Gûzên Mûşê / Wêne: AA
Hewlêr (Rûdaw) - Li parêzgeha Mûşê ya Bakurê Kurdistanê demsala berhevkirina gûzan dest pê kir.
Cotkarên gundên parêzgehê rojane diçin nav baxçeyan û bi rêbazên berê darên xwe yên gûzan diweşînin.
Piştî ku gûz ji daran tên weşandin, ji qalikên wan ên kesk tên cudakirin û hişkkirin.
Beşeke ji berhema ku bi dest dixin ji xwe re vediqetînin û beşa mayî jî difiroşin.
Cotkar Mehmet Emîn Dînçer anî ziman:
“100 darên min ên gûzan hene. Em hinekan bê beramber didin xizm û mêvanên xwe û hinekan jî difiroşin.”
Gûzên Mûşê bi tam, rêjeya zêde ya rûn, qalikên xwe yên zirav û meziniya kakilên xwe tên naskirin.
Ev berhem hem ji bo cotkaran hem jî ji bo aboriya parêzgehê xwedî cihekî girîng e.
Cotkar Kerem Sune jî da zanîn:
“Beşek ji darên gûzan ji bav û kalên me mane û beşek jî birêvebiriya çandiniyê dane me.
Kîloya wan derdora 200 lîreyan e û xelkê herêmê bi vî berhemî debara xwe dike.”
Li gorî amarên Birêvebiriya Çandiniyê ya Mûşê, li ser 4 hezar û 700 donim erdê parêzgehê darên gûzan hatine çandin û tê pêşbînîkirin ku îsal ji wan daran derdora hezar ton gûz bên berhemanîn.
Ev jî tê wateya nêzîkî 200 milyon lîre (4.8 milyon dolar) dahat ji bo aboriya parêzgehê.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse