Hewlêr (Rûdaw) - Biryar e di rojên pêş me de Şandeya Îmraliyê ya Partiya Gelan a Wekhevî û Demokrasiyê (DEM Partî) biçe Girava Îmraliyê û bi Abdullah Ocalan re bicive.
Li gorî agahiyên Rûdawê, endamên Şandeya Îmraliyê ya DEM Partiyê ku ji Pervîn Buldan, Mîthat Sancar û Faîk Ozgur Erol pêk tên, dê di rojên pêş me de herin Îmraliyê.
Parlamentera Wanê ya DEM Partiyê û Endama Şandeya Îmraliyê Pervîn Buldanê ji Rûdawê re ragihand, biryar hatiye dayîn ku ji bo hevdîtina bi Ocalan re şandeya wan di demeke nêzîk de biçe Îmraliyê lê hîn roja serdanê diyar nebûye.
Serdana dawî ya şandeyê ya Girava Îmraliyê û hevdîtina wan a bi Abdullah Ocalan re 13ê Îlonê pêk hatibû û heta îro 67 roj di ser wê serdanê re derbas bûne.
Ev amadehiya ji bo serdanê piştî wê yekê tê ku Hevserokê Giştî yê DEM Partiyê Tuncer Bakirhan 17ê Çiriya Paşîn di civîna koma partiya xwe de ragihandibû ku Ocalan ji bo cihê xwe yê nû hatiye veguhastin û şertên wî yên xebatê hatine guhertin.
Bakirhan anîbû zimên: "Ji bo ku karibe bi lez û berhemdar bixebite, sekreteriya wî jî hat bihêzkirin."
Banga Ocalan a ji bo gavên pratîkî
Di serdana dawî ya şandeya DEM Partiyê ya Îmraliyê ya 13ê Îlonê de, Abdullah Ocalan bi rêya peyamekê xwestibû ku gavên pratîk bên avêtin û deste û komîsyonên taybet dest bi xebatên xwe bikin.
Piştî derbasbûna zêdetirî 2 mehan, hevdem li gel ragihandina veguhastina Ocalan a ji bo cihê nû yê li Îmraliyê û amadehiya Serokê Parlamentoyê ya ji bo çalakkirina Komîsyona Çavdêriyê, şandeya DEM Partiyê amadehiya hevdîtineke nû dike.



