رووداو کاتی گەیشتنی راهێنەری یانەی دهۆک ئاشکرا دەکات

 

 

یانەی دهۆک لە راگەیێنراوێکی فەرمیدا دەڵێت "ئەمجارە راهێنەرەکەمان لە رۆژهەڵاتەوە دەبێت و کارگێڕیی یانەی دهۆک بەفەرمی رێککەوتنی لەگەڵ ئەمیر ئازرەفشان، راهێنەری کورد و خەڵکی ورمێی رۆژهەڵاتی کوردستان واژۆکردووە.'

 

ئەمیر ئازرەفشان لە سوێد لە دایکبووە، تەمەنی 37 ساڵە، بڕوانامەی پڕۆی لە کاری راهێنەرایەتیدا هەیە، لە وەرزی 2009-2010 وەکو یاریزان دەرکەوتووە و تاوەکو ساڵی 2019 لە چەند یانەیەکی جیاوازی سوێد یارییکردووە.

 

ساڵی 2014 دەستی بە کاری راهێنەرایەتی کردووە و لە تیپی لاوانی فالو بووەتە راهێنەر، دوای ئەوەش لە یانەی دالکورد، یاریدەدەری راهێنەر بوو، لە 2020 لە خولی ئالسڤێنسکانی سوێد بووە راهێنەری یانەی ئۆسترشوند کە یانەیەکی دیاری سوێدە و دوای ئەوەش راهێنەری یانەی دالکورد بووە.

 

ئەمیر ئازرەفشان، کوردییەکی باش دەزانێت، شێوازی دڵخوازی ئەو بۆ یارییکردن 4-2-3-1ـە، پێشتر راهێنەرایەتی هەریەکە لە هاروون ئەحمەد، پاشەنگ عەبدوڵڵا، رێوان ئەمین، بەختیار رەحمانی، بڕوا نوری و چەندین یاریزانی دیکەی دیار کردووە.

 

بەپێی زانیارییەکانی تۆڕی میدیایی رووداو، درەنگانی ئەمشەو ئەمیر ئازرەفشان، راهێنەری نوێی یانەی دهۆک لە رێگەی فرۆکەخانەی نێودەوڵەتی هەولێرەوە دەگاتە باشووری کوردستان، لەوێشەوە دەچێتە دهۆک و لە چەند رۆژی داهاتوودا بەفەرمی گرێبەستەکەی واژۆ دەکات و لەگەڵ یانەکە دەستبەکاردەبێت.

 

دەستنیشانکردنی ئازرەفشان وەکو راهێنەری نوێی یانەکە لەکاتێکدایە، ئەنجامەکانی یانەی دهۆک لە دوای بردنەوەی نازناوی جامی کەنداوەوە خراپن و لە دوایین دوو یارییدا دۆڕاوە.