Hewlêr (Rûdaw) - Li Parêzgeha Qamişloyê ya Rojavayê Kurdistanê, serdana şandeke hikûmeta Sûriyeyê ji bo Zanîngeha Rojavayê bû sedema alozî û nerazîbûna tund a xwendekaran.
Di encama hewldanên derketina şandeyê de pevçûn derket û bi kêmanî 25 xwendekar birîndar bûn.
Şandeya hikûmeta Sûriyeyê bi armanca gotûbêjkirina dosyaya entegrekirina Saziyên Xwendina Bilind ên Rêveberiya Xweser di nav sîstema xwendina bilind a Sûriyeyê de serdana Zanîngeha Rojavayê kiribû.
Piştî bidawîbûna civînê, xwendekaran ala Kurdistanê bilind kirin, li ber deriyê zanîngehê kom bûn û rê li ber derketina şandeyê girtin da ku dengê xwe bigihînin berpirsan.
"Me xwest daxwazên xwe bighînin wan, lê bi ser me de ajotin"
Xwendekara Beşa Erdnîgariyê ya Zanîngeha Rojavayê Kajiyan Mihemed, ku di bûyerê de destê wê derizî bû, di bultena Korojê ya Rûdawê de hûrgiliyên bûyerê anî ziman û got:
“Em di dersê de bûn dema ku me bihîst şandeke hikûmetê bi dizî hatiye û dixwaze bi dizî derkeve.
Em xwendekar derketin pêşiya wan da ku daxwazên xwe pêşkêş bikin û hevdîtinê bikin.
Lê ew ji otomobîlên xwe daneketin û guh nedan me.
Piştre hewl dan bi zorê di nav me re derbas bibin, gaza rondikrêj hat bikaranîn û otomobîlên xwe bi ser me de ajotin.
Di encamê de destê min birîndar bû û nêzîkî 25 hevalên me jî bi şikestin û derbên cuda birîndar bûn.”
Xwendekar dest ji perwerdeya Kurdî bernadin
Kajiyan Mihemed tekez kir ku sedema sereke ya nerazîbûna wan, redkirina biryarên Şamê ye ku dixwaze nasnameya Zanîngeha Rojavayê ji holê rake û sîstema perwerdeyê ya bi zimanê Kurdî sînordar bike.
Kajiyan got:
“Ev 12 sal in em bi zimanê xwe yê Kurdî dixwînin.
Em qebûl nakin ku zanîngeha me bikeve bin kontrola Zanîngeha Feratê an em neçar bibin bi zimanê Erebî bixwînin, an jî me bişînin Dêrezor û Şamê.
Em dixwazin zanîngeha me li ser axa me bimîne û zimanê me yê Kurdî parastî be.
Em dê dev ji maf û zimanê xwe bernedin."
Ev alozî di demekê de ye ku Meclisa Xwendina Bilind a Sûriyeyê biryar dabû beşên Zanîngeha Rojavayê bixe bin çavdêriya Zanîngeha Feratê û sîstema serbixwe ya zanîngehê nas neke, biryarek ku di nav xwendekar û mamosteyên Kurd de bûye cihê fikar û bertekên mezin.


