گەشتیارێک لە ئیسپانیا چووە سەر سەقفی فڕۆکەیەک و گەشتێکی دواخست
رووداو دیجیتاڵ
لە رووداوێکی نامۆدا لە فڕۆکەخانەی مانیسێس لە ڤالێنسیای ئیسپانیا، گەنجێک سەرکەوتە سەر سەقفی فڕۆکەیەکی کۆمپانیای ڤولینگ و بووە هۆی پەکخستنی گەشتێک کە بڕیاربوو بەرەو ئەمستردام بفڕێت، ئەمەش گەشتیارانی تووشی سەرسوڕمان کرد و گەشتەکەی بۆ ماوەی دوو کاژێر دواخست.
بەپێی ئەو گرتە ڤیدیۆییانەی لە سۆشیاڵ میدیا بڵاوبوونەتەوە، گەنجەکە لەسەر پشتی فڕۆکەکە بە چاکەتێکی سپییەوە دەردەکەوێت و هاوار بەسەر کارمەندانی فڕۆکەخانەکەدا دەکات، هاوکات خواردنەوە لە جانتاکەی دەردەهێنێت و دەیخواتەوە، لە کاتێکدا ئەفسەرانی پۆلیس و کارمەندانی فڕۆکەخانە هەوڵی رازیکردنی دەدەن بۆ ئەوەی بێتە خوارەوە.
میدیا ناوخۆییەکانی ڤالێنسیا ئاماژەیان بەوە کردووە کە پیاوەکە بۆ ماوەی 10 خولەک لەسەر فڕۆکەکە ماوەتەوە و دواتر لەلایەن پاسەوانی مەدەنییەوە ناچار کراوە لە رێگەی پلیکانەی گەشتیارانەوە دابەزێت.
هەرچەندە رووداوەکە پشێوی دروستکرد، بەڵام دەسەڵاتی گەشتی ئاسمانیی ئیسپانیا (Aena) رایگەیاند، هیچ مەترسییەک لەسەر سەلامەتی گەشتیاران و هاتووچۆی ئاسمانی دروست نەبووە.
دوای کۆتاییهاتنی رووداوەکە، گەنجەکە لەلایەن تیمە پزیشکییەکانەوە بە ئەمبوڵانس بۆ بەشی دەروونی لە نەخۆشخانەی گشتیی ڤالێنسیا گواسترایەوە.