هەڵەیەک روویدا! دووبارە هەوڵبدە
لە کۆنفرانسەکەی برۆکسل باسی عەفرین نەدەکرا رووداو بێدەنگی شکاند
رووداو-برۆکسل
لە دووەم رۆژی کۆنفرانسی هاوکاریی بۆ داهاتووی سووریا لە برۆکسل، نوێنەری وڵاتانی ناوچەکە و جیهان لەگەڵ بەرپرسی ئاژانس و رێکخراوە نێودەوڵەتییەکان و لەژێر چاودێریی یەکێتی ئەوروپا، گفتوگۆیان کرد. ئامادەبووانی کۆنفرانسەکە بێدەنگییان هەڵبژاردبوو لە پرسی عەفرین، رووداو ئەو بێدەنگیەی شکاند و پرسیاری لە جێگری سه‌رۆكی كۆمیسیۆنی یه‌كێتی ئه‌وروپا و یاریدەدەری سكرتێری گشتی نه‌ته‌وه یەکگرتووەکان کرد لەبارەی دۆخی عەفرین.
لە هه‌ر دوو رۆژی كۆنفرانسدا، پرسی باسنەکراو عه‌فرین و خه‌ڵكی ئەوێ بوو، رووداو ئه‌و بێده‌نگییەی شكاند. لە وەڵامی تۆڕی میدیایی رووداو بۆ ئەو پرسە، مارك لۆكۆك یاریدەدەری سكرتێری گشتی نه‌ته‌وه یەکگرتووەکان بۆ كاروباری مرۆیی رایگەیاند: "لەبارەی عەفرین ئێمە دەمانەوێت هاریکاریی مرۆیی بگەیێنیە ئەو ناوچەیە، ئەویش لەڕێگەی سنووری تورکیا و بەهاوکاریی تورکیا. بەڵام ئەوەی کە دەگوترێت خەڵک بۆ ئەو ناوچەیە دەگوازرێتەوە ئەوەم نەبیستووە".
فێدریكا مۆگیرینی، جێگری سه‌رۆكی كۆمیسیۆنی یه‌كێتی ئه‌وروپا گوتی: "ئێمە هیچکات شەرممان نەکردووە لەوەی باسی عەفرین بکەین، ئێمە هەمیشە جەختمانکردووەتەوە کە کردەی سەربازی چارەسەری کێشەکان ناکات لەو ناوچەیە و گوتوومانە کە فۆکەسی سەرەکیمان بە ئامانجکردنی داعش و گرووپە تیرۆریستییەکان بێت، لە دەستپێکی قەیرانەکان تاوەکو ئێستا گفتوگۆکانی ئێمە بەردەوامە".
سه‌عه‌د حه‌ریری سه‌رۆكوه‌زیرانی لوبنان لە پەراوێزی کۆنفرانسەکەدا لەبارەی پرسی کۆچبەرانی سووریا رایگەیاند: "ئێمە قسەمان لەسەر ئەوە کرد کە کۆچبەرەکان بگەڕێنەوە وڵاتی خۆیان و ئێمەیش هاوکاریی مرۆییان پێشکەش بکەین، بەڕاستی خەرجیی کۆچبەران لەسەر گەل و وڵاتی ئێمە زۆر بارگرانییە".
لەو چوار ملیار و 400 ملیۆن یۆرۆیەی کە بەڵێن دراوە تەنیا ئەڵمانیا یەک ملیار یۆرۆی بەخشیوە. هایكۆ ماس، وه‌زیری دەرەوەی ئه‌ڵمانیا گوتی: "ئێمە ئەمڕۆ گفتوگۆمان لەسەر ئەوە کردووە کە ئێش و ئازاری گەلی سووریا کەم بکەین، وەک ئەڵمانیا لە ئەمساڵ و ساڵی داهاتوو یەک ملیار دەبەخشینە کۆچبەرانی سووریا"
بەرپرسانی 85 وڵات و دەزگای جیهانی بۆ پرسی سووریا لە یەکێتی ئەوروپا کۆبوونەوە، لە نێویاندا هیچ نوێنەرێک لە باشووری کوردستانەوە بەشداریی نەکردبوو ئەگەرچی زیاتر لە 300 هەزار کۆچبەری سووری روویان لە باشووری کوردستان کردووە.
داڕشتنەوە؛ عومەر شایان
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ