رووداو دیجیتاڵ
کۆشکی سپی، سەرۆکی سووریا بە بەرپرسیاری دۆخی ئێستای وڵاتەکە دەزانێت و دەڵێت: "لە نزیکەوە چاودێری دەکەین." ئەو هەروەها داوایکرد، خەڵکی سڤیل و پێکهاتەکان بپارێزرێن.
رۆژی هەینی 06-12-2024 کارین ژان پیێر، گوتەبێژی کۆشکی سپیی ئەمریکا لەبارەی دۆخی سووریا گوتی: "لە نزیکەوە چاودێریی پێشهاتەکانی سووریا دەکەین، لەگەڵ وڵاتانی ناوچەکە لە پەیوەندیداین و لە پاراستنی هێزەکانیشمان بەردەوام دەبین."
ئەمڕۆ هەینی، 12 رۆژ بەسەر هێرشە لەناکاوەکەی دەستەی تەحریری شام و گرووپە هاوپەیمانەکانی، بۆ سەر شارەکانی ژێر دەسەڵاتی حکومەتی سووریا تێپەڕی.
رۆژی 25-11-2024 گرووپەکانی دژی حکومەت بە ئاراستەی شاری حەلەب هێرشیانکرد. رۆژی 27-11-2024 گەیشتنە شاری حەلەب و کۆنتڕۆڵیانکرد. رۆژی 06-12-2024 کۆنتڕۆڵکردنی شاری حەمایان لە باشووری حەلەب راگەیاند و دواتر شاری سوەیدایان لە باشووری سووریا گرت. گرووپەکە رایگەیاند، بەرەو شاری حمس دەڕۆن و چاویان لە دیمەشقیشە.
گوتەبێژی کۆشکی سپی گوتیشی: "رەتکردنەوەی رژێمی ئەسەد بۆ بەشداریکردن لە پرۆسەی سیاسی و پشتبەستنی بە رووسیا و ئێران، بوونە هۆی دروستبوونی ئەو بارودۆخەی ئێستا."
کارین ژان پیێر داوایکرد، کار بۆ کرمکردنەوەی گرژییەکان بکرێت و خەڵکی سڤیل و پێکهاتەکانیش بپارێزرێن.
ستیفان دوجاریک، گوتەبێژی ئەنتۆنیۆ گوتێرێز، سکرتێری گشتیی نەتەوە یەکگرتووەکان گوتی: "لەوکاتەوەی شەڕ و پێکدادانەکان زیادیانکردووە، لانیکەم 370 هەزار پیاو، ژن، منداڵ، کوڕ و کچ ئاوارەبوون."
بەگوێرەی سەرچاوە خۆجێییەکان، لە شەڕ و پێکدادانەکانی ئەم چەند رۆژەدا، 828 کەس کوژراون کە 111ـیان سڤیلن.