چەند کوردێک لە هەڵبژاردنە خۆجێییەکانی هەرێمی نۆردراین ڤێستفاڵنی ئەڵمانیا سەرکەوتنیان بەدەستهێنا

 

 

بێریڤان ئایماز، بەربژێر بۆ سەرۆکایەتیی گەورە شارەوانیی کوێلن ناسراوترین بەربژێرە کە لە خولی یەکەمدا لە شارەکەی زۆرترین دەنگی هێنا و کۆتایی ئەم مانگە جارێکی دیکە دەبێت خەڵکی کوێلن بچنەوە سەر سندووقەکانی دەنگدان، تاوەکو لەنێوان ئەو و یەکێکی دیکەدا هەڵبژێرن کە کێ ببێتە سەرۆکی شارەوانییەکەیان.

 

یەکێک لەوانەی لە هەڵبژاردنە خۆجێی و ئەنجوومەنەکانی ئینتیگراسیۆنی هەرێمی نۆردراین ڤێستڤالن سەرکەوتنی بەدەستهێنا، "یاسین کوت"ە، کە نزیکەی 30 ساڵە لە کۆمەڵگە و سیاسەتی ئەڵمانیادا چالاکە، لە ساڵی 2023وە ئەندامی بەڕێوەبەرایەتیی پارتی سۆسیال دیموکراتی شاری لودنشایدە.

 

لە هەڵبژاردنە خۆجێییەکاندا یاسین کوت نزیکەی 32%ی دەنگەکانی بەدەستهێنا و بە پلەی یەکەم لە شارەکەی دەرچوو، ئەو بۆ رووداو باسی هۆکاری ئەوە دەکات و دەڵێت، "هۆکاری ئەو سەرکەوتنە ئەوەیە، یەکەم شت دەبێت خۆت چالاک بیت، هەروەها دەبێت وا پیشانی بدەیت کە تۆ لێرە دەژیت و ئەوەی لێرە روودەدات پەیوەندیی بە تۆوە هەیە، پەیوەندیی بە هەموو ژیانتەوە هەیە، ئێمە وەکو مرۆڤ لێرە دەژین و خاوەنی ئەو مافەین کە بچینە سەر سندووقەکان و دەنگی خۆمان بدەین، ئەگەر دەنگ بدەین دەتوانین بەهێزتر بین، ئەگەر نەچین و دەنگ نەدەین ئەو کاتە پارتە رەگەزپەرستەکان 100% وەکو ئێستا بەهێز دەبن."

 

پەیمان حەسەن، ئەندامی SPD لە پەرلەمانی روور؛ خەڵکی رۆژئاوای کوردستانە و لە تەمەنی 6 ساڵییەوە لە ئەڵمانیا دەژی، پێش دوو ساڵ و نیو سەنتەرێکی پەروەردەیی لە شاری هێرن کردەوە و لە هەمان کاتدا بووە ئەندامی پارتی سۆسیال دیموکرات، پارتەکەی لە هەڵبژاردنەکاندا 29 کورسیی پەرلەمانی بەدەستهێنا و بووە پارتی یەکەم.

 

 

پەیمان حەسەن بە رووداوی گوت، "لەو 29 کورسییەی بەدەستمان هێنا، یەکێک لەوانەی سەرکەوت کورد بوو، منیش گەنجێکم، ئەگەر باسی خۆم بکەم، زۆر پەیوەستم بە کوردبوونی خۆمەوە و دەمەوێت کورد پێشبخەم، دەمەوێت ناوی کورد پێشبخەم، دەمەوێت بە سیاسەتڤانانی ئەڵمانیا بڵێم و پێیان ئاشنا بکەم کە کوردی زۆر هەن دەیانەوێت کار بکەن، هەم گەلی خۆیان و هەم گەلی ئەڵمانیش پێشبخەن، دەیانەوێت شتێکی باش لە ئەڵمانیا هەم بۆ کۆمەڵگەی کوردی و هەم بۆ کۆمەڵگەی ئەڵمان بکەن."

 

پەیمانی تەمەن 30 ساڵ دەیەوێت بە نەوەی نوێی کوردی دیاسپۆرا بڵێت، ئەوانیش بچنە نێو پارتە ئەڵمانییەکانەوە و گۆڕانکاری دروست بکەن.

 

ئەو ئەندامەی SPD لە پەرلەمانی روور ئاماژەی بەوەش کرد، "هەر کەسێک لێرە کار بکات، بەتوانا بێت و بیەوێت دەنگی خۆی بگەیێنێت، ئەڵمانەکان زۆر پشتگیریی دەکەن، واتە کاتێک ئەڵمانەکان دەبینن مرۆڤێک زۆر کار دەکات و خۆی ماندوو دەکات، زۆر پێی دڵخۆش دەبن و پشتگیریی لێ دەکەن، ئەگەر گەنجی زیاتری کورد بێنە ئەم بوارەوە، زۆر دڵخۆش دەبم، دەتوانین زۆر شت بۆ کورد بکەین و ناوی کوردیش بە شێوەیەکی جوان و بە شێوازێک دەربخەین کە وەکو گەلێکی لێهاتوو و بەتوانا بناسرێت."

 

جگە لە یاسین کوت و پەیمان حەسەن کە لە هەڵبژاردنە خۆجێیەکاندا سەرکەوتن، ژمارەیەک لە بەربژێرە کوردەکانیش لە ئەنجوومەنەکانی ئینتیگراسیۆندا کورسییان بەدەستهێنا، بەتایبەتی لە لیستە هاوبەشە فرەنەتەوەییەکاندا.

 

ئەنجامی هەڵبژاردنە خۆجێییەکان و ئەنجوومەنەکانی ئینتیگراسیۆن ئەوە دەردەخەن کە بەشداریی کورد لە سیاسەتی ئەڵمانیادا روو لە زیادبوونە، سەرکەوتنی بەرچاوی ئەو بەربژێرە کوردانەی لەنێو پارتە ئەڵمانییەکاندا چالاکن، لە ماوەی 5 ساڵی داهاتوودا دەتوانن کاریگەری لەسەر کۆمەڵگە و سیاسەتی ئەڵمانیا دروست بکەن.