Aras Bradosty, a graduate of Hawler Medical University, has been working as a presenter and health anchor at Rudaw Media Network since 2012 and has managed Rudaw’s Health Desk since the channel began airing on May 29, 2013.
Aras Bradosty, a graduate of Hawler Medical University, has been working as a presenter and health anchor at Rudaw Media Network since 2012 and has managed Rudaw’s Health Desk since the channel began airing on May 29, 2013.
ئەوانەی بە حیسابی خۆیان کێبڕکێ لەگەڵ رووداو دەکەن وادەزانن کە رووخسارێکی رووداو دەبەن لای ئەوان بە هەمان سەنگینییەوە دەردەکەوێتەوە، ئاخر بینەری ئێوە هەر ئەو کوردەیە کە پێیوایە بەرد لە جێگەی خۆی نەبێت سەنگ و قورسایی لەدەستدەدات. مەگەر کەناڵەکەتان بە زمانی فەرەنسی پەخش دەکات؟
پێشكێشكاری بەرنامەی هەتوان بوو لە رووداو، كە شەش مانگ بەردەوام بوو و بەهاوبەشی لەگەڵ دكتۆر لۆنا قەرەداخی. دوای ئەوە دەستیكرد بە پێشكێشكردنی بەرنامەی نۆڕین بەشێوە و نێوەڕۆكێكی جیاواز. خۆی پێشكێشكار و پرۆدیوسەری بەرنامەی نۆڕین بوو لە ساڵی 2014ەوە.
نۆڕین بەرنامەیەكی هەفتانەبوو، لە ماوەی شەش ساڵدا 250 ئەڵقەی پێشكێشكران. نۆڕین بە سێ قۆناخی جیاوازی كۆنسێپت و نێوەڕۆكدا تێپەڕیوە. هەر هەفتەیەك بەشێوەیەكی ورد و زانستی بایەخی بە مژارێك دەدا. پڕبینەرترین بەرنامەی تەندروستی بوو لە میدیای كوردی دا. نۆڕین یەكێك لە سەركەوتووترین بەرنامەكانی رووداوە و لە سۆشیالمیدیای رووداودا خاوەنی ژمارەی پێوانەیی بینەرە، كە لە یەك هەفتەدا زیاتر لە دوو ملیۆن و 500 هەزار بینراوە.
پێشكێشكاری بەرنامەی (رەمەزاندروستی) بووكە بەرنامەیەكی تەندروستی گشتی بوو و لە مانگی رەمەزاندا پێشكێشدەكرا. ئەم بەرنامەیە لە ساڵی دووەمیدا بووە پڕ بینەرترین بەرنامەی میدیای كوردی لە رەمەزاندا، ساڵی 2019 لە ماوەی مانگی رەمەزاندا تەنیا لە سۆشیالمیدیای رووداو زیاتر لە 21 ملیۆن جار بینراوە.
بێژەر و پرۆدیوسەری هەواڵە تەندروستییەكانی رووداو بووە لە یەكەم رۆژی پەخشی رووداوەوە. تاوەکو ئێستاش لە كاری بێژەری بەردەوامە، رووماڵی گرنگترین رۆژ و بۆنە جیهانییە تەندروستییەكانی كردووە.
دوای دابڕانێکی کورت، دکتۆر ئاراس ئێستا بە بەرنامەیەکی نوێ و جیاوازەوە هاتووەوە سەر شاشەی رووداو، بەرنامەکە شۆیەکی پزیشکییە بە ناوی "دکتۆر ئاراس"، بەرنامە نوێیەکەی دکتۆر ئاراس برادۆستی پێویستیی تەنیا بە هەفتەیەک بوو تا ریکۆردێکی نوێ لە سۆشیەڵ میدیای رووداودا تۆماربکات و ڤیدیۆکانی دووەم بەرنامەی لە ماوەی 24 کاژێردا زیاتر لە یەک ملیۆن جار بیندران، ئێستا بەرنامەکەی بەردەوامە و هەفتانە لە رۆژانی شەممە پێشکێشدەکرێت.
بەرپرسی دێسكی تەندروستی رووداوە، بەرهەمەكانی ئەم دێسكە جگە لە بەرنامەی نۆڕین و دکتۆر ئاراس، هەواڵی رۆژانەی تەندروستییە كە لە میدیای كوردیدا تەنیا رووداو خاوەنی بوولتەنی تەندروستییە. لاپەڕەی تەندروستی لە رۆژنامە، ماڵپەڕ و سۆشیالمیدیای رووداو پڕ خوێنەرترین و متمانەپێكراوترین سەرچاوەی تەندروستین لە میدیای كوردیدا، لە رادیۆی رووداویش بەرنامەی نۆژدار و بوڵتەنی هەواڵە تەندروستییەکانیش بەرهەمی دێسکی تەندروستین، دكتۆر ئاراس سەرپەرشتی گشتی هەموو بەرهەمە تەندروستییەكانی تۆڕی میدیایی رووداو دەكات.
ئاراس نەجمەدین عەبدولغەفوور (دكتۆر ئاراس برادۆستی)، ساڵی 1987 لە سۆران لەدایكبووە. ساڵی 2011 كۆلێژی پزیشكی زانكۆی هەولێری پزیشكی تەواوكردووە. فیسیۆلۆژی مێشكی لە زانكۆی تەفتسی ئەمریكا لە 2011-2012 خوێندووە. ساڵی 2014 فیسیۆلۆژی كلینیكیی لە زانكۆی ئوپساڵای سوێد خوێندووە.
لە ساڵی2010 وەك ئەندامی هەمیشەیی پەیمانگەی سەركردایەتی جیهانی "The Institute for Global Leadership" لە ئەمریكا هەڵبژێردرا. ئەندامی دەستەی دامەزرێنەران و یەكەم سەرۆكی رێكخراوی IFMSAبووە لە كوردستان. ماوەی دوو ساڵ سەرۆكی پزیشكانی نیشتەجێی هەولێر بووە. سەرۆكی (گرووپی پارێز بۆ ئەرك و مافەكانی نەخۆش) بووە. ئەندامی دەستەی نووسەرانی گۆڤارەكانی تیمار و هەتوان بووە.
دكتۆر ئاراس برادۆستی لە یەكەمین رێوڕەسمی هەڵبژاردنی پزیشكی ساڵ، بەهۆی رۆڵی لە بەرزكردنەوەی ئاستی هۆشیاری تەندروستی خەڵكی كوردستاندا، لەلایەن وەزارەتی تەندروستی هەرێمی كوردستان، رێكخراوی تەندروستی جیهانی و رێكخراوی ژیانی تەندروستی، وەك پزیشكی ساڵی 2016 لە هەرێمی كوردستان هەڵبژێردرا.
ساڵی 2019 وەك سەرۆكی یەكەمین لووتكەی تەندروستیی كوردستان دەستنیشانكرا. لووتكەكە بە بەشداری نوێنەرانی 13 وڵاتی جیهان و زیاتر لە 600 پزیشك و كارمەندی تەندروستی لە شاری هەولێر سازكرا، ئەنجامی لووتكەكە دانانی نەخشەڕێگەی بەهێزكردنی كەرتی تەندروستیی هەرێمی كوردستان بوو.
رۆڵێكی گەورەی لە كاری خێرخوازیدا هەیە، لە ڕێگەی پەیوەندییەكانی بەشداری لە چەندین پڕۆژەی خێرخوازیدا كردووە، لەوانەش دابینكردنی دەرمانی نەخۆشییە درێژخایەنەكان بۆ ئاوارە و پەنابەرانی كامپەكان لە باشووری كوردستان، رزگاركردنی ژیانی چەندین منداڵ بە دابینكردنی چارەسەرە پزیشكییە خێراكان بۆیان .
خاوەنی بیرۆكە و سەرپەرشتیاری پڕۆژەی تواناسازیی پزیشكییە كە پڕۆژەیەكی هاوبەشی نێوان حكومەتی ئەڵمانیای فیدراڵ و حكومەتی هەرێمی كوردستانە، ئامانج لە پڕۆژەكە رەخساندنی دەرفەتە بۆ پزیشكانی كوردستان تاوەكو خوێندنی باڵای پزیشكی لە ئەڵمانیا تەواو بكەن.
بە هاوبەشی لەگەڵ سەرۆكی زانكۆی (لا ساپیانتسا)ی ئیتاڵی، سەرۆكی كۆمەڵەی دۆستایەتی كوردستانی ئیتاڵییە.
بایەخی زۆر بە شێوەی ژیانی تەندروست دەدات، هەفتانە پێنج رۆژ وەرزش دەكات. حەزی لە یاری تۆپی پێیە، هاندەری یانەی بارسێلۆنا و هەڵبژاردەی ئیتاڵیایە.
یاریزانی تۆپی پێ بووە لە تازەپێگەیشتووانی یانەی ئاسۆ و هەولێر، پاشان لەلایەن یەكێتی ناوبژیوانانی عێراق و كوردستان دوای چەندین تاقیكردنەوەی جەستەیی و زانستی بە ناوبژیوانی پلە سێی عێراق هەڵبژێردراوە، دواتر بەرزكراوەتەوە بۆ پلە دوو، بەڵام بەهۆی بایەخدانی بە خوێندنی پزیشكی وازی لە ناوبژیوانی هێناوە.
زمانەكانی عەرەبی، ئینگلیزی و ئیتاڵی دەزانێت و هێشتا سەڵتە و ژیانی هاوژینی دەستپێنەكردووە.
