Hewlêr (Rûdaw) - Serokê Herêma Kurdistanê Nêçîrvan Barzanî Cejna Ekîtoyê pîroz kir û got, "Bila Cejna Ekîtoyê bibe derfeteke nû be ji bo xurtkirina hezkirinê û çavkaniya paşerojeke baştir."
Îro Cejna Ekîtoyê ango sersala nû ya Babilî ye.
Gelên Aşûr, Kildan û Suryan her sal 1ê Nîsanê, Cejna Ekîtoyê wekî serê sala nû pîroz dikin
Serokê Herêma Kurdistanê Nêçîrvan Barzanî ji bo Cejna Ekîtoyê peyameke pîrozbahiyê belav kir.
Nêçîrvan Barzanî di peyama xwe de wiha got:
Bi helkeftina sala nû ya 6775an a Babilî-Aşûrî û Cejna Ekîtoyê, pîrozbahiyên herî germpêşkêşî henwelatiyên hêja yên Kildan, Aşûrî û Siryan ên li Kurdistan, Îraq û li seranserê cîhanê dikim.
Hêvîdar im ku cejna xwe bi xweşî û aramî derbas bikin.
Cejna Ekîtoyê helkeftineke dîrokî û kevnar a şaristaniyeke bi nirx e ku kûrahiya rehên çandî û mirovî yên yek ji pêkhateyên herî kevnar ên herêma me nîşan dide.
Ev pêkhate ji destpêka dîrokê ve beşdarî avakirina şaristaniyên herêmê û parastina pirrengiya wê bûye.
Di vê helkeftinê de, careke din li Herêma Kurdistanê, em pêgîriya xwe ya ji bo parastina maf û azadiyan û bipêşxistina çanda pirrengî, bihevrejiyana aştiyane, lêborîn û qebûlkirina hevdû di navbera hemû pêkhateyên olî û neteweyî yên Kurdistanê de tekez dikin.
Bila îsal cejna Ekîtoyê derfeteke nû be ji bo xurtkirina hezkirinê, jiyana hevpar û rêzgirtina hevdû ya navbera hemû pêkhateyên gelê Kurdistanê, her wiha bila bibe çavkaniya hêviyekê ji bo pêşerojeke baştir, tije bipêşveçûn, aramî û rehetî ji herkesî re.
Cejna Ekîtoyê li tevan pîroz be, her sal bi xweşî."
