پۆلیس لێکۆڵینەوە لە رووداوی گیانلەدەستدانی باوک و کوڕە کوردەکەی بەریتانیا دەکات

 

رۆژی سێشەممە، 4-7-2023، دانا جەمیل حەمزە، کە ئامۆزای حاجی نیعمەت مەلا لاوەیە بە رووداوی گوت "رووداوی ئاگرکەوتنەوەکە کاژێر 1:20ـی پاشنیوەڕۆی رۆژی شەممە بووە، هێشتا هۆکاری ئاگرکەوتنەکە بۆ ئێمە و کەسوکاری کاک حاجی رووننەبووەتەوە، بەڵام محەممەدی کوڕی کە 4 ساڵ بووە بە تەواوەتی سووتاوە، حاجیش 83٪ـی گیانی لەناوەوە و لە دەرەوەش سووتاوە و بەو هۆیەوە گیانیان لەدەستدا".

 

ئەو کەسە نزیکەی حاجی نیعمەت کە ئەویش لە بەریتانیا دەژی، هەروەها دەڵێت "پۆلیس و پۆلیسی ئاگرکوژێنەوە سەرقاڵی لێکۆڵینەوەن لە هۆکارەکانی کەوتنەوەی ئاگرەکە، ئەوەی دەگوترێت بەهۆی بۆیلەرەوە بووە، راست نییە".

 

سەبارەت بە وردەکاری رووداوەکە، روونیکردەوە "رووداوەکە کاتێک روویداوە کاک حاجی لە ماڵەکەی خۆی کە دوو نهۆمە لە حەمام بووە، کچە گەورەکەی کە 13 ساڵە، لە ژووری خۆی لە نهۆمی سەرەوە بووە، کوڕە بچووکەکەی کە ناوی محەممەدە ئەویش لە ژووری خۆی بووە لە سەرەوە، هاوژینی کاک حاجی لە چێشتخانە بووە و کوڕە گەورەکەشیان لە دەرەوە یاری کردووە، بەڵام کە لە نهۆمی سەرەوە ئاگر دەکەوێتەوە و دایکیان هاوار دەکات کچەکەی دێتە خوارەوە و رزگاری دەبێت، بەڵام کاک حاجی بەهانای کوڕەکەیەوە دەڕوات و لە ژوورەکەیدا پێکەوە سووتان و گیانیان لەدەستدا."

 

حاجی نیعمەت مەلا لاوە، تەمەنی 51 ساڵ بوو و لە بنەڕەتدا خەڵکی پارێزگای هەولێرن، لەساڵی 2000ەوە چووەتە بەریتانیا  و لە هەرێمی وێڵز نیشتەجێ بووە و وەستای خانوو بووە. بەپێی قسەی کەسوکارەکەی دوای تەواوبوونی راپۆرتی پزیشکی و پۆلیس بڕیارە تەرمەکانیان بهێنرێنەوە بۆ هەولێر و لە زێدی خۆیان بنێژرێن.