بە وێنە؛ دڵخۆشیی هاندەرانی یانەی زاخۆ دوای...

گالەری

بە وێنە؛ دڵخۆشیی هاندەرانی یانەی زاخۆ دوای نازناوە مەزنەکە

كاژێرێك له‌مه‌وپێش

16 Photos

محەممەد کارێزی

دوای ئەوەی هاندەرانی یانەی زاخۆ لەلایەن فیدراسیۆنی تۆپی پێی جیهانی (فیفا)، وەک باشترین هاندەری 2025 دەستنیشان کران، لە کوردستان و زاخۆ پێشوازیی گەرم لە بڕیارەکە کرا.

هەر زوو هاندەرانی یانەی زاخۆ چوونە نێو یاریگە و ئاهەنگیان گێڕا. دێسکی وەرزشیی تۆڕی میدیایی رووداو لە سەرەتاوە لەگەڵ هاندەران بوون و ئەمڕۆش ئاهەنگەکانی بە راستەوخۆ گواستەوە.

رۆژی سێشەممە، 16-12-2025، یانەی وەرزشیی زاخۆ مێژووی نووسییەوە و وەک یەکەم یانەی کوردستانی، عێراقی، رۆژهەڵاتی نێوەڕاست و هەموو ئاسیا، بووە براوەی خەڵاتی فیفای 2025 بۆ باشترین هاندەر.

شانبەشانی زاخۆ، هەریەک لە ئەلیخاندرۆ چیگانۆتۆ، هاندەری یانەی رەیسینگی ئەرجەنتینی و مانوێل کاسێرێس، هاندەری دیار و تەپڵ لێدەری هەڵبژاردەی ئیسپانیا بەربژێر بوون.

دوای راگەیاندنی بەربژێربوونی زاخۆ، لە هەر چوار پارچەی کوردستان و هەموو ئەورووپا و جیهان، کورد پێکەوە هەڵمەتێکی گەورەیان دەستپێکرد و بە ئۆنلاین دەنگیان بە یانەی زاخۆ دا. دواجار فیفا لەڕێگەی بڵاوکردنەوەی ڤیدیۆیەک بە دەنگی جیانی ئینفانتینۆ، سەرۆکی فیفا پیرۆزبایی لە زاخۆ کرد و بردنەوەی هاندەرانی یانەکەی راگەیاند.

یانەی زاخۆ

یانەی زاخۆ یان (کوڕانی خابوور) لە 03-06-1987 دامەزراوە و لە خولی ئەستێرەکانی عێراق بەشدارە.

لەم وەرزەی باڵاترین خولی عێراق، زاخۆ لە ریزبەندیی شەشەمدایە؛ 7 یاری کردووە، 4 یاریی بردووەتەوە، 1 یاریی یەکسان بووە و 1 یاریشی دۆڕاندووە. تاوەکو ئێستا 13 خاڵی کۆکردووەتەوە. زاخۆ لەم وەرزەدا 9 گۆڵی کردووە و 4 گۆڵیشی لێکراوە.

وەرزی پێشوو زاخۆ بۆ یەکەم جار لە مێژووی خۆی پلەی سێیەمی لە خولی ئەستێرەکانی عێراق بەدەستهێنا و لە جامی عێراقیش پلەی دووەمی وەرگرت، ئەمەش دوای ئەوەی رۆژی 18-07-2025 لە یاریی کۆتایی جامەکە بەرامبەر دهۆک یارییەکەی بە بێ گۆڵ تەواوکرد و لە لێدانی یەکلاکەرەوە 5-3 دۆڕا.

یانەی زاخۆ خاوەن یاریگەیەکی نێودەوڵەتییە کە لە ساڵی 2015 دروستکراوە، جێگەی 20 هەزار هاندەر دەگرێت و 20 ملیۆن دۆلاری تێچووە.