانێك و پانتاییەكیش هەبێت بۆ خەیاڵ و فانتازیا و فراوانكردنی بینین كە لەسەردەستی نووسەرەكاندا دێتەدی. تۆ بزانە لە مێژووی ئینسانیدا چەندە شەكسپیر و دۆستۆیفسكی و شێركۆ بێكەس هەیە و دەكرێت دووبارە ببنەوە؟ من دەنووسم هەتا بتوانم لەگەڵ ژیان هەڵبكەم، پەنجەرەی تازە و دنیای جوانتر لە جێگایەكی تر بخولقێنم كە دەستكردی خۆم و دنیابینیی خۆم بێت بۆ جوانتركردنی ژیان، لەمە زیاتر زەحمەتە چاوەڕوانی زیاتر بكەین لە نووسین، بەتایبەتی لەم ڕۆژگارەدا كە ڕۆژگاری دیجیتاڵ و دنیای ئەلیكترۆنی خەریكە فانتازیا و ڕۆحی ئینسان داگیر دەكات و هەموومان لەبەردەم هەڕەشەی تەنیاییەكی بكوژداین .
هێرۆ كوردە: باسی نهێنیی نووسینی خۆتمان بۆ بكە، كەی دەنووسیت و چۆن دەنووسی و ئەو خووە تایبەتە چییە لە كاتی نووسین پەیڕەوی دەكەی؟
دڵسۆز حەمە: ڕەنگە گرنگترین نهێنیی نووسینی دەقێكی سەركەوتوو ڕاستگۆیی و گوزارشتی ڕاستەقینە بێت لە هەست و كەینونەی مرۆڤ ، نیشاندانی مرۆڤ و ڕەهەندە پەنهانەكانی وەكو خۆی، دوور لە كاریگەریی ئایدیۆلۆژی و مۆتیڤی ئاینی و دنیابینییەكی سیاسی تایبەت یان گونجاندنی لەگەڵ دروشم و ڕوئیایەكی ئەخلاقی یان هەرجۆرە شێوازێكی بیركردنەوە وەكو ئەوەی سەدەیەك ئەدەبی دنیا كەوتبووە ژێر كاریگەریی سۆشیالیزم و ڕیالیزمی سۆشیالیستی و ئەدەبی كرێكاری و ئەمجۆرە شتانەی كە ڕۆحی نووسین، ڕۆحی خەیاڵ و پرسیار و گومان لە نووسیندا دەكوژن، نهێنیی نووسین مانای گومان و دۆزینەوەی پانتایی و پرسیاری تازە، مانای پێخستنە ئەو جێگایانەی كە حەرام و بڤە و قەدەغەیە، مانای گومانكردن لە موقەدەس، پرسیاركردن لەو پێدراوانەی پرسیاركردن لێیان حەرامە، نهێنی نووسین مانای گومانی بەردەوام و قووڵبوونەوە، مانای ڕازینەبوونی ئەبەدی، ڕامانی ئەبەدی و گەڕانی ئەبەدی، ڕەنگە تەنها نهێنیی جیاواز خەیاڵكردنم بێت وەكو ژنێك، من هەمیشە وەكو ژنێكی ئینسان، ئینسانێكی ژن لە ژیان و جوانییەكان ڕادەمێنم، نامەوێت لەكەسی تر بچم و كەسیش بانگ ناكەم لە من بچێت، هەمیشە ئەو دەقانەی گوزارشت لە ڕاستگۆترین ئازار و هەستەكانی ئینسان دەكەن، ئەوانەن كە زووتر دەگەنە ئەوانی تر و بیرناچنەوە، هەربۆیە پێموایە نهێنیی دەقی سەركەوتوو ئەوپەڕی ڕاستگۆییە لە بەیانكردنی ناخی ئینسان، بێ هیچ جوانكردن و گونجاندنی ئایدیۆلۆژی و ئەخلاقیی تایبەت.
هێرۆ كوردە: گرنگترین خاڵی نووسین بۆ تۆ چییە؟
دڵسۆز حەمە: جگە لە خەیاڵ و پرسیاری گەورە، گرنگترین پایە بۆ نووسینی دەقێكی سەركەوتوو زمانە، زمان دەیان ڕەهەندی گرنگی هەیە كە دەوڵەمەندیی خەیاڵ و فراوانیی بیركردنەوە و چڕیی دەربڕین فەراهەم دەكات، زمان پاشخانی بەهێز و بناغەی بەهێزی هەموو دەقێكە. لە دەرەوەی زمان شتێك نییە بەناوی دەق، خەیاڵ و زمان دوانەیەكی ئامادەن لە دەقی سەركەوتوودا، ئەمەش بە خوێندنەوە و قووڵبوونەوە و فێربوونی بەردەوام بەرهەم دێت، پێت سەیر نەبێت كە یەكێك لە هۆیەكانی كەمیی نووسەری گەورە لەم كولتوورەی ئێمەدا نەزانینی زمانە، قسەكردن بە كوردی بە مانای زمانزانین نییە، زمانزانین پرۆسەیەكەی فەرهەنگی و ڕۆشنبیری و پەروەردەیی زۆر گرنگ و درێژە، پرۆسەیەكە پەیوەستە بە پاشخانی ڕۆشنبیری و قووڵایی بیركردنەوە لە كولتوورە جیاوازەكاندا، ئێمە زمانێكی دەوڵەمەند و زیندوومان هەیە، بەڵام هێشتا لە قۆناغی خۆڕسك و خۆژیاندندایە، هیچ دەزگا و دامەزراوەیەكی زانستی نییە لە خەمی زمان و بەرپرسیارێتی گەشەكردنی زماندا بێت وەكو پڕۆسەیەكی كولتووری و پەروەردەیی و نەتەوەیی، هەربۆیە لەبەردەم جڤاكێكی لاڵ و بێزمان و نەخوێندەوار و كوردینەزانداین، تەنها لە پانتایی ئەدەبی كوردیدایە زمانی ئێمە هەست بە نرخ و بەها و جوانیی خۆی دەكات و هەناسە دەدات، خاڵێكی جەوهەریتر، نووسین دەبێت هەڵگری خەمە ئینسانییەكان بێت، ئەو پانتایی و پێچیدە پەنهان و دوورەدەستانەی ئینسان كەشف بكات كە بەچاوی ئاسایی نابینرێن، نووسین هەڵكردنی چرای پرسیار و ڕاخستنی گومانە، بەرد و درەخت و هەور لە دەقێكدا مانا و ناسنامە و ڕەهەندی تر وەردەگرێت، نیشتمان و دادوەری و ڕق و خۆشەویستی و ناپاكی و خیانەتكار، ڕەوشت و بەهاكان ڕەهەند و دەلالاتی تر هەڵدەگرن، نووسین دەبێت دەقێكی جوان بێت، دەقێكی ئیستاتیكی، لەڕێی زمان و چڕیی وێنە، شێواز و زمانی نووسین خوێنەر سەرسام بكات و چێژبەخش بێت بە خوێنەرەكانی.
هێرۆ كوردە: ئیرۆتیك هەم بەرهەمی ئەڤینە و هەم خودناسی و جەستەناسی، هەم بەرهەمی خەمگینی و خەمۆكی، لای تۆ چۆن دەخوڵقێت؟
دڵسۆز حەمە: پێموانییە كە ئیرۆتیك بەرهەمی خەمۆكی و خەمگینی بێت، بەڵكو بە پێچەوانەوە، خەمگینی و خەمۆكی دوو بكوژی گیانی ئیرۆتیكی و حەزی سێكسین لە دەروونی ئینساندا، بەڵكو ئیرۆتیك و ئارەزووی ئاوێزان و جووتبوونی ڕۆحی و جەستەیی و سێكس بەشێكی گرنگ و فراوانی ژیاندۆستی و ڕۆحێكی تەندروستە، خودا بە چێژ و بەخشینی چێژ و دنیایەكی ئیرۆتیكانە پاداشتی زاهید و عابیدەكانی خۆی دەداتەوە كە تەواوی ژیانیان بۆ ئەو پاداشتە تەرخان دەكەن، هۆكارێكی تێكشكاوی و لاوازی و خەمۆكی و خەمگینیی ئەم جڤاكانەی ئێمە بەرهەمی ئەو چەپاندنە ڕۆحی و جەستەیی و دەروونییەیە كە ئینسانی ڕۆژهەڵاتی ناوەڕاست گیرۆدەی بووە، چەپاندن و داخستنی دەرگای ئاسنین لەسەر پانتاییەكانی پەیوەست بە هەموو ڕەهەندە جەستەییەكانی مرۆڤ و كۆدە ئیرۆتیكییەكانی بەو شێوازە ترسناكەی لە دنیای ئێمەدا هەیە، فاكتەرێكە بۆ بەرهەمهێنانی ئەو هەموو مرۆڤە گرژ و مۆن و خەمگین و دەروون شپرزە و شێواوەی لەسەر شەقامەكان ڕێ دەكەن، لە بەرهەمهێنانی ئەو هەموو توندوتیژی و بێڕێزی و تاوانانەی بە ناوی عیشق و خۆشەویستییەوە ڕۆژانە دووبارە دەبنەوە، لە بەرهەمهێنانی ئەو هەموو پەیوەندییە ناشرین و لەرزۆك و بێهێزانەی لە نێوان ژن و مێردەكاندا هەیە، ئینسانی ئێمە لەڕووی چۆنیەتی ئەزموونكردنی ژیان و ئازادیی جووڵە و چێژی ژیانەوە ژیانێكی هەژارانە دەژی ئەگەر لە كۆشكەكاندا بێت یان لە خانووە بچووك و قوڕەكاندا، چونكە گرنگترین پانتایی ئینسانی و ڕۆحی لێ قەدەغەكراوە لەژێر هەڕەشە و فشاری خیتابە جیاوازەكانی كولتوور و فەرهەنگ و نەریت و خیتابی ئاینیش.
بیرت نەچێت كە ئیرۆتیكا و جووتبوون و خۆشەویستی هونەرێكی گرنگی ژیانە، هونەرێكە كە پەیوەستە بە گەشەی فەرهەنگی و پەروەردەی زهنی و ئەخلاقی و ژیاندۆستی گشتیی ئینسانەوە، ئێمە ئەو جۆرە هونەرە نەك نازانین و پەروەردە نەكراوین كە فێر بین، بەڵكو پێچەوانەكەی فێركراوین كە دژی ژیان و عەشق و جوانی بین، بۆیە لەبەردەم جڤاكێكداین زیاتر لە نەخۆشخانە دەچێت وەك لە كۆمەڵگایەكی ئینسانی، بەدەگمەن بەختەوەری دەبینیت لە پەنجەرەی ماڵەكانەوە دیاربێت.
خەمۆكی و ئیرۆتیكا دوو دوانەی دژی یەكترن، بەڵكو ئیرۆتیكا و خۆشبەختی، ئیرۆتیكا و ژیاندۆستی یەكتر بەرهەم دێننەوە و ڕەهەندێكی قووڵتر و مرۆڤانەتر دەبەخشنە پەیوەندیی ژن و پیاو، خۆشەویستی و عەشق لە بەیەكگەیشتنی جەستەكاندا دەگاتە دوا قۆناغی كەماڵ و جوانی و باڵاترین ئاستی ئینسانی، لە عەشقدایە كە مرۆڤ دەگاتە كەماڵ و لە جووتبوونی فیزیكی و ڕۆحیدایە كە مرۆڤ دەگاتە باڵاترین ئاستەكانی خەللاقیەت و ئینسانیی خۆی.
هێرۆ كوردە: نووسینی دەقی ئیرۆتیكی چێژێكی تایبەتی هەیە، چونكە دەستبردنە بۆ دونیایەكی پەنهان و نیمچە قەدەغە، تۆ تاچەند لەكاتی نووسینی دەقێكی وەهادا خەیاڵت دەخرۆشێ؟
دڵسۆز حەمە: لای من نووسینی هەر دەقێك چێژ و ئازار و جوانیی خۆی هەیە، لای من عەشق مانای ئیرۆتیكا، ئەڤین مانای جووتبوونی ئەبەدی لەگەڵ مەعشوقە، خۆشەویستی جیاناكرێتەوە لە سێكس، بێگومان دەستبردن بۆ ئەم پانتاییە پەنهان و تاریكانەی ئینسان جوانی و زمانی خۆی هەیە، گرنگترین خاڵێك لەدیدی مندا، نووسینی دەقێكی ئیرۆتیكی جیاوازە لە نووسینی دەقێك یان شیعرێك بە مەبەستی ورووژاندن و سیخناخكردنی بە وشەی سێكسی و گوزارشتی ئاستنزم، وەكو لەم دواییانەدا لە دەقی هەندێك ژندا بەناوی شیعرەوە بڵاودەبێتەوە (بە مانای ئەمانە زۆر جورئەتیان هەیە باسی سێكس دەكەن لە شیعردا!) لەڕاستیدا ئەمە كارەساتێكی نەك شیعری، بەڵكو مێدیایی و فەرهەنگی و پەتایەكی كوشندەیە دنیای نووسین و هونەریی ئێمەی گرتووەتەوە (پەتای سێكساندنی دەق)، ئەمەش درێژكراوەی ئەو فەرهەنگە دواكەوتوو و بێئاگا و بێهونەرەیە كە ئیرۆتیكا و هونەری عەشق كورت دەكاتەوە بۆ مانا هەرزانەكانی سێكس و بەبازاڕكردنی هەست و بێنرخكردنی جەستە، تەنككردنەوەی هەستی قووڵ و هەڵگێڕانەوەی ماناكانی عەشق و ئەڤینداری بۆ ئاستە نزم و سادەكانی پەیوەندی، بەهەرحاڵ جیاوازیی زۆرە لەنێوان پۆرنۆ و ئیرۆتیكا، لەنێوان عەشق و حەزی ڕووت، جیاوازیی زۆرە لەنێوان خۆشەویستی و عاشقبوونی ڕۆحی و حەزكردن لە خۆشەویستی خۆی. گرنگ لێرەدا بەرهەمهێنانی دەقێكی هونەرییە، شیعرێكە كە فەزایەكی ئیرۆتیكی هەبێت و سیحرێكی دەروونی و ئینسانی لە زهنی خوێنەردا بەجێبهێڵێت، خۆ دواجار ئەگەر هونەر یان شیعر وەزیفەیەكی هەبێت، پەروەردەكردنی ڕۆحی و بەخشینی چێژ و پانتایی جوانترە بە خوێنەر بە تەنیشتی فەزای ڕاستەقینەی ژیانەوە، بەدرێژایی مێژوو دەقی ئیرۆتیكی نزیكترین دەقە لە ئینسانەوە، چونكە ڕەنگە بە جیاوازیی دنیابینییەكانیشمانەوە بەڵام وەكو یەك هاوبەش بین لە فەرهەنگ و بەها هاوبەشەكاندا، بەڵام پانتایی ئیرۆتیكا لە ناخی هەر مرۆڤێكدا پانتاییەكی یونیكە و تایبەتە بە خۆی و لە كەسی تر ناچێت.
هێرۆ كوردە: لە شیعری (موبەق) دا كە ساڵی 2010 بڵاوكراوەتەوە، بەجۆرێك لە جۆرەكان خەمگینی بەرامبەر بە نووسین بە شیعرەكەوە دیارە كە ئێمەی ژنانی نووسەر كەمترین كات بە نووسین دەدەین و لە بەرامبەردا خەیاڵی فراوان و وزەی زۆرمان بۆ كاری ماڵە، ئەمە بۆ كەمتەرخەمی بەرامبەر بە نووسین دەگەڕێتەوە یان ئەو دۆخەی تێیكەوتووین كە هەم كاری دەرەوە دەكەین، هەم ماڵ و ئەركی دایكایەتیش؟
دڵسۆز حەمە: ئازیزی من، خراپترین جۆری چەوساندنەوە و ئازاردانی ژنان، نامرۆڤانەترین شێوازەكانی پەراوێزخستن و نادیدەكردنی ژنان لەناو پانتایی سیاسەت و ماڵەكاندا نییە، بەڵكو لەناو دنیای هونەر و داهێنان و ڕووناكبیریدایە، بەسیاسیكردنی جڤاكی كوردی ئەم ڕاستیەی خستووەتە تاریكییەوە، ئەو چەوساندنەوەیەی كە ژن لە پانتایی داهێنان و نووسین و شیعر و هزردا ڕووبەڕووی دەبێتەوە، لە سیاسەت و بازرگانی و هیچ پانتاییەكی تردا بەرەوڕووی نابێتەوە!، نێری كورد بە ڕووناكبیرەكانیشەوە ئەو تێكستە ناخوێنێتەوە كە ناوی ژنێكی بەسەرەوەیە، بەقەدەر ئەوەی ئێمە بە گوێمان عاشقی شاعیر و نووسەرە پیاوەكان دەبین، ئەوەندە نێری كورد بە نووسەرەكانیشەوە لە ژنێكی قەڵەمبەدەست و ڕووناكبیر تەریك دەگرن و قەبوڵی ناكەن، ئەوەندەی ژن بە ناهۆشیارەكانیشەوە جۆرێك ڕێز و سەرسامییان هەیە بۆ پیاوە بەناوبانگ و نووسەرە ناودارەكان، ئەوەندە نێری كورد ناوبانگ و هەڵكەوتوویی ژنێك بێزاری دەكات، ڕەنگە لە سیاسەتدا حیزبێك، گرووپێك، پیاوێك پشتیوانی لە ژنێك بكات، بەڵام لە دنیای داهێنان و نووسین و بەرهەمهێنانی مەعریفەتدا بەدەگمەن پیاوێك پشتیوانی لە ژنێك دەكات. بەرهەمی ئەدەبی و داهێنانی ژنان بە جددی وەرناگیرێت، دەزگا و دامەزراوە ڕووناكبیری و مێدیایی و كولتوورییەكانمان هەر پیاو بەڕێوەی نابات، بەڵكو پیاو مۆنۆپۆلی دنیای داهێنان و بەشداریكردنی دنیای ڕووناكبیریی ئێمەیان كردووە، ژن بوونەوەرێكی بەخێرهاتوو نییە لەم دنیا پیاوانەیەدا، هەربۆیە نووسین جۆرێكە لە نووسینەوەی نامورادی، من مەبەستم لە ژنی جددیە، ئەوانە ناڵێم كە لە ناهۆشیاری و بێئاگایی خەڵك و سادەگۆیی و ناهۆشیاریی و عەممارەپۆیی دەزگا و دنیای ڕەوشەنبیریمان كەڵكیان وەرگرتووە و ڕژاونەتە مەیدانەكە، هەمیشە موبەق جێگایەكی سیمبۆلیك بووە بۆ چەوساندنەوەی ژنان، چونكە كات و وزەیەكی زۆر لەوێدا بەسەر دەبات لە پێناوی خزمەتكردنی ئەوانی تردا بێئەوەی لەڕووی یاسایی و كۆمەڵایەتی و تەنانەت ئینسانیشەوە دان بەم هەوڵ و كۆشش و كات و وزەیەدا بنرێت كە لەم فەزایەدا سەرف دەبێت، هەربۆیە جێگایەكی سیمبۆلیك بووە بۆ چەوساندنەوەی ژن، بەڵام بەدیوەكەی تریشدا موبەق یان هەر فەزایەكی ترە كە مرۆڤ تێیدا تواناكانی خۆی قەتیس بكات، نووسین و شیعر و داهێنان پێویستی بە فەزای ئازاد هەیە، بە ئەزموونكردنی ژیان، بە خوێندنەوە و كاتی زۆر بۆ خۆپەروەردەكردن و خوێندنەوە و سەفەری خەیاڵ، پێویستی بە فەزایەكی ئازاد هەیە بۆ جووڵە و سەفەركردن و بینینی ژیان، بەڵام كامە ژنێك ئەو فەزایەی بۆ فەراهەم دەبێت و بۆی فەراهەم بووە؟
موبەق نووسینەوەی نائومێدیی خۆمە لەنێو دوو دنیادا: دنیای خەیاڵی داهێنان و دنیایەكی تریش كە وەكو ژنێك لە واقیعێكی بێخەیاڵدا دەڕەتێین! ئاخر چونكە داهێنان و خەیاڵ و نووسین و دنیای مەعریفە و پرسیار و گومان ترۆپكی ئازادی و هۆشیاریی ئینسانە، هەر بۆیە كۆمەڵگا بە هەموو ئامرازەكانی خۆی بەرەنگاری دەبێتەوە، تۆ دەزانیت هەرگیز ژنێكی نووسەر بەهەمان چاوی پیاوێكی نووسەرەوە تەماشا ناكرێت، بەهەمان ئاستی مافەكان دەزگا و دامەزراوەكان هەڵسوكەوتی لەگەڵ ناكات، تەماشاكردنی سێكسیستانەی پیاوان هەمیشە لەمپەرێكی ئامادەیە لەبەردەم ئامادەیی مەعریفی و هونەریی ژندا، ژنیش بەگشتی مۆتیڤی ململانێ و كەڵكەڵەی داهێنان و ئازارەكانی گومان و پرسیاركردنی كەمترە !
هێرۆ كوردە: رەخنەگر، حەمەسەعید حەسەن لەبارەی شیعری تۆ دەڵێ: "دڵسۆز حەمە یەكێكە لەو ژنە شاعیرانەی خاوەنی زمانی شیعریی تایبەت بەخۆیەتی و لایەنێكی گەشی شیعری وی، راستگۆییە"، مەبەست لە راستگۆیی لە شیعردا چییە؟ ئایا ئەمە پێچەوانەی خەیاڵكردنە؟
دڵسۆز حەمە: من شانازی بە بۆچوونی مامۆستا حەمەسەعید حەسەنەوە دەكەم وەكو یەكێك لە گرنگترین نووسەر و ڕەخنەگرەكانی ئێمـە، بەڵام ئازیزم خەیاڵ لووتكەی ڕاستگۆیی ئینسانە نەك پێچەوانەكەی، ئێمە هەمیشە لە ماڵی خەیاڵدا خۆمانین، لە خەیاڵدا هەموو ئەو شتانە دەڵێین و دەكەین كە لەواقیعدا ناوێرین بیانڵێین و بیانكەین. چەندە زمانی گوتن و دەربڕینی دەقەكانمان لە خەیاڵ نزیكتر بێتەوە ئەوەندە لە ڕاستگۆیی نزیك دەبینەوە، بوێرترین و ڕاستگۆترین دەق ئەوەیانە كە بتوانێت دەقاودەق خەیاڵ بنووسێتەوە وەكو ئەوەی دنیا و خۆمانی تێدا دەبینین !
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ