Hewlêr (Rûdaw) - Parlamenterê CHPyê yê Amedê Sezgîn Tanrikulu ragihand ku ji ber polîtîkayên aboriyê yên hikûmetê, kompanyayên mezin kargehên xwe yên li Amedê digirin.
Sezgîn Tanrikulu bangî Wezîrê Xezîne û Darayiyê yê Tirkiyeyê Mehmet Şimşek kir ku ji bo pirsgirêkên sektora tekstîlê çareseriyekê bibîne.
Parlamenterê CHPyê Sezgîn Tanrikulu doh li Ameda Bakurê Kurdistanê, Herêma Pîşesaziyê ziyaret kir û piştî serdanê daxuyaniyek da.
Tanrikulu da zanîn ku ji ber polîtîkayên hikûmetê, kompanyayên sektora tekstîlê roj bi roj kargehên xwe digirin û ji Amedê û Tirkiyeyê diçin.
“Herêma Pîşesaziyê dê bibe wekî cihê depoyan”
Parlamenterê CHPyê yê Amedê wiha got:
“Ji ber polîtîkayên hikûmetê, kargehên li vir nikarin çaryeka kapasîteya xwe jî bi kar bînin.
Kompanyayên mezin dest bi girtina kargehên xwe kiriye û ji Amedê derdikevin.
Ji ber vê yekê jî ev herêma pîşesaziyê ya organîzeyê demeke nêzîk dê bibe wekî cihê depoyan.
Ez bangî hikûmetê dikim ku hawara sektora tekstîlê bibihîze û alîkariyê bide.
Ev sektor têk diçe, ji Amedê û heta ji Tirkiyeyê jî diçin. Ev herêm ku bi hezaran karker lê kar dikin, mixabin piştî demeke kurt dê bibe cihekî ku kes lê kar nake.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse